Read Ma'anyan YAKOBUS 4 Bible Online

YAKOBUS 4 - Ma'anyan bible

YAKOBUS 4

¹Teka awe asalni kawan pibaburan anri pibantahan hang penah naun? Angneh yiru asalni teka kawan kabahumen naun sa saratang ipanawan hawuang diri naun nampan ngaiyuh kasanangen dunia?

²Naun hamen, kude puang kaiyuh, balalu naun ngunu munu! Naun basamangat, kude puang kahaba inun sa naantara naun, balalu naun basual palus babur. Naun puang kaiyuh inun-inun, daya naun puang ilaku ma Alatalla.

³Atikalani naun haut ilaku, naun sika puang kaiyuh, daya tujuan pilakuan naun hala; inun sa nalaku naun hanyeyiru neu ma kasanangen naun raerai.

⁴Naun hanyeyiru ulun sa puang satia! Inun naun puang karasa amun naun panatangke anri dunia, balalu naun jari musuh Alatalla?

⁵Ada minda Surat Barasis puang uweng sabab kaeau, “Hawuang diri takam Alatalla ngelah roh sa karas kabahumenni.”

⁶Biar kala yiru, ahi lelo Alatalla sa naami ma takam labis mansing teka kabahumen roh takam yiru. Yiru sababni hawuang Surat Barasis nasurat pada, “Alatalla nawan ulun sa sakah, kude kabalikanni sinta ma ulun sa randah atei.”

⁷Daya yiru, ware naun tunduk ma Alatalla nelang nawan Iblis, himat Iblis sagar rari teka naun.

⁸Sanrite Alatalla, himat Alatalla pada sagar nyanrite naun. Barasis tangan naun, pulaksanai sa badosa! Ampijaranis atei naun, naun sa ipaka atei!

⁹Ware naun tuu-tuu manyasal palus nangis nelang nungkau; ware kihi naun jari tangis nelang kaaraien naun jari hanang atei!

¹⁰Ware naun nyanrandah diri naun hang hadapan Tuhan, balalu Tuhan sagar nginrik ngampambau naun.

¹¹Pulaksanai katuluh, ada ipamada atawa ipangampihala. Ulun sa mada atawa ngampi hala pulaksanai sasameh Kristen, hanye mada nelang ngampi hala hukum Alatalla. Nelang amun naun ngampi hala hukum Alatalla, yiru aratini naun puang makai kawan hukum yiru, malengkan jari hakimni.

¹²Padahal ekat isa sa naan hak ngami hukum ma murunsia nelang ngadili murunsia. Hanyeyiru Alatalla sa naan kuasa neu nyalamat nelang ngabinasa. Jari, hie naun yiti, hampe naun ngaheng ngampi hala sasameh naun?

¹³Kawan pulaksanai sa kaeau, “Anrau yiti atawa keatuni kami sagar tulak ma tumpuk atu balalu muneng hang yaru erang taun lawahni neu badagang nelang ngantara duit,” — ware naun nyanrengei patataanku yiti.

¹⁴Inun sa sagar jari anri pamelum naun keatuni, naun raerai sika puang karasa! Naun ekat yalah atuk sa dinung ekat erang pitus, udi hie wawai.

¹⁵Saharusni naun kaeau kalayiti, “Amun Tuhan ngabahumen, kami sagar welum nelang nampalus yiti atawa yiru.”

¹⁶Kude itati naun sakah nelang mapusu. Katuluh lengan naun yiru uras hala.

¹⁷Daya yiru, ulun sa kataru inun sa maeh sa harus naulahni kude hanye puang nampalusni, ulun yiru badosa.