Read Ma'anyan YAKOBUS 2 Bible Online

YAKOBUS 2 - Ma'anyan bible

YAKOBUS 2

¹Pulaksanaiku katuluhni! Yalah ulun sa parisaya ma Yesus Kristus, Tuhan Sa Panga Mulia, ada naun mambiah wangun ulun manyu kawan hal sa dinung.

²Daya amun naan erang kaulun tatau makai utas amas anri pama pakaian maeh hawi ma unengan naun bakumpul, kamulek hawi pada erang kaulun paua makai pakaian sitat warat,

³balalu naun labis mahormat ma ulun sa makai pakaian maeh yiru. Naun kaeau ma hanye, “Hayu Tuan maharung hang karusi sa pangamaeh yiti.” Kude ma ulun paua naun kaeau, “Inri hang yiru,” atawa “Harung hang yanai.”

⁴Anri ngulah kalayiru, naun haut mambiah wangun ulun hang penah sasameh naun nelang ngakira ulun manyu pikiran sa puang maeh.

⁵Kawan pulaksanaiku sa nasinta! Itung naun. Kawan ulun sa naanggap paua daya dunia yiti, napidi daya Alatalla nampan jari ulun tatau hawuang parisaya. Kawan ulun yiru sagar jari ulun wat Alatalla kala sa haut najanji Alatalla ma kawan ulun sa sinta hanye.

⁶Kude naun likan ngawawarah ulun paua, padahal kawan ulun tatau sa nindas naun, palus mait naun ma pangadilan!

⁷Here yiru sa ngawawarah ngaran sa panga nahormat sa natarime naun teka Alatalla!

⁸Naun ngulah sa bujur, amun naun nampalus parentah Karajaan sa naan hang ayat Surat Barasis yiti, “Sinta ma sasameh murunsia kala sinta ma dirinu raerai.”

⁹Kude amun naun mambiah ulun manyu kawan hal sa dinung, naun ngulah dosa, nelang hukum Alatalla nantarang naun kawan ulun sa malangar hukum.

¹⁰Ulun sa malangar isa teka kawan parentah Alatalla, baarati hanye malangar katuluh parentah yiru.

¹¹Daya sa kaeau, “Ada ibela,” hanye pada kaeau, “Ada munu ulun.” Jari, biar naun puang ibela, kude munu ulun, yiru naun pada ulun sa malangar parentah.

¹²Ware naun bapaner nelang batindak yalah ulun sa sagar naadili manyu parentah Alatalla sa nyanepah murunsia.

¹³Daya Alatalla puang sagar nantarang ahi lelo ma ulun sa puang kataru ahi lelo. Kude ahi lelo labis segah teka hukuman!

¹⁴Pulaksanai katuluh! Inun riranni ulun kaeau, “Aku ulun parisaya”, amun hanye puang nantarangni makai pagawianni? Inun tau parisaya kalayiru nyalamat hanye?

¹⁵Umpamani erang kaulun pulaksanai upu atawa pulaksanai wawei parlu pakaian nelang puang sukup kutaen ma tiap anrau.

¹⁶Inun riranni naun kaeau ma hanye, “Salamat makai pama pakaian nelang salamat kuman” — amun naun puang ngami ma hanye inun sa naparlu dayani pakai welum?

¹⁷Kalayiru pada anri parisaya, amun puang natantarang makai ulah gawini, maka parisaya yiru puang uweng riranni.

¹⁸Tau pada naan sa kaeau, “Naan ulun sa mihanri hang parisayani nelang naan pada sa mihanri hang pagawianni.” Aku sagar nuing, “Tantarang ma aku kewangun ulun tau naan parisaya anri puang nasinrah sa pagawian kude aku sagar nantarang itetei pagawian aku baparisaya.”

¹⁹Angneh naun parisaya Alatalla ekat isa? Nah, kawan setan pada parisaya nelang here neter takut!

²⁰Naun puang kataru! Inun parlu naami bukti ma naun, samula puang uweng riranni naan parisaya kude puang nasinrah anri pagawian?

²¹Dinung hi Abraham datu nini takam. Hanye natarime anri maeh daya Alatalla daya gana pagawianni, hanyeyiru hang tawuk hanye nyarah hi Ishak, anakni ma Alatalla hang ambau mezbah.

²²Hang yiti bawilah tuu parisaya harus nasinrah anri pagawian nampan jari paruna.

²³Yiru kala lengan ayat Surat Barasis sa kaeau kala yiti, “Hi Abraham parisaya ma Alatalla nelang daya parisayani yiru Alatalla narime hanye yalah ulun sa nampalus kabahumen Alatalla.” Yiru sababni hi Abraham naantuh, “Tangke Alatalla”.

²⁴Bawilah tuu itati, ulun sa natarime anri maeh daya Alatalla gana pagawian sa naulah daya ulun yiru, puang ekat daya parisayani.

²⁵Dinung pada hi Rahab, wawei pandayangan yiru. Hanye natarime anri maeh daya Alatalla daya pagawianni, hanyeyiru hang tawuk hanye narime hang lewuni kawan ulun kalati bangsa Israel palus ngarawah here rari mitah lalan lain.

²⁶Nah, kala wangun tenga amun puang uweng roh, hanyeyiru tenga sa matei, kala yiru pada kaparisayaan amun puang nasinrah anri pagawian, kaparisayaan yiru matei.