Read Ma'anyan 1 TESALONIKA 3 Bible Online

1 TESALONIKA 3 - Ma'anyan bible

1 TESALONIKA 3

¹Lawu lawini kaingkam kasungu kami puang iyuh tahan lagi. Daya yiru kami bapikir labis maeh kami natanan raerai hang Atena,

²parahatan yiru kami ngutus pulaksanai takam hi Timotius. Hanye erang kaulun palayan Alatalla sa bagawi baya kami pakai iwara Kabar Maeh neu Kristus. Kami ngutus hi Timotius ma naun nampan hanye ngampi kansing naun nelang ngami samangat ma naun nampan magin parisaya lagi ma Kristus.

³Anri kalayiru puang sunah erang kaulun teka naun sa mulek daya kawan kahanangen takam yiti. Naun karasa kawan kahanangen yiru tamasuk ransana Alatalla ma takam.

⁴Hang tawuk kami pagun baya naun, kami haut iwara ma naun labis dahulu himat naun sagar wuah kahanangen, nelang yiru samula haut tuu-tuu jari; naun raerai sika karasa.

⁵Yiru sababni aku ngutus hi Timotius, daya aku hamen karasa kewangun kamajuan naun hang hal parisaya ma Kristus. Aku gaer Iblis kaiyuh manggoda naun hampe katuluh kauyuhen kami uras kawai.

⁶Itati hi Timotius haut mulek nelang haut nampe ma kami kabar kaaraien neu kewangun naun parisaya ma Kristus nelang ipasinta. Hanye iwara ma kami naun saratang ngitung kawan hal sa maeh neu kami hawuang atei naun. Nelang naun hamen panalu anri kami, sameh kala kami sindi panalu naun.

⁷Yiru sababni, pulaksanai katuluh, hang katuluh kasusahen nelang kahanangen kami, kami tarariu daya kabar neu naun. Kaparisayaan naun ma Kristus ngampi arai atei kami,

⁸hampe itati kami kaingkam tuu-tuu welum, asal naun tatap minri anri kokoh, mira baya anri Tuhan.

⁹Kewangun hanteni nanam tarima kasih kami ma Alatalla daya katuluh kaaraien sa naingkam kami hang hadapan Alatalla daya gana naun.

¹⁰Kaanrau kamalem kami ilaku ma hanye anri sagalis atei, nampan kami raerai tau kaiyuh panalu anri naun neu nyansukup inun sa naparlu daya naun nampan parisaya ma Kristus manyu pipatutni.

¹¹Mudahan Alatalla takam, anri Tuhan takam Yesus nyanrata lalan ma kami nampan tau panalu anri naun!

¹²Mudahan Tuhan ngulah naun magin ipasinta nelang magin sinta ma katuluh ulun, hampe sinta naun yiru magin batambah, sameh kala sinta kami ma naun.

¹³Anri kalayiru Tuhan sagar ngampi kansing atei naun, hampe naun barasis nelang puang uweng nawada hang hadapan Alatalla Ambah takam, hang tawuk Tuhan takam Yesus hawi baya katuluh ulun watni.