Read Ma'anyan 2 TIMOTIUS 2 Bible Online

2 TIMOTIUS 2 - Ma'anyan bible

2 TIMOTIUS 2

¹Timotius, anakku! Wuah hanyu mansing daya ahi lelo sa naami ma takam, daya takam mira baya anri Kristus Yesus.

²Lengan ajar sa dahulu hie haut rengeinu teka aku hang hadapan ulun rama wuah hanyu parisaya anri kawan ulun sa iyuh naparisaya nelang sa sakap ngajar ulun lain.

³Hanyu harus umba nanggung kahanangen yalah prajurit Kristus sa satia.

⁴Erang kaulun prajurit sa rahat batugas, puang sagar ngampi sibuk dirini anri kawan urusanni raerai, daya hanye hamen ngampi sanang atei panglimani.

⁵Erang kaulun olah ragawan puang sagar jari juara hawuang isa partandingan, amun hanye puang ngalut nuu kawan paraturan.

⁶Ulun pangume sa haut bagawi bahimat, hanye sa samambatang naan hak kaiyuh hasil teka kawan amuleanni.

⁷Pikir mamaeh inun sa naeauku yiti, daya Tuhan sagar ngami ma hanyu kasanggupen pakai mantaru katuluhni yiru.

⁸Itung yiti: Kabar Maeh sa nawaraku hanyeyiru Kabar neu Kristus Yesus, turunan Dawid; Hanye Kristus sa haut welum mulek teka pampatei.

⁹Daya iwara Kabar Maeh yiru, aku wuah kahanangen; likan hampe narantai kala erang kaulun panjahat. Kude lengan Alatalla puang tau narantai.

¹⁰Yiru sababni aku sabar nanggung katuluh yiru daya ma kaparluan kawan ulun sa haut napidi daya Alatalla, nampan here pada kaiyuh salamat sa haut naami itetei Kristus Yesus, nelang nasinrah anri pihante mulia sa ma kalalawah.

¹¹Wuah tuu lengan yiti, “Amun takam haut matei baya hanye, takam welum pada baya hanye.

¹²Amun takam tatap sabar, takam pada sagar marentah baya hanye. Amun takam puang mangaku hanye, hanye pada sagar puang mangaku takam.

¹³Amun takam puang satia, hanye tatap satia, daya hanye puang tau balawanan anri dirini raerai.”

¹⁴Wuah hanyu ngampi itung kawan ulun neu alakatantuluhni yiti. Hang hadapan Alatalla, ami nasehat ma here nampan here ada basual neu kawan pangatuhan. Yiru puang uweng riranni, likan nyanrawek kawan ulun sa nyanrengeini.

¹⁵Wuah hanyu ngakali tatuu nampan nakaku daya Alatalla yalah ulun sa patut bagawi ma hanye. Wuah hanyu ngakali nampan hanyu puang amangan neu pagawiannu, malengkan ngajar anri maeh kawan ajaran sa bujur teka Alatalla.

¹⁶Sanawit kawan papaneran sa puang uweng riranni nelang sa ngampahe Alatalla. Kawan papaneran sa kala yiru ekat ngulah ulun magin jahat.

¹⁷Ajaran kawan ulun yiru ilansar yalah panyakit kanker sa ganas. Teka here tamasuk hi Himeneus anri hi Filetus.

¹⁸Here haut tawang teka kawan ajaran sa bujur, nelang ngasasaur kacau kaparisayaan mehe ulun. Here kaeau kaelanen teka pampatei haut tarjadi.

¹⁹Kude piduduk sa segah sa haut naulah daya Alatalla puang tau nagaguyuh. Hang ambauni naan nasurat kalayiti, “Tuhan kataru kawan ulun sa jari milikni”, nelang “ulun sa kaeau hanye milik Tuhan, ulun yiru harus taduh nampalus gawian sa hala.”

²⁰Hawuang lewu sa hante naan wahai masam parabot. Naan sa naulah teka perak atawa amas, kude naan pada sa naulah teka kayu atawa tane. Naan sa napakai ma kaparluan sa hulung, nelang naan pada sa napakai ma kaparluan biasa.

²¹Ulun sa ngabarasis dirini teka hal sa jahat, ulun yiru sagar napakai ma kaparluan sa hulung. Hanye jari milik sa hulung nelang bariran ma tuanni. Hanye natatap neu napakai ma tiap pagawian maeh.

²²Sanawit kawan kahamenen ulun iya muda. Wuah hanyu ngakali nampan welum manyu kabahumen Alatalla, satia hang ajaranni nelang sinta ma sasameh murunsia, nelang naan kadamaian atei. Wuah hanyu welum kalayiru baya here sa nanterau ilaku karawahen teka Tuhan anri atei sa barasis.

²³Ada hanyu umba hawuang pirawekan kawan ulun lunga sa puang karasa inun heneng. Hanyu karasa katuluh yiru ekat ngulah pibaburan.

²⁴Ulun sa bagawi ma Tuhan puang patut basual; hanye harus ramah anri ulun katuluh, nelang kaiyuh ngajar ulun anri maeh nelang sabar.

²⁵Hanye harus lamah liut ngajar kawan ulun sa katuju nawan; mudahan Alatalla ngami kasampatan ma kawan ulun yiru nampan batobat teka kawan dosa here nelang kataru ajaran sa bujur.

²⁶Anri kalayiru here balalu kataru kamulek, nelang lepah teka jabak Iblis sa haut nuruk here nelang maksa here nampan ngalut kabahumenni.