Read Ma'anyan 2 TESALONIKA 2 Bible Online

2 TESALONIKA 2 - Ma'anyan bible

2 TESALONIKA 2

¹Neu pihawian Tuhan takam Yesus Kristus, nelang neu takam sagar nakumpul umak muneng baya hanye, iti sanalaku tatuu anri naun:

²Ada kajut hinang bingung atawa balisah daya naan kabar, haut hampe wayahni anrau Tuhan Yesus hawi kamulek. Tau pada kabar yiru asalni teka isa tujum atawa isa ajaran; atawa tau pada naan sa kaeau kami haut suah nulis kalayiru hang isa teka surat kami.

³Biar kalaaweleh, ada budas hakun ulun nipu naun. Daya kapihuan Anrau yiru hawi, harus labis dalulu naan jari kalayiti: Rama ulun sagar marutad, puang mangaku Kristus; nelang Murunsia Jahat sa natukas neu masuk ma naraka, sagar hawi.

⁴Anri sakah hanye sagar nawan nelang namam diri hang ambau katuluh sa nasambah daya murunsia, atawa katuluh ilah sa naanggap Alatalla daya murunsia. Likan hanye sagar maharung hang Lewu Alatalla nelang mangaku iwara hanye Alatalla.

⁵Itung aku haut suah iwara katuluh yiru ma naun tawuk aku pagun naan baya naun.

⁶Nelang naun karasa inun sa itati pagun nahalang katuluh yiru nampan puang jari. Kude die amun hampe wayahni sa haut natukas daya Alatalla. Murunsia Jahat yiru sagar hawi.

⁷Kakuaten sa ngulah kajahaten yiru haut nuku bagawi sara rahasia, kude pagun natahan-tahan. Die amun sa nahan yiru haut naunur,

⁸wau dinung Murunsia Jahat yiru. Balalu amun Tuhan Yesus hawi, hanye sagar munu Murunsia Jahat yiru makai hewuk teka wawani, nelang ngabinasa hanye makai talak sahaya pihawianni.

⁹Murunsia Jahat yiru sagar hawi makai isa kuasa sa hante teka Iblis. Hanye sagar ngulah wahai masam kaajaiban nelang kawan hal sa luar biasa sa penu anri tipuan.

¹⁰Hanye sagar makai kawan tipu muslihat sa jahat nampan nyantawang kawan ulun sa sagar binasa. Here sagar binasa daya here puang narime nelang puang sindi kabar sa bujur teka Alatalla sa kaiyuh nyalamat here.

¹¹Yiru sababni Alatalla ngampi hulet hang here isa kuasa sa nyantawang, hampe here parisaya inun sa puang bujur.

¹²Gana yiru, katuluh ulun sa sindi anri dosa nelang puang parisaya ma sa bujur yiru, sagar nahukum.

¹³Pulaksanai katuluh sa nasinta Tuhan! Kami saratang ngantuh tarima kasih ma Alatalla neu naun, daya teka asalni Alatalla haut midi naun nampan nasalamat. Hal yiru jari daya inun sa nakaraja daya Roh Alatalla hang naun nampan ngulah naun jari ulun wat Alatalla sa barasis nelang daya naun parisaya ma kabar sa bujur teka Alatalla.

¹⁴Neu ma yiru Alatalla nerau naun itetei Kabar Maeh sa nawara kami ma naun. Alatalla nerau naun, daya hanye hamen nampan naun umba kaingkam pihante mulia Tuhan takam Yesus Kristus.

¹⁵Daya sabab yiru, Pulaksanai katuluh, ware naun minri anri segah nelang itegei mansing ma kawan ajaran sa haut naami kami ma naun, hau makai paner atawa surat.

¹⁶Mudahan Tuhan takam Yesus Kristus raerai, nelang Alatalla Ambah takam ngarariu nelang nangkansing atei naun, nampan naun tau kaiyuh ngulah nelang iwara inun sa maeh. Daya Alatalla sinta takam, nelang daya pikaeh ateini hanye ngulah takam tatap sabar, nelang harap sa maeh.