Read Ma'anyan 1 TIMOTIUS 5 Bible Online

1 TIMOTIUS 5 - Ma'anyan bible

1 TIMOTIUS 5

¹Ada hanyu tamam nyangit ulun sa labis matueh teka hanyu malengkan insing hanye nyanrengei kawan lengannu kakala hanye ambahnu. Ulah kawan ulun sa iya yalah pulaksanainu,

²nelang kawan wawei matueh yalah inehnu. Kawan wawei bujang yalah kawan andinu, anri sara sa maeh.

³Hormat kawan wawei walu sa tuu-tuu welum raerai.

⁴Kude amun erang kaulun wawei walu naan kawan anak atawa kawan umpu, here yiru sa mambatang harus naami pangaturen neu here sa patut mantaru wangun kawan ungkup bemehni, nelang iwaleh budi ulun matueh atawa itak here. Daya hal yiru ngampi sanang atei Alatalla.

⁵Wawei walu sa tuu-tuu welum raerai, nelang puang uweng hie-hie sa tau kaiyuh malihara hanye, ekat baharap ma Alatalla. Kaanrau kamalem hanye saratang badoa ma Alatalla nampan ilaku pangarawahenni.

⁶Kude wawei walu sa katuju welum irarami, hanye haut matei biar hanye pagun welum.

⁷Tahampe ma here kawan patitah yiti, nampan here welum puang uweng wadaanni.

⁸Kude amun naan ulun sa puang malihara kawan kula kadangni, labis likan kulawaraga raerai, ulun yiru marutad nelang labis bere teka ulun sa puang parisaya.

⁹Ekat wawei walu sa sukup kawan syarat kalayiti iyuh natamasuk mawuang daftar kawan wawei walu; umurni harus puang kurang teka enempulu taun, hanye ekat suah hinra narangan.

¹⁰Taru ulun yalah wawei sa ngulah kawan hal sa maeh, umpamani: haut nante-ngambau kawan anakni anri maeh, katuju narime tamu manginap hang lewuni, malayanni kawan ulun sa parisaya, ngarawah kawan ulun sa susah, nelang bagawi bahimat hawuang katuluh masam pagawian sa maeh.

¹¹Ada namasuk ma daftar yiru kawan wawei walu sa lagi iya, daya amun nanam kabahirien magin tamam, here hamen narangan lagi, nelang nanan Kristus.

¹²Here hala daya puang nampalus janji sa naami ma hanye.

¹³Kamulek here pada ngumpe anrau malem lepuh ganta maaru-maati. Nelang sa bere tatuu hanyeyiru here paajar nangkurun ngaran ulun lain nelang sampur urusan ulun lain nelang maner kawan hal sa puang patut napaner.

¹⁴Daya yiru aku hamen nampan kawan wawei walu lagi iya narangan lagi, kaiyuh anak nelang ngurus lewu rean, nampan kawan musuh takam puang uweng kasampatan neu namusuk ngaran takam.

¹⁵Daya naan kawan wawei walu sa haut tawang umba roh jahat.

¹⁶Kude amun erang kaulun wawei Kristen naan kulawaraga walu, hanye harus ngarawah wawei walu yiru; ada maladar ungkup nanggung here. Anri kalayiru ungkup tau ngarawah kawan wawei walu sa budas puang uweng kula kadangni.

¹⁷Pamimpin ungkup sa nampalus tugasni anri maeh, patut naami panghargaan rueh kali lipat, samambatang tuu here sa rajin bakhotbah anri ngajar.

¹⁸Daya hawuang Surat Barasis naan nasurat, “Sapi sa rahat ngiik gandum, ada nakarut wawani”, pada, “Ulun sa bagawi, naan hak narime upani”.

¹⁹Ada narime pangaduan nadap erang kaulun pamimpin ungkup, amun puang uweng saksi sunah rueh kaulun atawa labis.

²⁰Ulun sa ngulah dosa harus natagur hang hadapan katuluh ungkup, nampan kawan ulun sa lain pada takut.

²¹Hang hadapan Alatalla, Kristus Yesus anri kawan malekat sa tapidi, aku ilaku tatuu nampan hanyu makai kawan patitah yiti anri puang uweng dawaan nadap hie-hie nelang puang pada pihak mamihak.

²²Hanyu ada kajut hinang hanrapak tangan hang ambau ulun maresmi pangangkatanni jari palayan Tuhan. Amun ulun lain badosa, ada umba pahawit hawuang dosa yiru. Jaga tenganu nampan tatap paruna.

²³Ada lagi ekat nguut ranu risak, uut pada hena butit anggur pakai ngarawah pancernaannu, daya hanyu gaha sakit-sakitan.

²⁴Dosa mehe ulun, kapihuan naadili, haut dinung anri batantu tuu. Kude dosa ulun lain wau rasa hanrian udiyiru.

²⁵Kalayiru pada kawan ulahan sa maeh palus dinung. Nelang biar sa puang hinang nadinung, sika puang tau lajur padina.