Read Ma'anyan IBRANI 6 Bible Online

IBRANI 6 - Ma'anyan bible

IBRANI 6

¹Daya yiru, hayu takam maju ma kawan pangajaran sa labis ambau neu pidewasa pamelum Kristen, ada ekat mantaru kawan putut ajar agama takam. Ada takam ngalaulek lagi putut ajar neu ulun harus taduh nampalus kawan hal sa puang bariran nelang harus parisaya ma Alatalla,

²atawa putut ajar neu baptisan atawa neu hanrapak tangan hang ambau ulun, atawa neu welum mulek teka pampatei atawa hukuman sa kalalawah.

³Ware takam, amun Alatalla nunyu, maju ma kawan pangajaran sa labis ambau!

⁴Daya, kawan ulun sa haut murtad, puang mamarah tau nakarawah lagi. Here tawuk hie haut naan hawuang piraai teka Alatalla, nelang haut kaingkam pangamianni. Here haut pada umba naparentah daya Roh Alatalla.

⁵Here karasa teka pangalaman here lengan Alatalla yiru maeh, nelang here haut kaingkam kawan pangamian lelo sa penu kuasa teka jaman sa hanrian.

⁶Kude udi yiru here murtad! Puang mamarah here tau nakarawah lagi nampan batobat teka kawan dosa here. Daya here rahat malasangar lagi Anak Alatalla nelang ngulah hanye naampahe hang hadapan ulun rama.

⁷Tane sa nyesep ranu uran sa gaha lawu ma ambauni, balalu ngaluar kawan tanaman sa bariran ma ulun sa ngarajani, tane yiru naberkat daya Alatalla.

⁸Kude amun tane yiru ngaluar rikut padang atawa rikut barunrui, balalu tane yiru puang uweng riranni nelang die sagar nasapa daya Alatalla balalu lawu lawini natutung galis.

⁹Kude Pulaksanai katuluh sa nasinta, biar kami kaeau kalayiru, kude kami harap neu naun. Kami harap naun haut narime kawan hal sa labis maeh, hanyeyiru kawan berkat sa yalah bagian teka salamat naun.

¹⁰Alatalla puang Alatalla sa puang adil. Hanye puang wewung inun sa naulah naun ma hanye, nelang sinta sa natantarang naun ma hanye tawuk ngarawah kawan pulaksanai mira kaparisayaan, tawuk hie nelang itati.

¹¹Kami hamen tatuu nampan naun maisasaan tatap basamangat hampe pijumpuhan, hampe naun narime inun sa kawan naharap naun yiru.

¹²Kami puang hamen naun jari mawule. Kude kami hamen nampan naun welum kala kawan ulun sa narime inun sa najanji Alatalla, daya parisaya ma hanye nelang daya nunup nganrei anri sabar.

¹³Tawuk Alatalla bajanji ma hi Abraham, hanye basumpah hanye sagar nampalus inun sa haut najanjini. Gana puang uweng sa labis ambau teka Alatalla, balalu hanye basumpah hawuang ngaranni raerai.

¹⁴Hanye kaeau, “Aku bajanji sagar mamberkat hanyu nelang ngulah turunan jari hante.”

¹⁵Hi Abraham nganrei anri sabar, balalu hanye narime inun sa najanji Alatalla ma hanye.

¹⁶Amun ulun basumpah, hanye basumpah hawuang ngaran ulun lain sa labis ambau teka hanye, balalu sumpah yiru nyantaduh kawan pipautan.

¹⁷Alatalla nukas ma kawan ulun sa narime janjini, hanye puang sagar ngubah ransanani. Yiru sababni hanye nambah sumpah hang janjini yiru.

¹⁸Rueh hal yiru puang tau baubah: Alatalla puang sagar ipusu neu janji anri sumpahni. Daya yiru, takam sa haut basalindung hang Alatalla, bahimat naami samangat nampan itegei mansing hang kaharapen sa nakansang hang hadapan takam.

¹⁹Kaharapen takam yiru kala jangkar sa tataria lalem tatuu nelang jari pategeian sa mansing nelang aman ma pamelum takam. Kaharapen yiru nebus tenda Ruang Isa Panga Barasis hang Lewu Tuhan hang surga.

²⁰Yesus haut marintis lalan nuju unengan yiru ma takam, nelang haut masuk ma yaru jari Imam Hante takam ma kalalawahni, kala Imam Melkisedek.