Read Ma'anyan 1 PETRUS 5 Bible Online

1 PETRUS 5 - Ma'anyan bible

1 PETRUS 5

¹Aku laku parhatian kawan pamimpin ungkup naun. Aku nyurat yiti kala hengau sasameh pamimpin nelang yalah ulun sa haut manyaksi raerai kahanangen Kristus, nelang pada sagar umba naampihante namulia, amun pihante mulia Kristus nalalea ma murunsia. Aku laku tatuu

²nampan naun makatik sawayan babiri sa nasarah Alatalla ma naun. Pakatik here anri sanang atei kala sa nakasinnien daya Alatalla, nelang ada anri atei maweat. Ada pada nampalus pagawian naun nampan kaiyuh kauntungan, malengkan daya naun tuu-tuu sindi malayanni.

³Ada batindak yalah panguasa nadap here sa nasarah ma naun, malengkan jari suntu ma here.

⁴Balalu hang tawuk Pakatik Hante yiru hawi hanrian, naun sagar narime mahkota sa basahaya sa puang sagar kudap sahayani.

⁵Kalayiru pada naun, kawan ulun sa iya muda. Ware naun tunduk ma kawan ulun matueh. Pulaksanai katuluhni harus nyanrandah diri nelang sameh-sameh malayanni anri randah atei. Daya hawuang Surat Barasis nasurat kalayiti, “Alatalla nawan ulun sakah, kude sinta ulun randah atei.”

⁶Daya yiru, sanrandah dirinu hang kapit tangan Alatalla sa mansing, nampan hanye nginrik ngampambau naun amun haut hampe wayahni.

⁷Sarah kawan kagugupennu ma Alatalla, daya hanye saratang ngatawani hanyu.

⁸Ware naun hati-hati nelang tatap sadia! Daya Iblis samula musuh naun. Hanye kala singa takia maaru-maati nelang mangaum ngantara kutaenni.

⁹Lawan hanye makai kaparisayaan sa mansing, daya naun karasa, kawan pulaksanai lain sameh Kristen hang litar dunia pada wuah kahanangen kala naun.

¹⁰Kude udi naun wuah kahanangen erang pitus, Alatalla die sagar ngulah naun jari paruna. Hanye sagar ngapinri nelang nangkansing naun nelang ngampi kukuh naun. Daya hanye samula Alatalla sa tuu maeh atei, sa haut nerau naun nampan umba kaingkam pihante muliani sa kalalawah itetei Kristus.

¹¹Hanye sa bakuasa hampe kalalawahni! Amen.

¹²Suratku sa imbe yiti nasuratku ma naun anri bantuan Silas, sa naanggapku erang kaulun Kristen sa satia. Aku hamen ngami samangat ma naun nelang ngampi harap naun neu inun sa nasuratku yiti hanyeyiru kabar sa bujur neu lelo Alatalla. Ware naun itegei mansing hang lelo yiru.

¹³Kawan hengau isa ungkup hang Babilon, sa pada tapidi daya Alatalla, ngirim tabe ma naun; kalayiru pada anakku hi Markus sa nasinta.

¹⁴Ware ipanabe isa anri sa lain anri penu sinta kala pulaksanai Kristen. Mudahan Tuhan ngami kasanangen ma Pulaksanai katantuluhni sa jari milik Kristus. Hormat kami, Petrus