Read Ma'anyan 2 TIMOTIUS 4 Bible Online

2 TIMOTIUS 4 - Ma'anyan bible

2 TIMOTIUS 4

¹Kristus sagar hawi lagi ma dunia yiti lepuh mangadili kawan ulun welum, ulun matei; nelang hanye sagar hawi nampan marentah yalah Raja. Daya yiru aku ilaku tatuu anri hanyu hang hadapan Alatalla nelang Kristus Yesus:

²Ware hanyu iwara Kabar teka Alatalla yiru, nelang saratang nuntut nampan ulun nyanrengeini, hau here hamen atawa puang. Ware hanyu ngampi harap tatuu ulun, nutui kahalaen, nelang ngami samangat ma here. Ajar ulun anri sabar.

³Daya sagar hampe wayahni ulun puang hakun lagi narime pangajaran sa bujur. Kabalikanni, here makai kabahumen here raerai, nelang ngumpul rama guru nampan ngajar kawan hal sa marauh nasanrengei hang silu here.

⁴Here sagar nutup silu puang hakun nyarengei sa bujur, kude sagar nyanrengei kawan tanuhui usu.

⁵Kude biar kalayiru, hanyu harus nguasa dirinu hawuang kaadaan sa kalaaweleh. Sabar hawuang kahanangen, tampalus tugasnu yalah pambarita Kabar Maeh yiru, nelang tampalus mamaeh kawajibannu yalah palayan Alatalla.

⁶Neu diriku, haut hampe wayahni aku sagar matei yalah parapah ma Alatalla. Puang lawah lagi aku sagar nanan dunia yiti.

⁷Aku haut umba partandingan anri maeh tatuu, nelang haut hampe garis tikasni. Aku tatap satia ma Kristus hampe pijumpuhanni.

⁸Nelang itati hadiah kamanangen nganrei aku. Hang Anrau Kiamat, Tuhan, Hakim sa adil yiru sagar nyarah hadiah yiru ma aku, daya aku haut welum ikaeh anri Alatalla. Nelang puang ekat aku raerai sa sagar narime hadiah yiru, kude pada katuluh ulun sa nganrei pihawian Tuhan anri kakunus kasungu.

⁹Ware hanyu ngakali hawi nunung aku anri hinang,

¹⁰daya hi Demas haut nanan aku daya hanye sinta dunia yiti. Hanye tulak ma Tesalonika. Hi Krekes tulak ma Galatia nelang hi Titus ma Dalmatia.

¹¹Ekat hi Lukas sa muneng baya aku. Alap hi Markus nelang insing hanye sinrah hanyu, daya hanye tau ngarawah hawuang pagawianku.

¹²Aku haut nunyu hi Tikhikus tulak ma Epesus.

¹³Amun hanyu hawi insing mantel sa tananku hang Troas hang lewu Karpus. Insing pada kawan bukuku, samambatang kawan buku sa naulah teka karatas kulit.

¹⁴Hi Aleksander, tukang tamaga yiru haut ngulah gawian sa jahat tatuu nadap aku. Tuhan sagar iwaleh ma hanye manyu gawini.

¹⁵Hanyu harus hati-hati anri hanye, daya hanye bahimat nawan kabar sanawara takam.

¹⁶Hang tawuk aku palanungkai kali nampe pambelaanku, puang uweng sunah erang kaulun sa nengau aku; katuluhni nanan aku. Mudahan Alatalla puang ngampi hala here hang hal yiti!

¹⁷Kude Tuhan nengau aku. Hanye ngami kakuaten hampe aku sanggup iwara katuluh Kabar Maeh yiru, nampan katuluh ulun sa puang Yahudi karengei. Nelang aku lepah teka bahaya pampatei.

¹⁸Tuhan himat sagar nyanepah aku teka tiap ngakali sa jahat nadap aku. Hanye sagar nginsing aku anri salamat mawuang karajaanni hang surga. Ware hanye natawat namulia palus ma kalalawah! Amen.

¹⁹Tabeku ma hi Priskila anri hi Akwila nelang ma kulawaraga Onesiforus.

²⁰Hi Erastus muneng hang Korintus, nelang hi Trofimus haut tananku hang kaadaan sakit hang Miletus.

²¹Ware hanyu ngakali hawi kapihuan musim marisak. Ebulus, Pudes, Linus, anri hi Klaudia ngirim tabe here ma hanyu; kalayiru pada katuluh pulaksanai mira kaparisayaan lainni.

²²Mudahan Tuhan nengau hanyu. Mudahan Tuhan mamberkat pulaksanai katuluh! Hormat kami, Paulus