Read Ma'anyan PILIPI 3 Bible Online

PILIPI 3 - Ma'anyan bible

PILIPI 3

¹Lawulawini, Pulaksanaiku katuluh, wuah naun arai daya naun haut mira baya anri Tuhan. Aku puang kabaratan nampan ngulek inun sa haut nasuratku ma naun dahulu yari: daya hal yiru maeh tuu ma salamat naun.

²Mamaeh anri kawam ulun sa ngulah kawan hal sa jahat kawan ulun sa pantas naantuh ‘antahu’. Here mandasak nampan katuluh ulun nasunat.

³Padahal takam yiti kawan ulun sa haut narime sunat sa sajati, puang here. Takam nyambah Alatalla anri naayak daya Roh Alatalla raerai, nelang takam batarima kasih daya takam welum mira baya anri Kristus Yesus. Takam puang bagantung ma kawan upasara manyu lahir.

⁴Sabujurni aku pada tau itegei ma kawan upasara yiru. Daya amun naan ulun sa kaingkam hanye uweng tujuan nampan itegei hang upasara manyu lahir, labis likan aku.

⁵Aku nasunat tawuk baumur walu anrau. Aku nakayaan yalah erang kaulun Israel, teka suku bangsa Benyamin; aku ulun Ibrani sajati. Hawuang hal ngalut nuu kawan hukum agama Yahudi, aku samula anggota golongan Farisi.

⁶Likan aku basamangat tatuu hampe aku ngahanangen ungkup Tuhan. Amun nakakira teka segi hukum agama Yahudi, aku erang kaulun sa maeh puang uweng neu nawada.

⁷Kude daya Kristus, balalu katuluhni sa dahulu yiru anggapku ngami kauntungan, itati jari isa karugian.

⁸Puang ekat kawan hal yiru; likan kawan ala katantuluh uras naanggapku kawan hal sa ekat ngampi rugi. Sa namiliku itati labis baharaga: hanyeyiru kataru Kristus Yesus, Tuhanku. Gana Kristus, aku haut napas ala katantuluhni. Aku nganggap katantuluh yiru yalah rateh eleh, nampan aku tau kaiyuh Kristus,

⁹nelang tuu-tuu mira baya anri hanye. Hubungan sa maeh anri Alatalla puang lagi aku raerai ngakalini mitah lalan ngalut nuu ma hukum agama. Itati aku uweng hubungan sa maeh anri Alatalla, gana aku parisaya ma Kristus. Jari, hubungan sa maeh yiru hawi teka Alatalla, nelang miandan parisaya ma Yesus Kristus.

¹⁰Ekat sa nakasinnienku hanyeyiru nampan aku kataru Kristus, nelang kaingkam kuasa sa nyamelum hanye teka pampatei. Aku sindi umba ngaret kahanangen baya hanye nelang jari sameh kala hanye hawuang hal pampateini.

¹¹Nelang aku harap aku raerai sagar nasamelum kamulek teka pampatei.

¹²Aku puang kaeau aku haut bahasil, atawa haut jari tinduh paruna kude aku saratang ngakali hanrabut hadiah sa nasadia daya Kristus Yesus. Daya neu yiru hanye haut hanrabut aku nelang ngulah aku jari milikni.

¹³Sabujurni, Pulaksanai katuluh, aku kapinuu puang kaingkam aku haut kaiyuh hanrabut hadiah yiru. Kude naan isa hal sa naulahku, hanyeyiru aku puang ngitung inun sa naan hang wading wukuku kude aku bahimat ngakali ngaiyuh inun sa naan hang hadapan aku.

¹⁴Yiru sababni aku puang taduh haut nempat nuju tujuan pijumpuhanni nampan kaiyuh kamanangen hanyeyiru welum hang surga; samula neu yiru Alatalla haut nerau takam itetei Kristus Yesus.

¹⁵Takam katuluh sa haut dewasa manyu rohani harus batingkah laku kalayiru. Kude amun hang penah naun naan sa bapandapat lain, himat Alatalla sagar manarang pada ma naun.

¹⁶Kude hal yiti wuah napantaru: Takam harus tatap welum ngalut aturan sa haut napakai takam hampe wayah yiti.

¹⁷Pulaksanai katuluh ware naun isuntu aku. Kami haut ngami suntu sa bujur, daya yiru pantaru mamaeh kawan ulun sa umba ngalut suntu kami yiru.

¹⁸Aku haut gaha iwara ma naun, nelang itati aku ngalaulekni lagi anri nungkau, daya rama ulun sa pamelumni nanrusak arati pampatei Kristus hang balasangar.

¹⁹Pamelum kawan ulun kalayiru sagar jumpuh hawuang kabinasaan, daya alah here hanyeyiru kabahirien daging here raerai. Kawan hal sa ngumangan, likan sayiru sa arai here; daya here mamikir ekat neu kawan hal dunia yiti.

²⁰Kude takam samula warga karajaan surga. Teka yiru pada Raja Panyalamat takam, Tuhan Yesus Kristus, sagar hawi. Hanye sa naanrei takam anri kasungu penu kaharapen.

²¹Tenga takam sa maleme nelang tau hansur yiti, sagar naubah daya Kristus jari kala tengani raerai sa mulia. Hanye tau ngulah yiru daya hanye naan kuasa pakai nyantalau ala katantuluh.