Read Ma'anyan 2 TESALONIKA 3 Bible Online

2 TESALONIKA 3 - Ma'anyan bible

2 TESALONIKA 3

¹Lawu lawini, pulaksanai katuluh, ware naun badoa ma kami. Badoa nampan kabar teka Tuhan kaiyuh tatap nawara anri hinang nelang natarime anri maeh, sameh kala sa haut jari hang naun dahulu yari.

²Badoa pada nampan Alatalla nyalamat kami teka kawan ulun sa jahat. Daya puang katuluh ulun parisaya ma kabar teka Tuhan yiru.

³Kude Tuhan satia. Hanye sagar nangkansing naun nelang nyalindung naun teka kuasa sa Jahat.

⁴Nelang kami penu parisaya ma Tuhan neu naun, himat naun rahat ngulah nelang sagar tatap ngulah inun sa nahuyu kami ma naun.

⁵Mudahan Tuhan nguruk ngajar naun nampan magin kataru sa Alatalla sinta naun nelang Kristus ngami kasabaren ma naun.

⁶Pulaksanai katuluh, makai kuasa Tuhan Yesus Kristus, kami marentah nampan naun nyanawit katuluh pulaksanai, sa welum mawule, nelang sa puang ngalut kawan ajaran sa naami kami ma here.

⁷Naun raerai karasa naun harus ngalut suntu kami. Kami puang mawule tawuk kami naan hang penah naun.

⁸Kami puang nguta kutaen ulun anri puang bayar. Kabalikanni kaanrau kamalem kami bagawi mepai uat taulang nampan kami puang nyusah hie-hie teka naun.

⁹Kami ngulah kala yiru puang daya kami puang uweng hak ilaku nampan naun ngarawah kami, kude daya kami hamen jari suntu ma naun.

¹⁰Hang tawuk kami pagun naan hang penah naun, kami ngami aturan kalayiti, “Ulun sa puang hakun bagawi, puang usah kuman.”

¹¹Kami ngeau yiti daya kami karengei naan kawan ulun hang penah naun sa welum mawule. Here puang ngulah inun heneng, ekatni sibuk umba sampur urusan ulun lain.

¹²Makai kuasa Tuhan Yesus Kristus kami marentah ulun yiru nelang ngami paringatan, nampan here bagawi anri sanang nelang ngantara nafakah here raerai.

¹³Kude naun ada peda ngulah hal sa maeh.

¹⁴Tau die naan ulun sa puang hakun ngalut inun sa naeau kami hang surat yiti. Ware naun hati-hati nadap ulun sa kalayiru nelang ada bagaul anri hanye nampan hanye amangan.

¹⁵Kude ada ngulah hanye kala musuh; ekat ami ma hanye nasehat yalah erang kaulun pulaksanai.

¹⁶Tuhan hanyeyiru putut kasanangen takam. Mudahan hanye saratang ngami ma naun kasanangen hang katuluh hal. Mudahan Tuhan nyinrah naun katuluhni.

¹⁷Tabe teka aku, Paulus. Aku raerai sa nulis bagian yiti. Iti siri sa na andakku hang katuluh suratku.

¹⁸Mudahan Tuhan takam Yesus Kristus mamberkat naun katuluhni. Hormat kami, Paulus