Read Ma'anyan 1 PETRUS 4 Bible Online

1 PETRUS 4 - Ma'anyan bible

1 PETRUS 4

¹Daya Kristus haut wuah kahanangen manyu daging, naun pada harus ngampi kansing diri makai sara kala yiru. Daya ulun sa wuah kahanangen manyu daging puang lagi ngulah dosa.

²Daya yiru, ware naun salawah welum hang dunia yiti ngalut nuu kabahumen Alatalla, nelang puang mulur kabahirien murunsia.

³Hang wayah sa haut paitah, naun haut sukup lawah nampalus inun sa hamen naulah daya kawan ulun sa puang kataru Tuhan. Naun welum puang maeh. Naun mulur kabahirien, bahimat mahamui, pesta bararami, kuman nguut nelang nyambah barhala sa maka rumanyi.

⁴Itati ulun sa puang kataru Tuhan, wauh basa naun puang umba welum kala here ngulah dosa anri puang uweng tikas. Yiru sababni here ngampahe naun.

⁵Kude hanrian here harus ngami partanggungan jawab ma Alatalla sa haut sadia neu mangadili ulun welum, ulun matei.

⁶Yiru sababni Kabar Maeh haut nawara pada ma kawan ulun matei. Bahumni nampan here, sa haut naadili hawuang wangun murunsia manyu daging — pada kala wangun katuluh murunsia na adili — nampan kaiyuh welum manyu roh, kala kabahumen Alatalla.

⁷Ala katantuluh haut tiba pijumpuhanni, daya yiru wuah naun nguasa diri nelang hati-hati, nampan naun kaiyuh badoa.

⁸Labis teka ala katantuluhni, ware naun tuu-tuu sinta isa anri sa lain, daya anri ipansinta naun sagar basadia pada nampan ipangampun.

⁹Ware naun ipanarime isa anri salain hang lewu maisasaan, anri puang uweng kasasalen.

¹⁰Naun maisasaan haut narime kawan pangamian balain-lain teka Alatalla. Daya yiru kala pangurus sa maeh teka kawan pangamian Alatalla, ware naun makai kamampuan yiru neu ma kaparluan katuluh.

¹¹Ulun sa nampe kabar, harus nampe kabar teka Alatalla; ulun sa malayanni ulun lain, harus malayanni makai kakuaten sa teka Alatalla, nampan hawuang katantuluh hal, Alatalla tau natawat namulia itetei Yesus Kristus. Hanye sa bakuasa nelang patut natawat namulia palus ma kalalawahni. Amen.

¹²Pulaksanai katuluh sa nasinta! Naun itati wuah kahanangen daya naun rahat nauji. Kude ada wauh, kakala naan ala sa luar biasa wuah naun.

¹³Likan, ware naun kaingkam sanang daya naun umba nanggung kahanangen baya anri Kristus. Kude hanrian amun pihante mulia Kristus nalalea, naun sagar arai mihewu.

¹⁴Naun bauntung amun naun nakampahe daya gana naun umba Kristus. Yiru baarati Roh sa mulia, hanyeyiru Roh Alatalla, naan hang naun.

¹⁵Ada sunah erang kaulun teka naun nanggung kahanangen daya hanye munu ulun atawa pangalat, atawa panjahat, atawa daya hanye sampur urusan ulun lain.

¹⁶Kude amun naun nanggung kahanangen daya naun ulun Kristen, ada umangan daya hal yiru. Batarima kasih ma Alatalla, basa naun nginsing ngaran Kristus.

¹⁷Haut hampe wayahni Alatalla mangadili dunia. Nelang ulun wat Alatalla raerai sa sagar naadili labis dahulu. Nah, amun Alatalla sagar nuku takam, kalaawe panyarianni die anri kawan ulun sa puang parisaya ma Kabar Maeh teka Alatalla yiru?

¹⁸Hawuang Surat Barasis nasurat kalayiti, “Amun kawan ulun sa maeh sika haut mahadin neu nasalamat, kala awe dieni anri kawan ulun badosa sa puang kataru Tuhan!”

¹⁹Daya yiru, amun naan kawan ulun sa nanggung kahanangen daya Alatalla ngabahumen kalayiru, ware kawan ulun yiru welum anri mawitu bujur nelang nyarah diri ma Isa ngulah here. Hanye sagar saratang nampalus janjini.