Read Ma'anyan IBRANI 11 Bible Online

IBRANI 11 - Ma'anyan bible

IBRANI 11

¹Parisaya baarati harap tatuu neu kawan hal sa naharap, baarati haut naan bawilah neu kawan hal sa puang dinung.

²Daya parisaya, balalu kawan ulun jaman sadi nakatujuen Alatalla.

³Daya parisaya, balalu takam kataru bawilah tuu dunia yiti naulah daya lengan Alatalla; jadi, inun sa tau nadinung yiru, jari teka inun sa puang tau nadinung.

⁴Daya parisaya, hi Habel nyarah ma Alatalla parapah labis maeh teka parapah wat Kain. Daya kaparisayaanni yiru, hi Habel natarime daya Alatalla kala ulun sa maeh, daya bawilah tuu Alatalla narime pangamianni. Hi Habel haut matei, kude daya kaparisayaanni yiru, hanye magun bapaner hampe itati.

⁵Daya parisaya, hi Henokh puang matei, malengkan nainrik palus nainsing nunung Alatalla. Puang sunah erang kaulun kaiyuh panalu hanye, daya hanye haut nainrik daya Alatalla. Hawuang Surat Barasis nasurat, kapihuan hi Henokh nainrik, hanye ngampi sanang atei Alatalla.

⁶Amun puang parisaya, puang sunah erang kaulun tau ngampi sanang atei Alatalla. Daya ulun sa hawi ma Alatalla harus parisaya himat Alatalla naan, nelang Alatalla ngami walehan ma ulun sa ngantara hanye.

⁷Daya parisaya, ma hi Nuah Alatalla iwara neu kawan hal sa sagar jari hanrian, sa puang tau nadinung dayani. Hi Nuah ngalut nuu ma Alatalla hampe hanye ngulah isa kapal sa hanrian karinah neu nyalamat dirini baya kulawaragani. Anri kalayiru dunia nahukum, kude hi Nuah daya gana kaparisayaanni nalalea daya Alatalla yalah ulun sa maeh.

⁸Daya parisaya, hi Abraham ngalut nuu ma Alatalla tawuk Alatalla nerau hanye nelang nunyu hanye tulak ma tane sa najanji Alatalla ma hanye. Balalu hi Abraham tulak anri puang karasa maawe hanye tulak.

⁹Anri parisaya, hi Abraham muneng yalah ulun lain hang tane sa najanji Alatalla ma hanyeyiru. Hi Abraham muneng hang yiru hawuang kemah. Kalayiru pada hi Ishak anri hi Yakub, sa narime janji sa sameh teka Alatalla.

¹⁰Daya hi Abraham ganjah nunup-nganrei tumpuk sa naransana nelang nabangun daya Alatalla anri pondasi sa segah.

¹¹Daya parisaya, hi Abraham tau kaiyuh turunan teka hi Sarah, biar hi Abraham haut matueh tuu, nelang hi Sarah tamanang. Hi Abraham harap Alatalla sagar nampalus janjini.

¹²Biar hi Abraham hang tawuk yiru kala ulun sa haut matei tengani, kude hanye kaiyuh wahai turunan, sa wahaini puang tarareken-kala wahai wawahiang hang langit nelang karasik hang iring pantai.

¹³Katuluh ulun yiru tatap parisaya hampe matei. Here puang narime kawan hal sa najanji daya Alatalla, kude ekat kadinung nelang nyambutni teka lawit. Anri kalayiru here nantarang sa here ulun lain nelang ekat santurui hang ambau tane yiti.

¹⁴Ulun sa kaeau kalayiru anri bawilah nantarang here ganjah ngantara tane ranu sa sagar jari tane ranu here.

¹⁵Puang tane ranu sa haut natanan here yiru sa napikir-nakunu here. Daya amun kalayiru, himat haut wahai kasampatan ma here nampan mulek ma tane ranu yiru.

¹⁶Kude bawilah tuu, here kakunus ngitung isa tane ranu sa labis maeh, hanyeyiru tane ranu sa hang surga. Yiru sababni Alatalla puang umangan amun here ngantuh hanye Alatalla here, daya Alatalla haut nyadia isa tumpuk ma here.

¹⁷Daya parisaya pada, hi Abraham nyarah hi Ishak yalah parapah tawuk hanye nauji Alatalla. Anri hi Abraham Alatalla bajanji, kude hi Abraham rela nyarah anakni sa tungkan yiru.

