Read Ma'anyan 2 PETRUS 2 Bible Online

2 PETRUS 2 - Ma'anyan bible

2 PETRUS 2

¹Hang jaman sadi hang penah ulun wat Alatalla haut hulet kawan nabi palasu. Kalayiru pada hang penah naun sagar hulet kawan guru palasu. Here sagar namasuk kawan ajaran sa puang bujur, nampan ulun binasa. Nelang here sagar puang mangaku Panguasa sa haut ngampi bebas here. Anri kalayiru here meat kabinasaan ma ambau diri here raerai sa sagar hinang wuah here.

²Biar kalayiru, sika rama ulun sagar umba welum ngalut kawan guru palasu yiru sa naparentah daya kabahirien here. Nelang pagawian kawan guru yiru sagar ngulah rama ulun ngampahe Lalan Bujur sa nuju ma Alatalla.

³Daya here malunggun, balalu kawan guru palasu yiru sagar nyarita ma naun kawan sarita sa nakarang here nampan kaiyuh kauntungan teka naun. Kude pangadilan neu nyanawu hukuman ma ambau here haut lawah nasadia, nelang kabinasaan sa natantu ma here haut nganrei here.

⁴Kawan malekat sa badosa sika puang Alatalla ngaret lapas teka hukuman, malengkan naumpe mawuang neraka. Here natamasuk mawuang labak sa maieng nampan natahan hang yaru hampe Anrau Pangadilan.

⁵Kalayiru pada anri dunia hang jaman sadi, Alatalla puang ngaretni lapas teka hukuman. Alatalla ngirim baah hante ma dunia kawan ulun sa jahat hang tawuk yiru. Ekat hi Nuah baya anri pitu kaulun lain sa nasalamat, daya hi Nuah iwara kabar neu wangun welum sa nakatujuen atei Alatalla.

⁶Sameh pada halni neu tumpuk Sodom anri Gomora: Alatalla nyanumus kawan tumpuk yiru makai apui nampan jari suntu neu kawan sa sagar natampalus ma kawan ulun sa jahat.

⁷Kude hi Lot nasalamat, daya hanye ngalut kabahumen Alatalla; hanye wahai wuah kahanangen daya tingkah laku puang sanunuh teka kawan ulun durhaka.

⁸Hang penah kawan ulun sa kalayiru hi Lot sa maeh yiru welum anri atei mahanang, daya tiap anrau hanye kadinung nelang karengei kawan pagawian here sa jahat.

⁹Jari, Tuhan karasa kalaawe nyalamat kawan ulun sa ngalut kabahumenni amun here nadap kawan purija. Nelang Tuhan karasa kalaawe nyimuh kawan ulun sa jahat sagar neu nasiksa hang Anrau Pangadilan,

¹⁰samambatang kawan ulun sa mulur kawan kabahumen kabahirien here sa bere nelang sa ngampahe kuasa Alatalla. Kalayiru heei nelang sakahni kawan guru palasu yiru hampe here puang takut ngampahe kawan ala welum sa mulia hang surga!

¹¹Sadang kawan malekat sa labis mansing nelang bakuasa teka kawan guru palasu yiru, puang suah nawa kawan ala welum sa mulia yiru makai lengan ngampahe-ngawawarah hang hadapan Tuhan.

¹²Kude kawan guru yiru, bukan main! Here kala eha sa nakayaan neu najamba nelang nawunu. Here puang bapikir, kude ekat batindak manyu pangingkaman, hampe here nawan kawan hal sa puang here kataru makai lengan sa ngampahe-ngawawarah. Daya yiru gana kawan pagawian here raerai, here sagar binasa kala kawan eha maraat.

¹³Yalah walehan kawan kahanangen sa haut naulah here, here pada sagar wuah kahanangen. Ma here, kawan sa ngampi sanang atei hanyeyiru nampalus ala inun-inun tawuk kaanrau neu mulur kabahirien tenga here. Amun here maharung baya naun hawuang pesta kuman, tingkah laku here maka nua daya here mahamui mulur hawa nafsu.

¹⁴Here puang weru peda ngulah dosa, nelang kasindien here hanyeyiru ninung wawei ibela. Kawan ulun sa wau parisaya nelang magun kurang harap, nararumuk here. Atei here haut tabiasa anri hamen malunggun. Here samula kawan ulun sa wuah sapa-sumpah!

¹⁵Daya here puang hamen malupui lalan sa mawitu, balalu here tawang. Here ngalap lalan sa napalupui daya Bileam anak Beor sadi. Hi Bileam yiti sindi tatuu kaiyuh duit teka pagawianni sa jahat.

¹⁶Kude hanye kaiyuh taguran sa mehet neu kajahatenni yiru, tawuk kaledaini bapaner makai lengan murunsia. Balalu nabi yiru napaksa nampan nyantaduh pagawianni sa rapui yiru.

¹⁷Kawan guru palasu yiru samula kala matei ranu sa karing nelang kala ambun natampuh daya riwut barat. Alatalla haut nyadia ma here isa unengan sa maieng maituk.

¹⁸Here ngulah kawan piwaraan sa tamam kude mamus; kabahirien ibela napakai daya here pakai nanrusak kawan ulun sa wau nuku lapas teka lingkungan ulun welum tawang.

¹⁹Kawan guru palasu yiru nyanji kabebasan ma kawan ulun yiru, kude here raerai nasamalah daya kawan kabiasaan sa nanrusak murunsia. Daya amun ulun nasantalau daya ala inun-inun, himat hanye walah teka sa nyantalau hanyeyiru.

²⁰Ulun sa kataru Tuhan nelang Panyalamat takam Yesus Kristus haut lapas teka kawan kuasa dunia sa nangkurun murunsia. Kude amun hanrian hanye taawet lagi hampe nasantalau daya kawan kuasa yiru, himat wangun ulun yiru hang pijumpuhanni labis murun teka sa dahuluni.

²¹Labis maeh kawan ulun sa kalayiru puang suah kataru lalan sa bujur teka Alatalla, teka here kataru yiru, kude hanrian puang hamen ngalut kawan parentah sa naami Alatalla ma here.

²²Inun sa naulah here mambukti pituu paribasa yiti, “Antahu sagar nguta kamulek inun sa haut naluani,” Nelang “Iwek sa haut naapanrus, sagar mulek nabuangan hawuang lujau.”