Read Ma'anyan YAKOBUS 5 Bible Online

YAKOBUS 5 - Ma'anyan bible

YAKOBUS 5

¹Pulaksanai katuluh, kawan ulun tatau! Sanrengei patataanku. Ware naun nangis nelang nungkau daya naun sagar wuah kahanangen!

²Katatauen naun haut buruk. Pama pakaian naun haut kuta kametei.

³Amas anri perak naun haut nakalukup daya tagar; tagarni sagar jari saksi neu nawan naun nelang sagar kala apui nguta nangalis tenga naun. Naun haut nuyuk harata hang tiba wayah anrau pijumpuhan.

⁴Naun puang bayar upa ma kawan ulun sa bagawi hang ume naun. Itati rengei lengan wada here! Kawan ulun sa ngumpul hasil ume naun, ngiak laku karawah nelang lengan kiak here haut hampe ma silu Alatalla, Tuhan sa kuasani puang uweng tikas.

⁵Naun haut welum balabihan nelang kaingkam kasanangen hang wuang dunia yiti. Wangunni naun rahat ngampi kunuk tenga naun nadap anrau naun nawunu.

⁶Naun nukum nelang munu kawan ulun sa puang uweng kahalaen, nelang here puang nawan naun.

⁷Daya yiru, pulaksanai katuluhni, ware naun sabar hampe Tuhan hawi. Dinung kewangun sabarni erang kaulun pangume nganrei hampe taneni ngaluar hasil sa baharaga ma hanye. Anri sabar hanye nganrei uran hang musin kayu layar nelang uran hang musim wunge.

⁸Ware naun pada sabar nelang sanang atei, daya anrau pihawian Tuhan haut rupak.

⁹Ada bakutuk nelang ipangampihala, nampan naun puang nahukum daya Alatalla. Itung! Hakim haut rite, haut kai hawi.

¹⁰Pulaksanai katuluh, itung naun kawan nabi sa bapaner hang wuang ngaran Tuhan. Here sabar nelang mansing nanggung kahanangen. Ware naun isuntu hang here.

¹¹Here naantuh sanang daya here mansing. Naun haut karengei neu kasabaren wat Ayub, nelang naun karasa pada kewangun Tuhan lawu lawini mamberkat hanye. Daya Tuhan tuu penu anri ahi lelo nelang maeh atei.

¹²Pulaksanai katuluh, sa mambatang hanyeyiru: ada naun basumpah, hau demi langit, atawa demi tane, atawa demi inunleh. Ware hiai amun kunu aheng naun hiai nelang wara puang amun kunu aheng naun samula puang, nampan naun puang wuah hukum daya Alatalla.

¹³Amun hang penah naun naan ulun sa rahat wuah kasusahen, ware hanye badoa, amun naan sa arai, ware hanye manyanyi nawat Alatalla.

¹⁴Amun naan sa sakit, ware hanye nerau kawan pamimpin ungkup, nelang ware kawan pamimpin yiru badoa ma ulun sa sakit yiru nelang ngusuk minyak ma hanye hawuang ngaran Tuhan.

¹⁵Amun doa here natahampe anri sagalis atei, Tuhan sagar nyamare ulun sa sakit yiru. Tuhan sagar nyamare hanye, nelang ngampun hanye teka kawan dosani.

¹⁶Daya yiru ware naun ipangaku kahalaen nelang sameh badoa, nampan naun nasamare. Doa ulun sa makai kabahumen Alatalla, naan kuasa sa hante.

¹⁷Hi Elia hanyeyiru erang kaulun murunsia sameh kala takam. Hanye badoa anri sagalis atei nampan uran puang lawu, balalu uran puang lawu salawah telu satengah taun.

¹⁸Udi hie hanye badoa lagi, balalu langit nyanawu uran balalu tane ngaluar hasilni.

¹⁹Kawan pulaksanaiku! Amun hang penah naun naan ulun magun puang makai ajaran teka Alatalla, balalu naan ulun lain sa ngulah ulun yiru mulek lagi ma Alatalla,

²⁰itung ayat yiti: Ulun sa ngulah ulun badosa mulek teka lalanni sa hala, ulun yiru nyalamat pamelum ulun badosa yiru teka pampatei nelang ngulah rama ulun badosa naampun. Hormat kami, Yakobus