Read Ma'anyan 2 PETRUS 3 Bible Online

2 PETRUS 3 - Ma'anyan bible

2 PETRUS 3

¹Pulaksanai katuluh sa nasinta! Hampe yiti suratku sa karueh ma naun. Hawuang karueh surat yiti, aku ngakali ngele kawan pikiran sa maeh hang naun.

²Aku ngurayang nampan naun ngitung neu kawan lengan sa sadi haut nawara daya kawan nabi Alatalla, nelang neu parentah teka Tuhan, Raja Panyalamat, sa natahampe ma naun itetei kawan rasul.

³Samambatang, naun harus karasa hanyeyiru hang kawan anrau pijumpuhan yati, sagar hulet kawan ulun sa pamelumni naparentah daya kabahirien here raerai. Here sagar ngasese naun

⁴makai lengan kalayiti, “Eauni Tuhan bajanji sagar hawi! Itati haawe hanye? Kawan datu nini takam haut matei, kude ala katantuluhni magun samehleh kakala kalemah dunia naulah!”

⁵Here singaja puang hamen mangaku jaman sadi hurap Alatalla ngulah langit anri tane makai lenganni. Tane naulah teka ranu, nelang makai ranu;

⁶nelang makai ranu pada — hanyeyiru ranu teka baah hante — dunia jaman sadi yiru nabinasa.

⁷Kude langit anri tane sa naan itati, napalihara daya lengan Alatalla yiru pada nampan hanrian nasanumus makai apui. Itati langit anri tane magun napalihara hampe hang anrau kawan ulun sa jahat nahukum nelang nabinasa.

⁸Kude pulaksanaiku katuluh, isa hal yiti ada naun puang kaitung: hawuang paninungan Tuhan, erang anrau puang uweng bedani anri saribu taun — kararuehni samehleh ma hanye.

⁹Tuhan puang unte ngami inun sa haut najanjini, biar naan sa minda kalayiru. Kabalikanni, hanye sabar nadap naun, daya hanye puang hamen sunah erang kaulun binasa. Hanye hamen nampan katuluh ulun batobat teka kawan dosani.

¹⁰Kude Anrau Pihawian Tuhan sagar hawi kala maling. Hang Anrau yiru, langit sagar wawai nasinrah anri lengan gaguruh, nelang kawan banda hang langit sagar wawai rakit, nelang tane pada rakit, palus dunia anri katantuluh sa naan hawuangni sagar sinap.

¹¹Daya katantuluhni yiru sagar naampihansur makai sara kalayiru, kalaawe saharusni naun welum? Naun harus welum barasis nelang hulung ma Alatalla,

¹²salawah naun nganrei anri kakunus pihawian Anrau Alatalla. Hang Anrau yiru langit sagar galis rakit, nelang daya laingni, balalu kawan banda hang langit sagar lenuh.

¹³Kude takam nganrei inun sa haut najanji Alatalla, hanyeyiru langit sa wau anri tane wau hang unengan naan kaadilan.

¹⁴Daya yiru, naun katuluh sa nasinta, padingian naun nganrei Anrau yiru, kakali bahimat nampan barasis nelang puang uweng wadan hang hadapan Alatalla. Nelang palihara hubungan sa maeh anri Alatalla.

¹⁵Anggap kasabaren Tuhan takam yalah kasampatan sa naami ma naun nampan tau salamat. Hi Paulus, pulaksanai takam sa nasinta, haut nyurat kalayiru pada ma naun. Hanye nyurat yiru anri kahatien kapintaren sa naami Alatalla ma hanye.

¹⁶Hawuang katuluh suratni, hi Paulus saratang nyurat neu hal yiru. Samula naan papire hal sa mahadin napantaru hawuang kawan suratni yiru. Nelang bagian yiru naputar balik daya kawan ulun sa puang karasa inun-inun nelang sa puang mansing kaparisayaanni. Hal yiru puang usah wauh, daya kawan bagian lain teka Surat Barasis napakai kalayiru pada daya here. Inun sa naulah here yiru ekat ngulah pihansur here raerai.

¹⁷Kude naun, Pulaksanai katuluh sa nasinta, haut karasa neu hal yiru. Daya yiru, hati-hati, ada hampe naun tamput mawuang pitawangan kawan ulun murun hampe naun lawu teka unengan naun minri sa segah.

¹⁸Ware naun magin kaingkam lelo Tuhan Yesus Kristus, Raja Panyalamat takam, nelang ware naun pada magin kataru hanye. Natawat hanye, itati nelang hampe kalalawahni! Amen. Hormat kami, Petrus