Read Ma'anyan 1 PETRUS 1 Bible Online

1 PETRUS 1 - Ma'anyan bible

1 PETRUS 1

¹Pulaksanai katuluh ulun pidian Alatalla, sa pasai-pau hang pigauran hang daerah Pontus, Galatia, Kapadokia, Asia, anri Bitinia! Aku, hi Petrus, rasul Yesus Kristus, harap mudahan Alatalla ngami berkat nelang kasanangen sa limpar ma naun. Naun napidi jari ulun wat Alatalla manyu kala ransana Alatalla Ambah. Nelang Roh Alatalla haut nyanyari naun babuhan ulun barasis, hulung ma Alatalla, nampan naun ngalut nuu ma Yesus Kristus nelang nabarasis daya irani.

³Ware takam batarima kasih ma Alatalla, Ambah Tuhan takam Yesus Kristus! Hanye tuu sinta anri takam, yiru sababni hanye ngami ma takam pamelum sa wau, mitah nyamelum kamulek Yesus Kristus teka pampatei. Yiti ngami ma takam kaharapen sa mansing.

⁴Takam harap neu kaiyuh kawan berkat sa nasadia Alatalla ma ulun watni, hanyeyiru kawan berkat sanasimuhni hang surga, sa puang rusak, atawa buruk atawa wadik.

⁵Katantuluhni yiru samula neu ma naun, daya naun parisaya ma Alatalla. Balalu naun najaga makai kuasa Alatalla nampan naun narime salamat sa sadia nalalea hang pijumpuhan alam hanrian.

⁶Daya yiru ware naun arai mihewu, biar itati naun erang pitus harus kaingkam mahanang atei daya naun wuah wahai masam subaan.

⁷Tujuanni hanyeyiru pakai mambukti inun naun tuu-tuu parisaya ma Tuhan atawa puang. Amas sa tau rusak, sika nauji makai apui. Nah, kaparisayaan naun samula labis baharaga teka amas, jari harus nauji pada nampan balalu mansing. Nelang anri kalayiru naun sagar natawat nelang nahormat nelang nainrik ambau hang anrau Yesus Kristus hawi kamulek.

⁸Naun sinta hanye, biar tawuk hie naun puang kadinung hanye. Nelang naun parisaya ma hanye biar itati naun pada puang kadinung hanye. Yiru sababni naun arai mihewu, nelang kaingkam kaaraien sa hante puang taraantuh.

⁹Daya tujuan kaparisayaan naun tuu hampe, hanyeyiru salamat amirue naun.

¹⁰Kasalamatan yitileh sa nataliti nelang nasalidik daya kawan nabi, nelang here maramal neu berkat sa naami daya Alatalla ma naun.

¹¹Here nyalidik kalaawe nelang hentek awe hal yiru sagar jari, sa nabahum daya Roh Kristus sa naan hawuang diri here. Hang tawuk yiru Rohni maramal ma here neu kawan kahanangen sa harus naingkam daya Kristus nelang neu pihanteni sa sagar hawi udi yiru.

¹²Ma kawan nabi yiru Alatalla iwara kawan inun sa naulah here puang ma kauntungan here, malengkan ma naun; hanyeyiru kawan hal sa itati naun haut tarang karengei teka kawan pambarita Kabar Maeh neu Yesus Kristus. Here nampe kawan hal yiru ma naun makai kuasa Roh Alatalla sa nakirimni teka surga. Likan kawan malekat sika sindi pada karasa kabar sa nawara here yiru.

¹³Daya yiru, wuah naun tatap sadia. Hati-hati nelang anri penu kaharapen ma berkat sa sagar naami ma naun hang tawuk Yesus Kristus hawi hanrian.

¹⁴Ware naun ngalut nuu ma Alatalla, nelang ada welum mulur kabahumen naun sa uhang, hang tawuk naun magun huan kataru Alatalla.

¹⁵Kabalikanni, ware naun barasis hawuang ala katantuluh sa naulah naun, sameh kala Alatalla sa nerau naun yiru barasis.

¹⁶Hawuang Surat Barasis nasurat, “Ware naun barasis, daya aku barasis.”

¹⁷Naun ngantuh Alatalla yiru Ambah hang tawuk naun badoa ma hanye. Nah, Alatalla yiru sa mangadili murunsia manyu pagawian maisasaan anri puang pandang bulu. Daya yiru salawah naun magun naan hang dunia yiti, ware naun nawat nante Alatalla hawuang pamelum naun.

¹⁸Naun karasa inun sa haut nabayar pakai nyanepah naun teka pamelum sa kawai tuu eleh sa nawaris daya datu nini naun. Pakai bayarni puang sa tau rusak kala perak atawa amas,

¹⁹malengkan sa tuu baharaga; hanyeyiru diri Kristus raerai, sa jari yalah babiri neu parapah ma Alatalla anri puang uweng nawada atawa bere.

²⁰Kristus napidi daya Alatalla kapihuan dunia naulah. Nelang hang kawan anrau pijumpuhan alam hanrian, hanye hawi ma dunia nampan naun nasalamat.

²¹Itetei hanye naun parisaya ma Alatalla sa haut nyamelum hanye kamulek teka pampatei nelang ngapimulia hanye. Jari, Alatalla sa naparisaya naun nelang ma Alatalla pada naun ngimpeh kaharapen.

²²Daya naun ngalut nuu ma ajaran teka Alatalla, balalu naun ngabarasis tenga diri nelang naun sinta kawan ulun sa sameh parisaya anri sanang atei. Daya yiru, ware naun ipasinta isa anri sa lain anri sagalis atei.

²³Daya itetei lengan Alatalla sa welum nelang sa kalalawah yiru, naun haut naulah jari murunsia wau sa puang nakayaan teka murunsia, malengkan teka Ambah sa kalalawah.

²⁴Hawuang Surat Barasis nasurat kalayiti, “Katantuluh ulun murunsia kala rikut, nelang kawan pihanteni kala wunge rikut. Rikut layu, wungeni balalu ruruh;

²⁵kude lengan Tuhan palus ma kalalawahni.” Lengan yiru Kabar Maeh sa haut nawara ma naun.