Read Ma'anyan 1 YOHANES 3 Bible Online

1 YOHANES 3 - Ma'anyan bible

1 YOHANES 3

¹Dinung kewangun Alatalla sinta takam, hampe takam nakakuni yalah kawan anakni. Takam samula kawan anak Alatalla. Yiru sababni dunia yiti puang kataru takam, daya dunia puang kataru Alatalla.

²Pulaksanai katuluh sa nasinta! Itati takam samula kawan anak Alatalla, kude wangun takam hanrian huan tena. Kude takam karasa amun Kristus hawi, takam sagar jari kala hanye, daya takam sagar kadinung hanye hawuang kawangunenni sa sabujurni.

³Katuluh ulun sa uweng kaharapen kalayiti ma Kristus, nyaga dirini nampan tuu-tuu barasis, barasis teka kawan dosa kala Kristus pada barasis.

⁴Ulun sa ngulah dosa, nawan hukum Alatalla; daya dosa hanyeyiru palangaran ma hukum Alatalla.

⁵Naun karasa Kristus hawi nampan muhut kawan dosa murunsia, nelang himat puang uweng dosa hawuang dirini.

⁶Katuluh ulun sa welum baya anri Kristus, puang saratang ngulah dosa. Ulun sa saratang ngulah dosa, puang suah kadinung Kristus nelang puang kataru hanye.

⁷O kawan anakku, ada maladar hie-hie ulun nyantawang naun. Ulun sa nampalus kabahumen Alatalla hanyeyiru Anak Alatalla kala Kristus pada Anak Alatalla.

⁸Kude ulun sa saratang ngulah dosa hanyeyiru anak Iblis, daya Iblis badosa teka asalni. Nampan neu yiti anak Alatalla hawi, hanyeyiru nampan ngampi hansur pagawian Iblis.

⁹Ulun sa haut jari Anak Alatalla, puang saratang ngulah dosa daya pidasaran Alatalla naan hawuang hanye. Nelang daya Alatalla yiru Ambahni, balalu hanye puang tau saratang ngulah dosa.

¹⁰Yiru pibalainni kawan anak Alatalla anri anak Iblis; hie sa puang nampalus kabahumen Alatalla, atawa puang sinta ma pulaksanaini, hanye puang anak Alatalla.

¹¹Kalemah teka asalni haut natahampe kabar yiti ma naun: Takam harus sinta isa ma sa lain.

¹²Ada takam kala hi Kain, sa jari anak Iblis munu pulaksanaini raerai. Inun sabab hi Kain munu pulaksanaini? Gana kawan hal sa naulahni yiru hala, kude kawan hal sa naulah pulaksanaini yiru bujur.

¹³Daya yiru, Pulaksanai katuluh, ada wauh amun kawan ulun dunia yiti muar ma naun.

¹⁴Takam karasa sa takam yiti haut kaluar teka pampatei, nelang baidar ma pamelum. Takam karasa yiru, daya takam sinta sasameh takam. Ulun sa puang sinta, baarati hanye pagun hang kapit kuasa pampatei.

¹⁵Ulun sa muar ma pulaksanaini hanyeyiru erang kaulun pamunu ulun, nelang naun karasa amun erang kaulun pamunu ulun watni puang uweng pamelum sajati palus ma kalalawah.

¹⁶Anri lalan yiti takam karasa kewangun sarani sinta ma sasameh murunsia: Kristus haut nyarah pamelumni ma takam. Daya yiru takam harus nyarah pamelum takam ma kawan pulaksanai takam!

¹⁷Amun erang kaulun sa welum hang kasukupen kadinung pulaksanaini bakakurangen, kude puang hamen ngarawah pulaksanaini yiru, kewangun ulun yiru tau kaeau hanye sinta Alatalla?

¹⁸O Kawan anakku! Ada takam sinta ekat hang wiwi mulut atawa ekat makai lengan. Wuah takam sinta makai sinta sajati, sa natantarang itetei pagawian takam.

¹⁹Kalayiru sarani takam karasa takam yiti tamasuk jari kawan anak Alatalla sa tuu, nelang atei takam kaiyuh marauh hang hadapan Alatalla.

²⁰Takam karasa amun takam naampihala daya atei takam, pangarasaen Alatalla labis hante teka pangarasaen atei takam, nelang hanye karasa alakatantuluh.

²¹Jari pulaksanaiku sa nasinta, amun atei takam puang ngampi hala takam, takam tau kaiyuh nadap Alatalla anri kaheeien.

²²Nelang inun sa nalaku takam teka hanye, takam kaiyuh, daya takam ngalut nuu ma kawan parentahni nelang nampalus kawan inun sa ngampi sanang ateini.

²³Sa naparentahni ma takam hanyeyiru: Takam harus parisaya ma Anakni, hanyeyiru Yesus Kristus, nelang takam harus sinta isa pada ma sa lainni, kala sa haut naparentah Kristus ma takam.

²⁴Katuluh ulun sa ngalut nuu ma kawan parentah Alatalla, welum baya anri Alatalla, nelang Alatalla baya anri here. Nelang takam karasa Alatalla welum baya anri takam, daya hanye haut ngami Rohni ma takam.