Read Ma'anyan 1 TIMOTIUS 2 Bible Online

1 TIMOTIUS 2 - Ma'anyan bible

1 TIMOTIUS 2

¹Samambatang, aku ilaku tatuu nampan pilakuan, sumbayang, anri doa syafaat nelang lengan tarima kasih sa natahampe ma Alatalla anri ma katuluh ulun;

²ma kawan raja anri ma katuluh ulun sa negei kuasa. Laku nampan takam welum damai ma Alatalla anri tingkah laku sa maeh.

³Yiru sa maeh nelang sa ngampi sanang atei Alatalla, jurusalamat takam.

⁴Hanye hamen nampan katuluh ulun nasalamat nelang karasa sa bujur.

⁵Daya, ekat naan isa Alatalla, nelang ekat isa ulun helang, helang Alatalla anri murunsia, hanyeyiru Kristus Yesus.

⁶Hanye erang kaulun murunsia sa haut nyarah tengani pakai newuh katuluh ulun teka kawan dosa here. Anri kalayiru Alatalla nantarang hang wayah sa pas tuu, hanye hamen katuluh ulun nasalamat.

⁷Nelang daya yiru aku nahuyu tulak ma kawan ulun sa puang Yahudi nampan iwara ma here kabar neu kaparisayaan sa bujur. Sa nawaraku yiti, yiru bujur. Aku puang ipusu.

⁸Aku hamen nampan kawan upu hang awe-awe badoa anri atei sa barasis, puang sangit nelang puang uweng basual.

⁹Ware kawan wawei maradu tengani anri sasadang wangun nelang makai pakaian sa pantas. Wangun hurutan wulu puang hampe balabihan wangun atawa ada makai kawan parhiasan amas atawa mutiara, atawa kawan pama pakaian sa rarang.

¹⁰Kabalikanni, ware kawan wawei mahias tenga here makai kawan ulahan sa maeh manyu patut ma ulun wawei sa sumbayang ma Alatalla.

¹¹Pipatutni kawan wawei paajar anri suni nelang ngalut nuu anri babujur.

¹²Aku puang katuju wawei ngajar atawa marentah ulun upu; here harus suni.

¹³Daya sa samambatang naulah hanyeyiru hi Adam nelang udi yiru hi Hawa.

¹⁴Nelang puang hi Adam malainkan hi Hawa sa wuah tipu, hampe malangar parentah Alatalla.

¹⁵Biar kalayiru, wawei sagar salamat gana ngayaan anak, asal hanye anri randah atei tatap parisaya ma Kristus nelang tatap sinta ma ulun lain nelang welum hulung ma Alatalla.