Read Ma'anyan 1 TESALONIKA 5 Bible Online

1 TESALONIKA 5 - Ma'anyan bible

1 TESALONIKA 5

¹Pulaksanai katuluh, puang parlu kami nulis ma naun hantamian wayahni sa pas tuu kawan hal yiru sagar jari.

²Daya naun raerai karasa anri batantu tuu Anrau pihawian Tuhan yiru sagar hawi yalah maling hawi hang tawuk kamalem.

³Amun ulun kaeau, “Katuluhni aman nelang damai,” balalu hang tawuk yiru salenga here sagar wuah kabinasaan, nelang puang sunah erang kaulun sa kaiyuh lapas. Hal yiru sagar jari nyalenga, yalah pangingkaman erang kaulun wawei sa mahanang wuntung tawuk kai bagenda.

⁴Kude naun puang ulun sa welum hawuang piieng, hampe anrau yiru nyangkembah naun yalah pihawian erang kaulun maling.

⁵Naun katuluhni hanyeyiru ulun sa welum hawuang piraai; naun tamasuk hang anrau sa maraai. Takam puang ulun sa welum hang wuang piieng, atawa tamasuk hang anrau kamalem sa maieng.

⁶Daya yiru takam puangiyuh saanre yalah ulun lain. Takam harus bajaga nelang pikiran takam harus tarang.

⁷Hang tawuk kamalem ulun manre, nelang hang tawuk kamalem pada ulun mahamui.

⁸Kude takam yiti kawan ulun sa tamasuk hang anrau sa maraai; daya yiru pikiran takam harus tarang. Takam harus tatap parisaya ma Tuhan nelang sinta kawan ulun lain nelang harap anri batantu Alatalla sagar nyalamat takam. Yiru panrape sa nyalindung takam hawuang takam bajuang nawan piieng.

⁹Alatalla midi takam puang nampan nahukum, kude nampan nasalamat itetei Tuhan takam Yesus Kristus.

¹⁰Hanye matei ma takam nampan hang tawuk hanye hawi die-hau takam pagun welum, hau takam haut matei-takam tau kaiyuh welum baya hanye.

¹¹Daya yiru, ware naun tatap ipangami samangat nelang pangampi kansing, sameh kala sa rahat naulah daya naun itati.

¹²Pulaksanai katuluh, kami ilaku tatuu nampan naun mahormat kawan ulun sa bagawi hang penah naun; hanyeyiru here sa haut napidi daya Tuhan nampan mamimpin nelang ngami nasehat ma naun.

¹³Wuah naun tuu-tuu mahormat here nasinrah anri sinta nelang ahi lelo daya kaitung kawan ala sa naulah here. Ware naun welum tatap hawuang karukunen.

¹⁴Kami pada ilaku, Pulaksanai katuluh, tagur mamaeh ulun sa puang hakun bagawi; ampi kansing atei ulun sa takut; karawah ulun sa parlu nakarawah nelang sabar anri katuluh ulun.

¹⁵Jaga mamaeh nampan ada uweng sa iwaleh kajahaten makai kajahaten. Ware saratang ngakali ngulah kawan hal sa maeh, isa ma salain nelang ma katuluh ulun.

¹⁶Ware naun saratang arai,

¹⁷nelang saratang badoa.

¹⁸Hang katuluh hal ware naun batarima kasih, daya yiru sa nakabahumen Alatalla teka naun yalah ulun sa welum mira baya anri Kristus Yesus.

¹⁹Ada nahalang Roh Alatalla.

²⁰Ada nganggap puang bariran kawan kabar sa naami daya Roh Alatalla.

²¹Ala katantuluh harus nauji, nelang sa maeh harus naalut.

²²Sanawit katuluh masam kajahaten.

²³Mudahan Alatalla raerai sa ngami ma takam kasanangen, ngulah naun ulun sa tuu-tuu welum hulung ma Alatalla. Mudahan Alatalla nyaga nyalindung naun katuluhni, hau roh, amirue atawa tenga naun, hampe puang uweng nawada hang tawuk Tuhan takam Yesus Kristus hawi kamulek.

²⁴Alatalla, sa haut nerau naun, sagar nampalus hal yiru daya hanye satia.

²⁵Badoa ma kami, Pulaksanai katuluh!

²⁶Ware naun ipanabe anri marasap kala erang kaulun pulaksanai Kristen.

²⁷Hawuang kuasa Tuhan, aku ilaku tatuu nampan naun mambasa surat yiti ma katuluh pulaksanai sa mira kaparisayaan.

²⁸Mudahan Tuhan takam Yesus Kristus mamberkat naun. Hormat kami, Paulus