Read Ma'anyan 1 TESALONIKA 4 Bible Online

1 TESALONIKA 4 - Ma'anyan bible

1 TESALONIKA 4

¹Lawu lawini pulaksanai katuluh, kami haut ngami suntu ma naun neu kewangun naun harus welum nampan ngampi sanang atei Alatalla. Bujur naun haut welum kalayiru. Kude itati makai kuasa Tuhan Yesus, kami ilaku tatuu ma naun nelang mandasak nampan naun magin bahimat lagi hang hal yiru!

²Daya naun haut karasa kawan patitah sa haut naami kami ma naun makai kuasa Tuhan Yesus.

³Sa nabahum Alatalla hanyeyiru: nampan naun welum hulung ma hanye, barasis, lawit teka kawan gawian sa dapa bela.

⁴Kawan upu hang penah naun harus karasa kewangun welum baya anri matueh waweini makai sara sa ngampi sanang atei Alatalla nelang murunsia.

⁵Ada welum makai kabahumen kabahirien ma matueh wawei naun, kala sa naulah daya kawan ulun sa puang kataru Alatalla.

⁶Hang hal sa kalayiru, ada sunah erang kaulun ngulah hala ma pulaksanaini, atawa nipu hanye. Yari kami haut bahimat ngampi itung naun, neu Tuhan sagar nukum kawan ulun sa ngulah kawan kahalaen sa kalayiru.

⁷Alatalla nerau takam, puang nampan takam welum idapa ibela, malengkan nampan takam welum anri sara sa ngampi sanang ateini.

⁸Ulun sa nampik pangajaran yiti, hanye puang nampik murunsia, malengkan nampik Alatalla sa ngami Rohni sa barasis ma naun.

⁹Kami puang parlu lagi nulis ma naun neu kewangun naun harus sinta kawan pulaksanai naun mira kaparisayaan. Naun haut naajar daya Alatalla nampan ipasinta.

¹⁰Nelang hal yiti haut natantarang daya naun ma katuluh pulaksanai mira kaparisayaan hang katuluh Makedonia. Kude, pulaksanai katuluh, kami ilaku tatuu, nampan welum naun jari magin maeh lagi.

¹¹Ware naun ngakali welum anri damai nelang puang umba sampur kawan parsualan ulun lain. Ware naun bagawi ngantilau nafakah naun raerai, kala sa haut naparentah kami ma naun dahulu yari.

¹²Amun naun welum kalayiru, naun puang mihanri ma hie-hie, nelang kawan ulun sa puang parisaya ma Kristus sagar mahormat naun.

¹³Pulaksanai katuluh, kami hamen naun karasa anri kapinuuni neu kawan ulun sa haut matei; nampan naun puang mahanang atei kala kawan ulun lain sa puang uweng kaharapen.

¹⁴Takam parisaya Yesus haut matei nelang welum kamulek. Yiru sababni takam parisaya pada himat Alatalla sagar nyamelum kamulek katuluh ulun sa parisaya ma Yesus nelang haut matei, nampan here tau welum baya hanye.

¹⁵Neu hal yiru, kalayiti lengan ajar Tuhan sa hamen natahampe kami ma naun: Hang tawuk Yesus hawi, takam sa pagun welum puang sagar nahuluan kawan ulun sa haut matei labis dahulu.

¹⁶Hanrian malekat hante sagar nerau anri lengan sa mehet nelang tarompet Alatalla naampeau yalah siri parentah. Balalu Tuhan Yesus raerai sagar minau teka surga, nelang kawan ulun Kristen sa haut matei sagar nasamelum labis dahulu.

¹⁷Udi yiru, takam sa pagun welum hang tawuk yiru sagar sinrah naenat baya here mawuang rakun nampan panalu anri Tuhan hang awan. Balalu takam sagar muneng baya hanye palus ma kalalawah.

¹⁸Daya yiru, ware naun sameh ngampi kansing atei anri makai kawan lengan yiti.