Read Ma'anyan 1 YOHANES 4 Bible Online

1 YOHANES 4 - Ma'anyan bible

1 YOHANES 4

¹Kawan pulaksanai sa nasinta! Ada parisaya ma katuluh ulun sa mangaku naan Roh Alatalla, kude ware naun nguji here dahulu nampan ngarasa inun roh sa naan hang here yiru hawini teka Alatalla atawa puang. Daya rama kawan nabi palasu sa bakaliaran hang awe-awe.

²Kewangun sarani naun ngarasa inun yiru Roh Alatalla atawa puang, hanyeyiru kala yiti: Ulun sa mangaku Yesus Kristus hawi ma dunia yalah murunsia, ulun yiru naan roh teka Alatalla.

³Kude ulun sa puang mangaku hal yiti neu Yesus, puang uweng Roh Alatalla hang hanye. Hang ulun yiru naan roh teka musuh Kristus. Naun haut karengei himat roh yiru sagar hawi, nelang itati haut naan hawuang dunia yiti.

⁴Kude naun kawan anakku, naun milik Alatalla. Naun haut nyantalau kawan nabi palasu, daya Roh sa naan hang naun labis bakuasa teka roh sa naan hang kawan ulun milik dunia yiti.

⁵Kawan nabi palasu yiru bapaner neu kawan hal dunia yiti, nelang dunia nyanrengei inun sa naeau here, daya here milik dunia.

⁶Kude takam hanyeyiru kawan anak Alatalla; nelang ulun sa kataru Alatalla, nyanrengei inun sa naeau takam. Ulun sa puang milik Alatalla, puang nyanrengei inun sa naeau takam. Kalayiru sarani takam ngarasa pibalainni Roh sa ngami ajaran sa bujur anri roh sa nyantawang.

⁷Pulaksanai katuluh sa nasinta! Hayu takam sinta isa pada ma sa lain, daya sinta yiru asalni teka Alatalla. Ulun sa sinta, hanyeyiru anak Alatalla nelang hanye kataru Alatalla.

⁸Ulun sa puang sinta, puang kataru Alatalla; daya Alatalla yiru sinta.

⁹Alatalla haut ngalalea sa hanye sinta ma takam anri ngirim anakni sa tungkan ma dunia nampan takam kaiyuh pamelum itetei Anakni yiru.

¹⁰Iti sinta: Puang takam sa haut sinta Alatalla, kude Alatalla sa sinta ma takam nelang ngirim Anakni nampan itetei hanye takam kaiyuh kaampunan kawan dosa takam.

¹¹Kawan pulaksanai sa nasinta, amun Alatalla kalayiru sinta ma takam, takam pada harus sinta isa pada ma sa lainni.

¹²Puang uweng sunah erang kaulun sa suah kadinung Alatalla, kude amun takam sinta isa pada ma sa lain, Alatalla baya anri takam nelang sintani jari paruna hawuang diri takam.

¹³Daya Alatalla haut ngami ma takam Rohni, balalu takam karasa himat takam haut welum baya anri Alatalla, nelang Alatalla welum baya anri takam.

¹⁴Kami raerai haut kadinung Anak Alatalla, nelang kami iwara sa hanye nautus daya Ambah nampan jari Raja Panyalamat dunia yiti.

¹⁵Hie sa mangaku Yesus Kristus yiru Anak Alatalla, Alatalla welum baya anri ulun yiru, nelang ulun yiru pada welum baya anri Alatalla.

¹⁶Takam raerai karasa nelang parisaya neu sinta Alatalla ma takam. Alatalla yiru sinta. Ulun sa welum naparentah daya sinta, ulun yiru baya anri Alatalla, nelang Alatalla baya anri hanye.

¹⁷Sinta naulah paruna hawuang diri takam, nampan takam naan kaheeien hang Anrau Pangadilan. Takam sagar uweng kaheeien, daya pamelum takam hawuang dunia yiti sameh kala pamelum Kristus.

¹⁸Ulun sa kaingkam sinta Alatalla, puang uweng kaingkam takut; daya sinta sa paruna nyamawai katuluh pangingkaman takut. Jari bawilah tuu ulun huan kaingkam sinta Alatalla anri paruna amun ulun yiru takut nadap Anrau Pangadilan.

¹⁹Takam sinta, daya Alatalla haut labis dahulu sinta ma takam.

²⁰Amun naan sa kaeau, “Aku sinta Alatalla,” kude puang sinta ma pulaksanaini, ulun yiru mapusu. Daya ulun sa puang sinta ma pulaksanai sa nadinungni, puang maka hanye tau sinta ma Alatalla sa puang hanye kadinung.

²¹Daya yiru, parentah sa naami Kristus ma takam, hanyeyiru: Hie sa sinta ma Alatalla harus pada sinta ma pulaksanaini.