Read Ma'anyan KOLOSE 2 Bible Online

KOLOSE 2 - Ma'anyan bible

KOLOSE 2

¹Aku sindi naun karasa kalaawe tamamni aku bajuang; neu ma naun nelang ma here sa hang Laodikia nelang ma here katuluh sa puang kataru aku sara pribadi.

²Katuluhni yiti naulahku nampan atei here jari mansing nelang here ipasinta hampe here rantep mira baya. Anri kalayiru here tuu-tuu kataru nelang harap nelang kataru rasia Alatalla, hanyeyiru Kristus raerai.

³Kristus sa nguka kawan kaharatien nelang pangatahuan Alatalla sa dahulu hie padina.

⁴Aku iwara hal yiti nampan naun ada tatipu daya hie-hie sa marauh paner anri naun.

⁵Daya biar aku lawit teka naun, anggapleh aku naan hang penah naun. Nelang aku arai kadinung naun bulat atei nelang mansing parisaya ma Kristus.

⁶Kawan pulaksanai haut narime Kristus Yesus yalah Tuhan. Daya yiru wuah naun welum mira baya anri hanye,

⁷nelang iwakat hawuang hanye. Wuah naun mambangun pamelum naun nelang Kristus jari panalni. Wuah naun magin parisaya ma Kristus, ngalut inun sa haut naajar ma naun. Nelang ware atei naun newe hanruap anri ngantuh tarima kasih.

⁸Ware naun bahati-hati, ada hampe naan isa mamikat naun anri kawan kapintaren murunsia sa puang bariran, malengkan ekat neu nyantawang. Kawan kapintaren yiru puang teka Kristus, malengkan teka pandapat murunsia anri teka kawan roh panguasa dunia.

⁹Daya katuluh kapribadian Alatalla muneng hang Kristus, hanyeyiru hang pimurunsiani.

¹⁰Nelang daya welum mira baya anri Kristus, naun pada naami pamelum sukup-ganap. Daya Kristus samula kapala ma tiap roh sa bakuasa nelang sa marentah.

¹¹Daya mira baya anri Kristus, naun haut nasunat, puang makai sunat sa naulah daya murunsia, malengkan makai sunat sa naulah Kristus, sa mambebas naun teka kuasa pidasaran sa badosa.

¹²Daya hang tawuk naun nabaptis, naun napasar sinrah Kristus; nelang anri baptisan yiru pada, naun umba nasamelum kamulek sinrah Kristus daya naun parisaya neu kuasa Alatalla sa haut nyamelum Kristus teka pampatei.

¹³Dahulu hie, naun haut matei manyu rohani daya naun badosa, nelang daya naun puang nasunat manyu lahir. Kude itati Alatalla nyamelum naun sinrah anri Kristus. Alatalla haut ngampun takam sa badosa.

¹⁴Nelang mambatal surat utang takam, sa ngansam takam makai kawan syarat sa maweat. Anri malasangar surat yiru hang kayu balasangar, Alatalla ngumpe katuluh dawaan nuju takam.

¹⁵Hang balasangar yiru Kristus ngulah kawan roh sa marentah nelang bakuasa jari puang uweng kakuaten lagi. Here naulah jari tuntunan ulun rama hang tawuk Kristus nginsing here yalah tawanan hawuang barisan kamanangenni.

¹⁶Daya yiru ada maladar ulun ngampi hala naun neu anakuta atawa uuten, atawa neu kawan hari raya kaagamaan, atawa kawan pesta wulan wau, atawa neu anrau Sabat.

¹⁷Katuluhni yiru ekat piamaan teka kawan hal sa sagar hawi, kude laluga tuu teka kawan hal yiru hanyeyiru Kristus!

¹⁸Ada maladar diri naun nasanrugi daya ulun sa pura-pura nyanrandah diri nelang sa nyambah kawan malekat. Ulun yiru sakah anri kawan pikiranni sa manyu dunia nelang iwawara kawan paninunganni sa hulung,

¹⁹hampe puang lagi itegei hang Kristus sa jari kapala. Hang kapit pimpinan Kristus, katantuluh tenga napalihara nelang natamaya daya kawan kakulepanni, nelang tumbu manyu kabahumen Alatalla.

²⁰Naun haut matei baya Kristus, nelang haut nabebas teka kawan roh sa nguasa dunia yiti. Nah, wuah inun naun welum kala ulun sa magun nakuasa daya dunia yiti? Wuah inun naun hayu nuu ma kawan aturan kala yiti,

²¹“Ada negei yiti”, “Ada nguta yiru”, “Ada hanggatuk yiti”?

²²Katantuluh aturan yiru hanyeyiru neu kawan hal sa udiyiru napakai puang bariran lagi. Yiru ekat kawan aturan anri kawan pangajaran sa naulah daya murunsia.

²³Samula nadinung hal yiru yalah kaharatien, anri gurayangni nampan ulun nyambah malekat, nyanrandah diri nelang nyiksa diri; kude katuluhni yiru puang bariran neu pakai nahan kabahirien murunsia.