Read Ma'anyan 2 TIMOTIUS 3 Bible Online

2 TIMOTIUS 3 - Ma'anyan bible

2 TIMOTIUS 3

¹Itung yiti: Hang kawan anrau pijumpuhan sagar naan wahai kasusahen.

²Murunsia sagar ekat mamikir dirini raerai, mata duitan, sakah nelang katuju ipusu. Here katuju ngawawarah ulun, nawan ulun matueh, puang kataru batarima kasih, nelang muar ma kawan hal sa rohani.

³Here puang sinta anri sasameh murunsia, puang hamen ngampun, here katuju nangkurun ngaran ulun lain, katuju makai kakarasen, here maraat, nelang puang katuju ma pikaeh.

⁴Here katuju sulas duruhaka, sakah nelang puang ambau pikiran. Here labis katuju ma kasanangen dunia teka ngalut kabahumen Alatalla.

⁵Biar nadinung, here ngalut nuu nampalus kawajiban agama, kude here puang narime inti teka agama yiru. Sanawit tenga teka ulun sa kalayiru.

⁶Naan teka here sa ikalihik masuk ma lewu, balalu mamikat kawan wawei sa maleme nelang badosa sa nakuasa daya masam-masam kabahirien.

⁷Kawan wawei yiru saratang laku naajar, kude puang suah tau kataru ajaran sa bujur teka Alatalla.

⁸Kala hi Yanes anri hi Yambres sadi nawan hi Moses, kalayiru pada kawan ulun yiru nawan ajaran teka Alatalla. Pikiran here haut rusak, nelang kaparisayaan here mahak.

⁹Kude here puang sagar kaiyuh inun-inun, daya panunga here sagar rasa katuluh ulun, kala sa naingkam daya Yanes anri hi Yambres.

¹⁰Kude hanyu haut makai kawan ajaranku, pidasaranku, anri tujuan pamelumku. Hanyu haut kadinung kalaawe aku tuu-tuu parisaya ma Yesus Kristus nelang sinta ma sasameh murunsia. Hanyu karasa pada kasabaren nelang kakansingenku.

¹¹Hanyu haut kadinung aku nasiksa nelang aku nanggung kahanangen. Hanyu karasa katuluh kajadian sa wuah aku hang Antiokhia, hang Ikonium, anri hang Listra; nelang hanyu karasa katuluh kahanangen wuah aku! Kude Tuhan nyalamat aku teka katuluhni yiru.

¹²Samula katuluh ulun sa hamen welum baibadat nelang welum mira baya anri Kristus Yesus sagar wuah kahanangen,

¹³kude kawan ulun sa jahat anri kawan ulun panipu sagar magin batambah jahat. Here nipu ulun lain padahal here raerai tatipu pada.

¹⁴Kude neu hanyu, Timotius, ware hanyu tatap itegei hang kawan ajaran sa haut naajar ma hanyu nelang katuluhni naparisaya dayanu; daya hanyu karasa hie kawan gurunu.

¹⁵Hanyu harus kaitung kalemah teka rumis hanyu haut kataru Surat Barasis. Surat Barasis yiru ngami ma hanyu kaharatien-kataruen nampan kaiyuh salamat itetei parisaya ma Yesus Kristus.

¹⁶Katuluh sa nasurat hawuang Surat Barasis, nailham daya Alatalla nelang bariran pakai ngajar sa bujur, pakai nagur, nelang nyamuah sa hala, nelang pakai ngajar murunsia nampan welum ngalut kabahumen Alatalla.

¹⁷Makai Surat Barasis yiru ulun sa malayanni Alatalla kaiyuh nasansukup anri paruna ma katuluh masam pagawian sa maeh.