Read Ma'anyan TITUS 2 Bible Online

TITUS 2 - Ma'anyan bible

TITUS 2

¹Kude hanyu, Titus, ware hanyu ngajar ajaran sa bujur.

²Ami nasehat ma kawan upu sa haut matueh, nampan here nahan diri, bijaksana nelang welum kala ulun sa nahormat. Here harus pada itegei hang ajaran sa bujur teka Alatalla, sinta sa paruna nelang nanggung kahanangen anri sabar.

³Kalayiru pada ware hanyu ngami nasehat ma kawan wawei sa matueh nampan tingkah laku here susuk anri inun sa patut ma ulun sa welum hulung ma Alatalla. Here puang iyuh muntaka ulun lain nelang puang iyuh katagihan minuman keras. Here harus ngajar kawan hal sa maeh,

⁴nampan anri kalayiru here kaiyuh ngajar kawan wawei bujang sa lagi iya nampan sinta ma matueh upu here anri kawan anakni,

⁵bijaksana, welum barasis nelang jari ibu rumah tangga sa maeh tunduk ma matueh upuni. Anri kalayiru puang uweng ulun kaiyuh ngampahe kabar teka Alatalla.

⁶Kalayiru pada, ami nasehat ma kawan ulun sa lagi iya nampan here bijaksana.

⁷Hang ala katantuluh, ware hanyu jari suntu tingkah laku sa maeh. Amun hanyu ngajar, hanyu harus jujur nelang anri tuu-tuu atei.

⁸Pakai kawan lengan sa bijaksana, sa puang tau nawada daya ulun, nampan kawan ulun sa nawan hanyu amangan daya puang uweng hal sa puang maeh sa tau neau here neu takam.

⁹Kawan walah harus tunduk ma tuanni, nelang ngampi sanang atei tuanni hang katuluh hal. Here puang iyuh nawan,

¹⁰atawa ngalat. Ware here nantarang sa here saratang makai lagu lampah sa maeh nelang satia, nampan anri sara here yiru ulun nawat ajaran neu Alatalla, Panyalamat takam.

¹¹Daya Alatalla haut nantarang ahi leloni neu nyalamat katuluh murunsia.

¹²Ahi lelo Alatalla yiru ngajar takam nampan takam puang lagi welum balawanan anri kabahumen Alatalla nelang puang ngalut kabahumen dunia. Takam naajar nampan welum hawuang dunia yiti anri tau nahan diri, tulus nelang satia ma Alatalla.

¹³Itati takam rahat nganrei anrau sa naharap daya takam yiru; hang Anrau yiru dunia sagar kadinung pihante mulia Yesus Kristus, hanyeyiru pihante Alatalla nelang Raja Panyalamat takam.

¹⁴Hanye haut nyarah dirini ma takam nampan nyanepah takam teka kawan kajahaten, palus ngulah takam jari murunsia sa lepah teka dosa balalu jari milikni, nelang rajin ngulah ala maeh.

¹⁵Ajar kawan katuluh yiru, nelang ami nasehat, tagur kawan ulun sa nyanrengei lengannu anri bapangaruh. Ada maladar sunah erang kaulun sa nganggap hanyu randah.