Read Ma'anyan 1 PETRUS 2 Bible Online

1 PETRUS 2 - Ma'anyan bible

1 PETRUS 2

¹Daya yiru, umpe teka tenga diri naun ala sa jahat; ada lagi ipusu, nelang ada pura-pura. Ada bahiri, nelang ada ngampahe ulun lain.

²Ware naun jari kala genda sa wau nakayaan, saratang kakan susu rohani sa maeh. Anri kalayiru naun sagar mihante nelang nasalamat.

³Hawuang Surat Barasis nasurat kalayiti, “Naun haut kaingkam leha kaehni Tuhan.”

⁴Daya yiru, ware naun hawi nunung Tuhan. Hanye kala watu sa welum, watu sa naumpe daya murunsia daya naanggap puang bariran; kude sa napidi daya Alatalla yalah watu sa baharaga.

⁵Naun kala kawan watu sa welum. Daya yiru ware naun sadia napakai ngambuan lewu Alatalla sa rohani. Anri kalayiru naun jari kawan imam, sa welum hulung ma Alatalla, nelang itetei Yesus Kristus nyarah ma Alatalla, parapah rohani sa nakatujuen hang atei Alatalla.

⁶Daya hawuang Surat Barasis nasurat kalayiti, “Aku haut midi erang kawuding watu baharaga, sa naimpehku hang Sion jari watu mambatang nelang ulun sa parisaya ma hanye puang sagar puung.”

⁷Watu yiru tuu baharaga ma naun sa parisaya. Kude ma kawan ulun sa puang parisaya, tulus kawan ayat Surat Barasis kalayiti, “Watu sa puang napakai daya kawan tukang bangunan yiru bawilah jari watu sa mambatang tuu,”

⁸nelang “Watu yiru sa ngulah ulun katapian, watu sa ngulah here tumbang.” Here katapian daya here puang parisaya neu lengan Alatalla. Samula kalayiru sa haut natukas daya Alatalla neu here.

⁹Kude naun samula bangsa sa tapidi, kawan imam sa malayanni raja, bangsa sa barasis, hulung ma Alatalla, ulun wat Alatalla. Alatalla midi nelang nerau naun kaluar teka piieng nampan masuk mawuang piraaini sa matalak, anri tujuan nampan naun nampe kabar neu kawan pagawianni sa luar biasa.

¹⁰Dahulu hie naun puang ulun wat Alatalla, kude itati naun samula ulun wat Alatalla. Dahulu hie naun puang nasinta daya Alatalla, kude itati naun narime ahi leloni.

¹¹Pulaksanai katuluh sa nasinta! Naun hanyeyiru ulun lain nelang gagaur hang dunia yiti. Daya yiru aku laku tatuu nampan naun ada ngalut kabahumen kabahirien murunsia sa saratang baparang nawan amirue.

¹²Pidasaran naun hang penah ulun sa puang kataru Tuhan harus tuu-tuu maeh, nampan amun here muntaka naun yalah ulun jahat, here sika harus mangaku pagawian naun sa maeh, hampe here sagar nawat Alatalla hang anrau pihawianni.

¹³Demi Tuhan, ware naun ngalut nuu ma tiap panguasa murunsia; hau ma Kaisar sa jari panguasa mambatang,

¹⁴hau ma gubernur sa natutui daya Kaisar pakai nukum ulun sa ngulah jahat nelang neu mahormati ulun sa ngulah maeh.

¹⁵Daya Alatalla hamen nampan makai kawan pagawian naun sa maeh naun nutup mulut ulun sa budu bapaner.

¹⁶Ware naun welum kala ulun bebas, kude ada makai kabebasan yiru naun nutup kajahaten, malengkan ware naun welum kala walah Alatalla.

¹⁷Hargai katuluh ulun, sinta kawan pulaksanai naun sasameh Kristen. Takut ma Alatalla, nelang hormat Kaisar.

¹⁸Kawan pulaksanai sa jari palayan, ngalut nuu ma majikan naun anri mahormat here puang ekat ma here sa maeh atei nelang patut paner gamungan, kude pada ma here sa maraat.

¹⁹Alatalla sagar mamberkat naun, amun naun kataru nelang nampalus kabahumen Alatalla, sabar ngaret tindakan sa puang adil.

²⁰Daya inun riranni amun naun sabar ngaret hukuman sa harus wuah naun gana kahalaen? Kude amun naun anri sabar nanggung kahanangen sa wuah naun gana pagawian sa maeh, himat Alatalla sagar mamberkat naun.

²¹Neu yiru Alatalla nerau naun. Daya Kristus raerai haut wuah kahanangen ma naun, nelang anri yiru hanye ngami ma naun isa suntu, nampan naun naharak pakiaanni.

²²Hanye puang suah ngulah dosa, nelang puang suah sunah erang kaulun karengei hanye ipusu.

²³Hang tawuk hanye nawawarah natangkurun, hanye puang iwaleh makai ngawawarah nangkurun. Tawuk hanye wuah kahanangen, hanye puang nyapa-nyumpah; hanye ekat manyarah pakarani ma Alatalla, Hakim sa adil yiru.

²⁴Kristus raerai mikul kawan dosa takam hang dirini hang ambau kayu balasangar, nampan takam lepah teka kuasa dosa, nelang welum manyu kabahumen Alatalla. Daya kawan batan Kristus sa nyamare naun.

²⁵Dahulu hie naun kala babiri sa tawang, kude itati naun haut nainsing mulek nampan umba Pakatik nelang Pamalihara amiruenu.