Read Ma'anyan 1 TESALONIKA 2 Bible Online

1 TESALONIKA 2 - Ma'anyan bible

1 TESALONIKA 2

¹Pulaksanai katuluh! Naun karasa pihawian kami nunung naun puang kawai.

²Naun karasa kapihuan kami hawi nunung naun hang Tesalonika, kami haut wuah kahanangen nelang nahina hang Pilipi. Kude biar rama ulun sa nawan kami, Alatalla takam haut ngami ma kami kaheeien nampan iwara ma naun Kabar Maeh sa asalni hawi teka hanye.

³Pilakuan kami anri naun puang isa kahalaen; puang pada anri tujuan sa puang maeh atawa nipu naun.

⁴Budas Puang! Kami bapaner puang nampan ngampi sanang atei ulun, malengkan pakai ngampi sanang atei Alatalla, sa nguji atei kami. Daya kami naanggap patut daya Alatalla pakai nampe Kabar Maeh yiru.

⁵Naun karasa puang suah kami ngararimuk atawa nipu naun nampan nutup kawan aheng sa hamen malunggun. Alatalla neu jari saksi!

⁶Kami puang pada ngakali nampan kaiyuh natawat daya ulun-hau teka naun atawa teka kawan ulun lain. Sabujurni yalah Rasul Kristus, kami iyuh ilaku inun heneng teka naun.

⁷Kude tawuk kami naan hang penah naun sara kami lamah liut, yalah erang kaulun ineh maradu kawan anakni.

⁸Daya sinta nelang ahi lelo kami, kami basadia ngami ma naun, puang ekat Kabar Maeh teka Alatalla yiru, kude pada pemelum kami. Daya kami tuu sinta anri naun!

⁹Batantu naun pagun kaitung kewangun karasni kami ngakali nelang bajuang. Kaanrau kamalem kami bagawi nampan kami puang nyusah sunah erang kaulun teka naun tawuk kami iwara Kabar Maeh teka Alatalla yiru ma naun.

¹⁰Kami welum anri barasis, bujur nelang puang uweng nawada ma naun sa haut parisaya ma Kristus. Naun sa jari kawan saksi kami, kalayiru pada Alatalla.

¹¹Naun karasa kami haut ngulah anri maeh ma diri naun kala erang kaulun Ambah ngulah anri maeh ma kawan anakni.

¹²Kami ngami nasehat ma naun, kami ngami samangat ma naun nelang kami mandasak nampan naun welum mamaeh nampan ngampi sanang atei Alatalla. Daya Alatalla haut nerau naun neu jari warga Dunia sa Wau wat Alatalla nelang kaingkam pihante muliani.

¹³Naan lagi isa hal lain sa ngulah kami saratang ngantuh tarima kasih ma Alatalla. Hal yiru hanyeyiru, hang tawuk kami nampe kabar teka Alatalla ma naun, naun nyanrengei nelang narime kabar yiru puang ekat yalah kabar teka murunsia, kude kabar sa tuu-tuu teka Alatalla. Hanyeyiru sa rahat bagawi hang diri naun sa parisaya ma Yesus Kristus.

¹⁴Pulaksanai katuluh, hal sa naingkam naun yiru haut naingkam pada daya kawan ungkup Alatalla hang Yudea sa jari ulun wat Yesus Kristus. Naun kaingkam kahanangen teka pihak bangsa naun raerai, sameh kala sa naingkam daya kawan ungkup Alatalla hang Yudea yiru teka pihak kawan ulun Yahudi.

¹⁵Kawan ulun yiru munu Tuhan Yesus anri kawan nabi, nelang ngahanangen kami. Here mamusuhi katuluh ulun, nelang Alatalla budas puang sanang ma here.

¹⁶Likan here nahalang kami neu iwara ma kawan bangsa sa puang Yahudi kabar sa tau nyalamat kawan bangsa yiru. Anri kalayiru kawan ulun Yahudi yiru tarus nambah kawan dosa here hampe jumalahni ganap. Nelang itati here lawu lawini wuah karikangen Alatalla!

¹⁷Kude pulaksanai katuluh, teka tawuk kami bapisah anri naun ma papire lawah — pisah hang paninungen kude puang hawuang atei — kami magin kasungu anri naun nelang ngakali tatuu nampan tau panalu lagi anri naun!

¹⁸Kami naan aheng tulak nunung naun; nelang aku haut mansuba hinra hanrueh, kude Iblis nahalang kami.

¹⁹Kapinuuni naun kaharapen kami kaaraien kami. Daya die amun Tuhan Yesus hawi, nelang takam nadap hanye, balalu naun sa jari kaegahen kami!

²⁰Samula naun kaegahen nelang kaaraien kami!