Read Ma'anyan IBRANI 8 Bible Online

IBRANI 8 - Ma'anyan bible

IBRANI 8

¹Pokok teka katantuluh papaneran yiti kalayiti: Takam uweng Imam Hante sa kalayiru, sa maharung marentah baya Alatalla sa Panga Hante hang surga.

²Hanye nampalus tugas yalah Imam Hante hang Ruang Panga barasis, hanyeyiru hawuang Kemah Tuhan sa sajati, sa naapinri daya Tuhan, puang daya murunsia.

³Tiap imam hante naangkat pakai nyarah parapah atawa pangamian ma Alatalla. Kalayiru pada Imam Hante takam; hanye harus naan ala inun-inun neu nasarah.

⁴Atikala hanye muneng hang dunia yiti, hanye puang sagar jari imam, daya haut naan imam sa nyarah parapah sa nalaku hawuang hukum agama Yahudi.

⁵Pagawian sa naulah here yalah imam yiru sabujurni ekat isa gambaran nelang piamaan teka inun sa naan hang surga. Yiru haut nawara daya Alatalla ma hi Moses sadi, tawuk hi Moses hamen ngapinri Kemah Tuhan. Alatalla kaeau kalayiti ma hi Moses, “Itung! Katantuluhni yiru harus hanyu ngulah manyu suntu sa natutui ma hanyu hang ambau gunung.”

⁶Kude itati Yesus kaiyuh tugas imam lawit labis mulia teka sa naulah daya kawan imam yiru. Daya janji sa naulahni ma Alatalla anri murunsia, hanyeyiru janji sa labis maeh daya miandan janji ma kawan hal sa labis maeh.

⁷Atikala puang uweng kakurangen hang janji sa palanungkai, himat puang parlu naulah janji sa karueh.

⁸Kude Alatalla haut kahaba kahalaen hang ulun watni, hampe Alatalla kaeau, “Itung sagar naan wayahni, aku sagar ngulah janji sa wau anri bangsa Israel, nelang anri bangsa Yehuda.

⁹Puang kala janji sa naulahku anri datu nini here hang tawuk aku nganyak here kaluar teka tane Mesir. Here puang satia ma janji sa naulahku anri here; yiru sababni aku puang maraduli here.

¹⁰Kude itati, iti janji sa sagar naulahku anri ulun Israel hang kawan anrau sa hanrian, eau Tuhan: Aku sagar ngimpeh hukumku hawuang pikiran here, nelang nyuratni hang atei here. Aku sagar jari Alatalla here, nelang here sagar jari ulun watku.

¹¹Here puang parlu ngajar sasameh waragani, atawa iwara ma pulaksanaini, ‘Pantaru Tuhan.’ Daya here katuluh, hante rumis, sagar kataru aku.

¹²Aku sagar ngampun kawan kahalaen here, nelang puang ngitung lagi kawan dosa here.”

¹³Anri ngami isa janji sa wau, Alatalla ngulah janji sa palanungkai yiru haut lawah nelang uhang; nelang inun sa haut lawah, sagar hinang pada wawai.