Read Ma'anyan FILEMON 1 Bible Online

FILEMON 1 - Ma'anyan bible

FILEMON 1

¹Pulaksanaiku hi Filemon, tangke nelang hengau kami! Aku, hi Paulus, erang kaulun tahanan daya gana Kristus Yesus, baya anri pulaksanai takam hi Timotius, nulis surat ma hanyu

²nelang ma ungkup sa bakumpul hang lewunu; pada ma pulaksanai takam wawei, hi Apfia anri hengau saparjuangan takam, hi Arkhipus.

³Kami harap mudahan Alatalla Ambah takam anri Tuhan Yesus Kristus ngami berkat nelang kasanangen ma hanyu.

⁴Tiap kali aku badoa, aku ngantuh ngaran Pulaksanai nelang ngantuh tarima kasih ma Alatalla.

⁵Daya aku karengei Pulaksanai tuu-tuu parisaya ma Tuhan Yesus nelang sinta katuluh ulun wat Alatalla.

⁶Aku badoa mudahan takam ipulaksanai yalah kawan ulun perisaya sagar kaiyuh kataruen sa labis hante gana kawan berkat sa namiliki takam daya baya mira anri Kristus.

⁷Pulaksanaiku Filemon, sintanu anri katuluh ulun wat Alatalla, ngampi arai aku nelang ngami samangat ma aku! Katuluh ulun wat Alatalla haut arai daya gana Pulaksanai.

⁸Daya sabab yiru, yalah erang kaulun pulaksanai sa mira kaparisayaan, aku tau marentah hanyu nampan ngulah inun sa harus naulahnu.

⁹Kude daya aku sinta hanyu, aku ekat ilaku. Aku yiti erang kaulun matueh nelang itati rahat natahan hang penjara gana Kristus Yesus.

¹⁰Aku, hi Paulus, nampe isa pilakuan ma hanyu neu hi Onesimus, anakku hawuang Kristus. Daya hawuang panjara yiti aku haut jari ambah rohanini.

¹¹Dahulu hie hanye puang bariran ma hanyu, kude itati hanye bariran, puang ekat ma hanyu, kude ma aku pada.

¹²Itati ulun isa nasintaku yiru aku ngirim mulek ma hanyu.

¹³Sabujurni aku hamen nahan hanye baya aku yalah panganti hanyu, nampan hanye tau mambantu aku, salawah aku natahan hang wuang panjara yiti gana iwara Kabar Maeh teka Alatalla.

¹⁴Kude aku puang hamen ngulah inun-inun amun hanyu huan satuju. Aku sindi tatuu amun hanyu nampalusni anri karelaan ateinu raerai aku puang hamen maksa hanyu.

¹⁵Tau pada hi Onesimus haut bapisah anri hanyu salawah yari nampan hanyu tau kaiyuh hanye lagi ma kalalawahni.

¹⁶Itati hanye puang ekat erang kaulun walah ma hanyu; hanye labis teka yiru. Hanye yiti pada sameh ulun Kristen sa nasinta. Hanye bariran tatuu ma aku, duan likan ma hanyu! Batantu hanye bariran tatuu hau yalah walah hau yalah erang kaulun pulaksanai hawuang Tuhan!

¹⁷Daya sabab yiru, daya hanyu nganggap aku hengaunu sameh Kristen, hayu tarime kamulek hi Onesimus sameh kala hanyu narime aku.

¹⁸Amun hanye hala atawa bautang anri hanyu, elahni aku nanggung katuluhni yiru.

¹⁹Nah, itati elahni aku raerai nyurat lengan yiti; aku hi Paulus sagar bayar katuluhni. (Aku puang parlu ngampi itung neu hanyu raerai uweng utang anri aku, hanyeyiru pamelumnu sa wau yalah ulun Kristen.)

²⁰Daya yiru, demi Tuhan hayu karawah aku, ampiarai ateiku yalah pulaksanai hawuang Kristus.

²¹Aku nulis surat yiti daya aku harap hanyu sagar ngulah inun sa nalakuku. Likan aku karasa hanyu sagar ngulah labis teka yiru.

²²Kamulek, karawah nyadia kamar ma aku hang lewunu, daya aku harap Alatalla mulur doa Kawan pulaksanai katuluh palus nginsing aku mulek nunung naun.

²³Hi Epafras, sa naan baya aku hawuang panjara daya gana Kristus Yesus, ngirim tabe ma naun.

²⁴Tarime pada tabe kawan hengauku: Hi Markus, hi Aristarkhus, hi Demas anri hi Lukas.

²⁵Mudahan Tuhan Yesus Kristus mamberkat naun. Hormat kami, Paulus