Read Ma'anyan TITUS 1 Bible Online

TITUS 1 - Ma'anyan bible

TITUS 1

¹Titus anakku! Aku, hi Paulus, nulis surat yiti yalah walah Alatalla nelang rasul Yesus Kristus. Aku napidi nelang nautus nampan ngarawah kawan ulun pidian Alatalla nampan here mansing hawuang kaparisayaan here. Aku pada harus ngarawah here nampan kataru ajaran sa bujur sa naajar daya agama takam.

²Ajaran yiru miandan harapan sa takam sagar narime pamelum sa sajati palus kalalawah. Alatalla haut bajanji neu pamelum yiru dahulu hengka panukuan jaman-nelang Alatalla himat puang suah ipusu.

³Hang wayah sa pas tuu, Alatalla ngalalea janjini yiru hawuang pesenni. Aku haut naparisaya pakai nampe pesen yiru, nelang aku iwara yiru manyu parentah Alatalla Panyalamat takam.

⁴Titus, hanyu tuu-tuu anakku, daya hanyu anri aku sameh-sameh haut parisaya ma Kristus. Aku harap mudahan Alatalla Ambah anri Kristus Yesus Raja Panyalamat takam, ngami berkat nelang kasanangen ma hanyu.

⁵Aku nanan hanyu hang Kreta nampan hanyu kaiyuh ngurus kawan hal sa parlu naatur. Pada nampan hanyu ngangkat kawan pamimpin ungkup hang tiap tumpuk. Nelang itung kawan patitah yiti:

⁶Erang kaulun pamimpin ungkup harus ulun sa puang uweng wadaanni, matueh waweini ekat erang kaulun, kawan iyani harus haut parisaya ma Kristus, puang murun parangai nelang sa puang iyuh naatur.

⁷Pamimpin ungkup hanyeyiru ulun sa ngurus pagawian Alatalla, hanye puang iyuh naan wadaanni. Hanye puang iyuh sakah atawa panyangitan atawa ulun pamahamui, atawa katuju babur, atawa mata duitan.

⁸Hanye katuju narime ulun hang lewuni, katuju ma kawan hal sa maeh, kaiyuh nahan diri, jujur, barasis nelang welum taatur.

⁹Hanye harus mansing itegei hang ajaran sa iyuh naparisaya, kala sa haut naajar ma hanye. Anri kalayiru hanye sanggup ngami nasehat ma ulun miandan ajaran sa bujur, nutui kahalaen kawan ulun sa nawan hanye.

¹⁰Daya rama ulun sa katuju nawan, samambatang kawan ulun sa asalni baagama Yahudi; here ngakal ulun lain anri papaneran here sa puang bujur.

¹¹Kawan ulun sa kalayiru harus natutup wawani, daya here wahai ngasasaur kulawaraga ulun makai kawan ajaran sa puang bujur. Here nampalus hal yiru ekat daya hamen ngantara kauntungan sa puang anri patut!

¹²Suah erang kaulun nabi here raerai, sa asalni pada teka Kreta, kaeau, “Kawan ulun Kreta saratang ipusu nelang kala situa maraat mauruh nelang mawule.”

¹³Inun sa naeau daya nabi yiru samula tuu. Yiru sababni hanyu harus nagur here anri putes; nampan here tatap itegei hang ajaran sa bujur

¹⁴nelang puang lagi itegei hang kawan tanuhui ipusu wat ulun Yahudi atawa kawan aturan sa naulah daya kawan ulun sa puang narime ajaran sa bujur yiru.

¹⁵Ala katantuluh yiru barasis ma ulun sa barasis. Kude ma ulun sa pikiranni bere nelang puang parisaya, puang uweng sunah isa sa barasis, daya pikiran anri kunuan atei here haut bere!

¹⁶Here kaeau here kataru Alatalla, padahal ulahan here puang susuk. Here maka rumanyi, nelang here puang hamen ngalut nuu; here hanyeyiru kawan ulun sa puang sanggup ngulah hal sa maeh.