Read Ma'anyan 2 TESALONIKA 1 Bible Online

2 TESALONIKA 1 - Ma'anyan bible

2 TESALONIKA 1

¹Pulaksanai katuluh ungkup hang Tesalonika, sa jari ulun wat Alatalla Ambah takam anri Tuhan Yesus Kristus! Kami, hanyeyiru hi Paulus, hi Silas anri hi Timotius

²harap mudahan Alatalla Ambah anri Tuhan Yesus Kristus ngami berkat nelang kasanangen ma naun.

³Pulaksanai katuluh, kami wajib saratang ngantuh tarima kasih ma Alatalla gana naun. Nelang samula pipatutni kami ngulah kalayiru, gana naun magin parisaya ma Kristus, nelang naun magin ipasinta.

⁴Yiru sababni wuah inun kami saratang paner neu naun tiap kali kami nunung kawan ungkup Alatalla. Kami arai nyarita kewangun naun tatap kokoh hang perisaya ma Kristus hang kawan kahanangen sa naingkam naun.

⁵Nelang hang yiti lalea tuu leha adilni penghakiman Alatalla: naun haut wuah kahanangen daya gana Dunia Wau Alatalla, nelang daya yiru naun sagar naanggap patut masuk mawuang Dunia Wau yiru.

⁶Hanye sagar nampalus inun sa adil, nelang sagar iwaleh kahanangen ma kawan ulun sa ngulah naun wuah kahanangen.

⁷Nelang ma naun sa itati wuah kahanangen — kalayiru pada ma kami — Alatalla sagar ngami kasanangen hang anrau Tuhan Yesus minau teka surga nelang nantarang tengani sinrah kawan malekatni sa kuasa

⁸nelang baya apui sa malelap. Hanye minau neu nukum kawan ulun sa puang paduli Alatalla nelang sa puang hamen welum manyu kala Kabar Maeh neu Yesus Tuhan takam.

⁹Kawan ulun yiru sagar narime hukuman kabinasaan ma kalalawahni, naumpe kaluar teka lingkungan Tuhan nelang kuasani sa hante;

¹⁰katuluh yiru sagar jari hang anrau hanye hawi yati nampan natawat daya ulun watni nelang nampan nahormat daya katuluh ulun sa parisaya. Naun pada sagar naan hang penah kawan ulun wat Alatalla yiru, daya naun haut parisaya ma kabar sa natahampe kami ma naun.

¹¹Yiru sababni kami saratang badoa ma naun. Kami badoa nampan Alatalla ngulah naun patut welum neu ngalut kabahumenni; daya samula neu yiru hanye nerau naun. Mudahan Alatalla makai kuasani, mulur kabahumen naun nampan ngulah sa maeh nelang ngampi paruna katuluh pagawian sa naulah naun daya parisaya ma Yesus Kristus.

¹²Anri kala yiru Tuhan takam Yesus natawat daya naun, nelang naun pada natawat daya Yesus daya gana pikaeh atei Alatalla takam nelang Tuhan Yesus Kristus.