Read Ma'anyan PILIPI 4 Bible Online

PILIPI 4 - Ma'anyan bible

PILIPI 4

¹Daya yiru, Pulaksanaiku katuluh sa nasinta, kalayiru wuah naun welum anri tuu-tuu parisaya ma Tuhan. Ateiku kasungu anri naun! Naun jari kaegahenku ngulah aku arai.

²Pulaksanai hi Euodia anri hi Sintike! Aku ilaku tatuu nampan Pulaksanai bulat atei kala kawan ulun sa mira kaparisayaan.

³Ma hengauku sa satia, aku laku pada nampan naun ngarawah kararueh wawei yiru. Here haut bagawi bahimat baya aku neu iwara Kabar Maeh teka Alatalla; sameh kala hi Klemen anri katuluh ulun lainni sa bagawi baya aku. Kawan ngaran here naan hawuang Buku Ulun Welum.

⁴Mudahan naun saratang arai daya naun haut welum mira baya anri Tuhan. Hinra lagi aku kaeau ware arai!

⁵Wuah katuluh ulun tau kadinung ulah gawi naun sa maeh atei. Daya puang lawah lagi Tuhan sagar hawi.

⁶Ada khawatir neu kawan inun heneng. Hawuang katuluh hal, ware naun badoa nelang sarah pilakuan naun ma Alatalla. Inun sa naparlu naun, wara yiru saratang ma Alatalla anri ngantuh tarima kasih.

⁷Ware kasanangen teka Alatalla sa puang tau napantaru daya murunsia, sagar nyaga atei nelang kunuan naun sa haut mira baya anri Kristus Yesus.

⁸Pijumpuhanni, Pulaksanai katuluh, huang pikiran naun makai kawan hal sabaharaga, sa patut natawat, hanyeyiru kawan hal sa bujur, sa tahormat, sa adil, maeh, manis, nelang maeh.

⁹Tampalus inun sa haut napaajar nelang natarime naun teka aku; hau teka kawan lengan hau teka kawan pagawianku. Alatalla putut kasanangen, sagar nyinrah naun.

¹⁰Hawuang pamelumku sa mira baya anri Tuhan, aku kaingkam tuu sanang, daya udi kalayiru lawah, itati naun sampat lagi mamikir kaadaanku. Sa nabahumku yiru puang jaka naun haut puang kaitung aku; naun samula ngitung ngatawani aku, kude naun puang uweng kasampatan neu nantarang buktini.

¹¹Aku iwara yiti puang daya aku kakurangen, daya aku haut paajar ngingkam sukup anri inun sa naan.

¹²Aku haut kaingkam welum saraba bakakurangen, nelang pada welum anri bakalabihan. Aku haut kataru rahasiani neu nadap kaadaan sa kalaaweleh; hau kaadaan sanang marauh hau kaadaan paua paruuh, hau kaadaan dirak-dirai hau kaadaan bakakurangen.

¹³Makai kuasa sa naami Kristus maaku, aku uweng kakuaten neu nadap katuluh wangun kaadaan.

¹⁴Kude naun haut ngarawah aku hawuang kasusahenku; nelang inun sa naulah naun yiru samula maeh.

¹⁵Kawan pulaksanaiku ulun Pilipi! Naun raerai karasa tuu tawuk aku nanan Makedonia dahulu hie, hang tawuk Kabar Maeh yiru nawaraku hang palanungkai kalini, ekat tunggal naun ungkup sa ngarawah aku; ekat tunggal naun sa umba kaingkam untung rugini baya anri aku.

¹⁶Tawuk aku hang Telesonika nelang parlu bantuan, puang ekat hinra naun haut ngirim bantuan ma aku.

¹⁷Yiru puang baarati aku ekat hamen narime pangamian. Sa naahengku hanyeyiru nampan aku tau kadinung kawan hasil sa nambah kauntungan ma naun.

¹⁸Aku haut narime katuluhni — likan labis teka sukup! Katuluh pangamian sa nakirim naun ma aku, haut natarimeku teka hi Epafroditus. Itati aku uras naan katuluh sa naparluku. Kawan pangamian teka naun yiru hanyeyiru kala enguh parapah samaringit sa nasarah ma Alatalla nelang sa natarime daya Alatalla anri sanang atei.

¹⁹Alatalla sa nasambahku, sa jubung anri katauen hawuang Kristus Yesus, sagar nyansukup kawan kaparluan naun.

²⁰Tawat ma Alatalla Ambah takam hampe kalalawahni! Amen.

²¹Hampe tabeku ma katuluh ulun wat Alatalla sa mira baya anri Kristus Yesus. Nelang tarime pada tabe teka kawan pulaksanai sa naan baya anri aku hang yiti.

²²Katantuluh ulun wat Alatalla hang tumpuk yiti, samambatang here sa teka istana Kaisar, ngirim tabe ma naun.

²³Mudahan Tuhan Yesus Kristus mamberkat Pulaksanai katuluhni. Hormat kami, Paulus dan Timotius