Read Ma'anyan 1 TIMOTIUS 4 Bible Online

1 TIMOTIUS 4 - Ma'anyan bible

1 TIMOTIUS 4

¹Roh Alatalla anri putes kaeau hang kawan anrau hanrian, meheni ulun sagar marutad, puang mangaku Kristus. Here sagar ngalut nuu ma kawan roh sa nyantawang nelang ngalut kawan ajaran roh jahat,

²sa natahampe mitah kawan ulun pura-pura sa ipusu. Atei kunuan kawan ulun yiru haut maieng.

³Here ngajar ulun nampan puang kawin nelang puang nguta kutaen sa bapidi. Padahal kutaen yiru naulah daya Alatalla neu nakuta anri ngantuh tarima kasih ma hanye daya kawan ulun sa parisaya ma Kristus nelang haut kataru ajaran sa bujur teka Alatalla.

⁴Ala katantuluh sa naulah daya Alatalla yiru maeh, nelang puang uweng sunah isa harus naanggap padi [haram] amun haut natarime anri ngantuh tarima kasih ma Alatalla.

⁵Daya berkat teka Alatalla nelang doa ngulah kutaen yiru jari halal.

⁶Amun hanyu ngajar alakatantuluh yiru ma kawan pulaksanai sa mira kaparisayaan, hanyu sagar jari palayan Kristus Yesus sa bagawi anri maeh. Nelang hanyu sagar saratang malihara batinnu makai lengan Alatalla sa naparisaya, nelang anri kawan ajaran sa bujur sa haut napalupuinu salawah yiti.

⁷Sanawit kawan sarita tahayul sa puang bariran. Ware hanyu malatih tenganu ma pamelum sa baibadat.

⁸Latihan jasmani duhu rinanni, kude latihan rohani bariran hang katuluh hal, daya uweng janji ma pamelum hang wayah itati nelang hang wayah hanrian.

⁹Hal yiru bujur nelang patut natarime nelang naparisaya katuluhni.

¹⁰Yiru sababni takam bajuang nelang bagawi bahimat, daya takam harap anri sagalisni ma Alatalla sa welum; hanyeyiru jurusalamat katuluh ulun, samambatang tuu kawan ulun sa parisaya.

¹¹Ajar yiru katuluhni nelang huyu ulun rama ngalutni.

¹²Ada maladar sunah erang kaulun nganggap hanyu randah daya hanyu lagi iya. Kabalikanni, ware hanyu jari suntu ma kawan ulun sa parisaya hawuang paner-gamungan anri tingkah lakunu, hang sara hanyu sinta sasameh murunsia nelang parisaya ma Yesus Kristus, nelang anri pamelumnu sa paruna.

¹³Kamulek, padingian hampe aku hawi die, hanyu harus bahimat mambasa Surat Barasis ma kawan ulun yiru nelang ngami samangat sinrah ngajar here.

¹⁴Ada hanyu puang makai pangamian teka Alatalla sa naami ma hanyu hang tawuk kawan pamimpin ungkup hanrapak tangan here hang ambau ulunu, nelang kawan nabi nampe pesen Alatalla neu dirinu.

¹⁵Ulah katuluhni yiru anri bahimat nampan kamajuannu nadinung daya ulun katuluh.

¹⁶Jaga dirinu nelang jaga ajarannu. Ware hanyu satia nampalus katuluh yiru, daya anri kalayiru hanyu sagar nyalamat hau tenganu raerai atawa kawan ulun sa nyanrengei lengan ajarannu.