Read Ma'anyan 1 TIMOTIUS 1 Bible Online

1 TIMOTIUS 1 - Ma'anyan bible

1 TIMOTIUS 1

¹Timotius, anakku sa sajati hawuang Tuhan! Surat yiti teka aku, hi Paulus, rasul Kristus Yesus manyu parentah Alatalla, Panyalamat takam nelang manyu parentah Kristus Yesus, kaharapen takam. Mudahan Alatalla Ambah anri Kristus Yesus Tuhan takam ngami berkat, ahi lelo nelang kasanangen ma hanyu.

³Aku hamen nampan hanyu tatap muneng hang Epesus, kabahumenku yiru haut waraku ma hanyu tawuk aku tulak ma Makedonia. Daya, hang Epesus naan papire kaulun sa ngajar ajaran sa puang bujur, nelang hanyu harus nyantaduh here yiru ngajar.

⁴Ami nasehat ma here nampan here ada lagi parisaya ma kawan dongeng anri kawan sarita sanyarita kawan asal usul puang witus-wuta. Katuluhni yiru ekat nimbul pirawekan nelang puang nampalus ransana Alatalla sa ekat tau napantaru itetei parisaya ma hanye.

⁵Tujuan nasehat yiru, hanyeyiru nampan ulun kaiyuh atei sa maeh nelang atei maeh sa barasis, nelang tuu parisaya ma Tuhan, nelang anri kalayiru here tau sinta ma sasameh murunsia.

⁶Naan meheni ulun haut puang welum kalayiru lagi, nelang tawang hawuang kawan pirawekan sa puang uweng riranni.

⁷Here hamen jari kawan guru agama, padahal here raerai puang kataru kawan lengan sa napakai here atawa kawan hal sa nawara here anri kaharapen.

⁸Takam karasa kawan hukum agama yiru maeh, amun napakai manyu pipatutni.

⁹Patut naitung hukum yiru naulah batantu puang neu ma kawan ulun sa maeh, malengkan ma kawan ulun sa malangar hukum, ma kawan panjahat, ulun duruhaka, ma ulun badosa, ulun puang baagama, ulun duniawi, ma ulun sa munu ambah atawa inehni, ma katuluh sa pamunu ulun,

¹⁰ma kawan ulun idapa ibela, homoseks, panculik, mapusu, kawan saksi palasu nelang ma hie-hie sa ngulah kawan hal sa balawanan anri ajaran sa bujur.

¹¹Ajaran yiru naan hang Kabar Maeh sa neu pakai iwarani naparisaya ma aku, hanyeyiru Kabar Maeh teka Alatalla sa mulia nelang patut natawat.

¹²Aku ngantuh tarima kasih ma Kristus Yesus Tuhan takam. Hanye haut ngami kakuaten ma aku nampan malayanni hanye, nelang hanye nganggap aku patut nampalus tugas yiru,

¹³biar dahulu hie aku muntaka nelang ngahanangen nelang mahina hanye. Kude Alatalla malelo aku, daya hang tawuk yiru aku huan parisaya, jari aku puang karasa inun sa naulahku.

¹⁴Kude aku likan natampenu anri ahi lelo Tuhan takam. Hanye ngami ma aku kamampuan nampan parisaya ma hanye nelang sinta sasameh murunsia. Kamampuan yiru naami ma takam katuluh sa haut jari isa anri Kristus Yesus.

¹⁵Lengan yiti tuu bujur — daya yiru patut natarime nelang naparisaya katuluhni — : “Kristus Yesus hawi ma dunia yiti nampan nyalamat ulun badosa.” Nelang aku ulun badosa sa panga jahat.

¹⁶Kude likan daya yiru Alatalla malelo aku, nampan Kristus Yesus kaiyuh nantarang katuluh kasabarenni ma aku, ulun sa panga badosa yiti. Nelang yiti jari isa suntu ma katuluh ulun sa yati sagar parisaya ma hanye nelang kaiyuh pamelum sajati ma kalalawah.

¹⁷Alatalla, Raja kawan wayah nelang jaman, patut saratang nahormat nelang natawat, daya hanye sa kalalawah, sa puang dinung nelang sa tungkan! Amen.

¹⁸Timotius, anakku! Tugas yiti naparisayaku ma hanyu, daya ngitung pesen Alatalla sa natahampe itetei kawan nabi hawuang ungkup neu dirinu. Ware kawan pesen yiru jari wasi ma hanyu hang wuang parjuangan sa maeh.

¹⁹Ware hanyu bajuang sinrah itegei hang kaparisayaan sa bujur nelang anri atei maeh sa barasis. Naan papire kaulun sa puang paduli lengan kunuan ateini, hampe kaparisayaan here balalu hansur.

²⁰Hengka here yiru hanyeyiru hi Himeneus anri hi Aleksander. Karueh ulun yiru haut hukumku anri nyarah here ma Iblis, nampan here paajar nampan taduh nangkurun Alatalla.