Read Ma'anyan IBRANI 1 Bible Online

IBRANI 1 - Ma'anyan bible

IBRANI 1

¹Hang jaman sadi gaha Alatalla bapaner anri datu nini takam mitah kawan nabi anri makai wahai masam sara.

²Kude hang jaman wau yiti hanye bapaner ma takam anri mitah Anakni. Mitah Anakni yiti Alatalla ngulah dunia anri katantuluh hawuangni. Nelang Alatalla haut nukas Anakni yiti pada naan hak kaampun ala katantuluh.

³Hanye sahaya pihante Alatalla sa maraai matalak; hanye gambar sa lentah tuu teka diri Alatalla. Hanye pada sa malihara pibungas dunia anri katantuluh sa hawuangni makai lenganni sa tuu bakuasa. Udi hanye ngami harapan murunsia nampan nasanepah teka kawan dosa here, hanye maharung hang padadusan pamarentahan hang surga baya anri Alatalla, Panguasa sa pangaambauni.

⁴Anak yiru kaiyuh kadudukan lawit labis ambau teka malekat, nelang ngaran sa naami Alatalla ma hanye pada lawit labis nahormat teka ngaran sa naami ma malekat.

⁵Puang suah Alatalla kaeau kalayiti ma sunah erang kaulun malekat, “Hanyu Anakku; hang anrau yiti aku jari Ambahnu.” Puang suah pada Alatalla kaeau kalayiti neu malekat aweleh, “Aku sagar jari Ambahni, nelang hanye sagar jari Anakku.”

⁶Kude hang tawuk Alatalla ngutus Anakni sa taraulu ma dunia yiti, Alatalla kaeau kalayiti, “Katuluh malekat Alatalla harus nyambah Anak yiru.”

⁷Neu kawan malekat, Alatalla kaeau kalayiti, “Alatalla ngulah kawan malekatni jari riwut, nelang kawan palayanni jari lelap apui.”

⁸Kude ma Anakni yiru Alatalla kaeau, “Padadusan, u Alatalla, sagar matuhun hampe kalalawahni! Pamarentahannu samula pamarentahan sa adil.

⁹Hanyu katuju ma kaadilan, kude muar ma sulas duruhaka; yiru sababni Alatalla, Alatallanu, midi hanyu nelang ngami ma hanyu kahormatan sa nginsing kaaraien, labis hengka kawan hengaunu.”

¹⁰Alatalla kaeau pada, “Hanyu, Tuhan, sa asalni ngulah tane, nelang hanyu raerai ngulah langit.

¹¹Katantuluhni yiru sagar wawai, nelang jari uhang kala pakaian; kude hanyu puang sagar baubah.

¹²Dunia anri katantuluh sa hawuangni sagar nalepetnu kala baju, nelang sagar nagantinu makai sa lain. Kude hanyu puang suah sagar baubah, nelang pamelumnu puang sagar jumpuh.”

¹³Alatalla puang suah kaeau kalayiti sunah ma erang kaulun malekat, “Maharung hang tiba kawanku, hampe kawan musuhnu nasantalauku ma hanyu.”

¹⁴Amun kalayiru, inun sabujurni kawan malekat yiru? Here hanyeyiru kawan roh sa malayanni Alatalla, nelang sa nahuyu Alatalla pakai ngarawah kawan ulun sa sagar narime kasalamatan.