¹⁸Alatalla haut kaeau ma hi Abraham, “Itetei hi Ishak yiti hanyu sagar kaiyuh turunan sa najanjiku anri hanyu.”

¹⁹Hi Abraham harap himat Alatalla sanggup nyamelum kamulek hi Ishak teka pampatei-jari, iyuh naantuh, hi Abraham haut narime kamulek hi Ishak teka pampatei.

²⁰Daya parisaya, hi Ishak nyanji kawan berkat ma hi Yakub anri hi Esau ma hanrian anrau.

²¹Daya parisaya, kapihuan hi Yakub matei, hanye ngami berkatni ma kawan anak Yosef — anri mihanri hang ulu tungkehni nelang nyambah Alatalla.

²²Daya parisaya, hi Yosef — tawuk kai nanan dunia — bapaner neu kulawaragani ulun Israel sagar kaluar teka Mesir, nelang nanan pesen neu inun sa harus naulah anri bangkaini.

²³Daya parisaya, ulun matueh wat Moses nina hanye telu wulan lawahni udi hanye nakayaan. Here kadinung himat hanye erang kaulun anak sa maeh, nelang here puang takut nawan parentah raja.

²⁴Daya parisaya, hi Moses dami haut hante, puang hamen naantuh anak teka puteri raja Mesir.

²⁵Hanye labis hamen wuah kahanangen baya anri ulun wat Alatalla teka hanye ngingkam kasanangen erang pitus teka welum sa badosa.

²⁶Hi Moses kaingkam lawit labis baharaga hanye naampahe demi Raja Panyalamat sa najanji daya Alatalla yiru teka kaiyuh kawan harata tane Mesir, daya hi Moses baharap upa hang anrau hanrian.

²⁷Daya parisaya, hi Moses nanan Mesir anri puang kaingkam takut nadap kasangiten raja. Hi Moses maju nuju tujuranni kakala hanye haut kadinung Alatalla sa puang dinung yiru.

²⁸Daya parisaya, hi Moses ngulah Paskah nelang marentah nampan ira yiru napalit hang wanawang lewu ulun Israel nampan Malekat Pampatei ada munu kawan anak taraulu here.

²⁹Daya parisaya, kawan ulun Israel kaiyuh nyabarang Laut Merah, kala here takia hang ambau tane sa karing, kude kawan ulun Mesir leteng hang laut yiru, tawuk here mansuba nyabarang pada.

³⁰Daya parisaya, kawan ulun Israel nyanruntun tembuk pagar Yerikho udi here ngalilingni salawah pitu anrau.

³¹Daya parisaya pada, hi Rahab, wawei pandayangan yiru, puang tamput nawunu sinrah anri kawan ulun sa nawan Alatalla; daya hanye maeh narime kawan ulun Israel sa kalati.

³²Nah, aku tauleh puang taduh haut bapaner, kude tawuk puang sukup ma aku. Daya aku huan lagi ngantuh hi Gideon, hi Barak, hi Simson, hi Yefta, hi Dawid, hi Samuel anri kawan nabi.

³³Daya parisaya, here haut nyantalau kawan karajaan. Here nampalus inun sa bujur, hampe narime inun sa najanji daya Alatalla. Here nutup kawan mulut singa,

³⁴nampare apui sa malelap, tasangkilah teka rare pedang. Here maleme, kude jari mansing; here gagah gansang hawuang paparangan hampe nyantalau kawan pasukan bangsa lain.

³⁵Daya parisaya, kawan wawei kaiyuh kamulek kawan ulun here sa haut matei. Naan pada sa rela nasiksa hampe matei, nelang puang hakun nalapas, daya hamen nasamelum kamulek ma isa pamelum sa labis maeh.

³⁶Naan sa nakasese, nawalawas, naawet makai rantai nelang natamasuk mawuang panjara.

³⁷Here napedak makai watu hampe matei, naan sa natetek makai garagaji, nelang nawunu makai pedang. Here maaru-maati makai pakaian teka kudit babiri atawa kudit kambing; here paua, nakahanangen nelang nasiksa.

³⁸Dunia yiti puang unengan sa maeh ma here. Here maaru-maati erang padang gurun, hang kawan bukit, muneng hawuang kawan rungkap watu nelang hawuang kawan liang.

³⁹Tuu leha hanteni kamanangen sa nakaeh daya katuluh ulun yiru gana iman here! Kude here puang narime inun sa najanji daya Alatalla,

⁴⁰daya Alatalla uweng ransana sa labis maeh ma takam. Ransanani hanyeyiru ekat baya anri takam, here sagar jari paruna.