Read Ma'anyan 1 TIMOTIUS 6 Bible Online

1 TIMOTIUS 6 - Ma'anyan bible

1 TIMOTIUS 6

¹Kawan ulun Kristen sa jari walah, harus nganggap tuan here patut nahormat, nampan ulun puang kaiyuh nangkurun ngaran Alatalla atawa pangajaran takam.

²Kawan walah sa tuanni ulun Kristen, puang iyuh ngampahe tuanni daya here sameh ulun Kristen. Likan here patut malayanni tuan here yiru anri labis maeh lagi, daya tuan sa nalayanni anri maeh yiru hanyeyiru sameh ulun parisaya sa nasinta. Hanyu harus ngajar nelang ngami nasehat neu katuluh yiti.

³Hie sa ngajar ajaran lain teka yiru nelang puang katuju anri ajaran sa bujur teka Tuhan takam Yesus Kristus nelang anri ajaran agama takam,

⁴hanyeyiru ulun sakah nelang puang karasa inun-inun! Panyakitni hanyeyiru katuju basual nelang ipamanas neu kawan pangutuhan hampe nimbul kawan kasiwa, pipasahan, puntaka, suriga hal sa puang maeh,

⁵nelang pirawekan sa puang galis-galisni. Sara bapikir kawan ulun yiru haut patitah nelang puang bujur. Here minda tau kaiyuh tatau teka agama.

⁶Samula tuu agama ngami kauntungan sa hante, amun ulun kaingkam sukup anri sa naan hang hanye.

⁷Daya takam hawi ma dunia yitu puang uweng nginsing ala inun-inun, nelang takam kaluar teka dunia puang uweng nginsing ala inun-inun.

⁸Jari amun naan kutaen anri pakaian, yiru haut sukup.

⁹Kude ulun sa hamen tatau, tagoda nelang taawet daya wahai masam kabahirien sa lunga nelang sa nanrusak. Kawan kabahirien yiru ngulah ulun rusak hansur binasa.

¹⁰Daya teka sinta ma duit, hawi wahai masam kajahaten. Naan maheni daya sinta ma duit hampe puang lagi ngalut ajaran Kristen, balalu here wuah wahai kahanangen sa ngampi lenuh atei here.

¹¹Kude hanyu, ulun wat Alatalla, sanawit ala katantuluhni yiru. Ware hanyu ngakali jari ulun sa mawitu bujur hang matei Alatalla, sa nyarah pamelum ma hanye, parisaya ma Kristus, sinta ma sasameh murunsia, sabar hawuang kahanangen nelang maeh tingkah laku anri lamah liut.

¹²Ware hanyu bajuang tatuu nampan welum yalah ulun Kristen nampan hanyu kaiyuh hanrabut hadiah pamelum sajati palus kalalawah. Daya neu yiru sabujurni Alatalla nerau hanyu hang tawuk hanyu mangaku hang hadapan ulun rama sa hanyu parisaya ma Kristus.

¹³Nelang itati, hang hadapan Alatalla sa ngami pahewukan ma alakatantuluh, nelang hang hadapan Kristus Yesus sa ngami kasaksian sa bujur ma hi Pontius Pilatus, aku laku yiti teka hanyu:

¹⁴Ware hanyu ngalut nuu ma katuluh parentah yiru anri maeh nelang puang uweng wadaanni hampe hang anrau Tuhan takam Yesus Kristus hawi kamulek.

¹⁵Pihawianni sagar natukas hang wayah sa pas tuu daya Alatalla raerai. Hanye panguasa sa tungkan; hanye mulia, Raja katuluh kawan raja, nelang Tuhan katuluh kawan tuan.

¹⁶Ekat hanye sa puang nakuasa daya pampatei; hanye welum hang wuang sahaya sa puang kaiyuh nasanrite daya hie-hie. Puang uweng erang kaulun murunsia sa suah kadinung hanye atawa kaiyuh ninung hanye. Ma hanye hormat nelang kuasa palus ma kalalawah! Amen.

¹⁷Ma kawan ulun sa tatau hang dunia yiti, ware hanyu ilaku nampan here ada sakah nelang ada harap ma kawan banda sa puang tatap — umpamani anri katatauen. Here harus harap ma Alatalla sa ngami alakatantuluh ma takam anri jubung nampan takam tau nguta makaini.

¹⁸Laku ma here nampan nantarang pikaeh, anri wahai ngulah ala maeh, matau, maeh atei nelang katuju ngami.

¹⁹Anri kalayiru here ngumpul harata sa jari modal sa maeh ma hanrian anrau. Nelang anri kalayiru here sagar kaiyuh pamelum sa kalalawah, hanyeyiru pamelum sa sajati.

²⁰Inun sa haut naparisaya ma hanyu, jaga yiru mamaeh, Timotius! Sanawit kawan papaneran sa puang bariran nelang basual neu kawan hal sa anri kaliru naantuh “Pangarasaen”.

²¹Daya naan kawan ulun sa kaeau here naan pangarasaen yiru, hampe tawang teka kawan ajaran Kristen sa naparisaya here dahulu hie. Mudahan Tuhan mamberkat naun katuluh. Hormat kami, Paulus