Read Ma'anyan 1 YOHANES 5 Bible Online

1 YOHANES 5 - Ma'anyan bible

1 YOHANES 5

¹Ulun sa parisaya ma Yesus hanyeyiru Raja Panyalamat sa najanji Alatalla, ulun yiru anak Alatalla. Ulun sa sinta ma erang kaulun Ambah, sinta ma anakni pada.

²Anri lalan yiti takam karasa sa takam sinta kawan anak Alatalla: Takam sinta Alatalla nelang ngalut nuu ma kawan parentahni.

³Daya, sinta ma Alatalla baarati ngalut nuu ma kawan parentahni nelang kawan parentahni yiru puang maweat ma takam,

⁴daya tiap anak Alatalla sanggup nyantalau dunia sa jahat yiti. Takam nyantalau dunia yiti makai kaparisayaan takam.

⁵Hie sa kaiyuh nyantalau dunia? Ekat ulun sa parisaya Yesus Kristus hanyeyiru Anak Alatalla.

⁶Yesus Kristus sa hawi ma dunia anri ranu baptisanni nelang anri ira pampateini. Hanye hawi puang ekat anri ranu, kude anri ranu nelang ira. Nelang Roh Alatalla ngami kasaksian yiru bujur, daya Roh puang suah ipusu.

⁷Naan telu saksi:

⁸Roh Alatalla, ranu nelang ira — katateluni ngami kasaksian sa sameh.

⁹Takam parisaya ma kasaksian murunsia, kude kasaksian Alatalla labis tamam lagi. Nelang yiru kasaksian Alatalla neu Anakni.

¹⁰Daya yiru, ulun sa parisaya ma Anak Alatalla, haut narime kasaksian yiru hawuang ateini; kude ulun sa puang parisaya Alatalla, haut baanggapan yalah Alatalla yiru mapusu, daya hanye puang parisaya ma inun sa naeau Alatalla neu Anakni.

¹¹Kasaksian yiru hanyeyiti: Alatalla haut ngami ma takam pamelum sa sajati palus makalalawah nelang Anakni hanyeyiru putut pamelum yiru.

¹²Ulun sa kaampun Anak Alatalla, uweng pamelum yiru: kude ulun sa puang kaampun Anak Alatalla, puang uweng pamelum yiru.

¹³Aku nyurat ma naun sa parisaya ma Anak Alatalla, nampan naun karasa naun haut uweng pamelum sa sajati palus kalalawah.

¹⁴Takam heei nadap Alatalla, daya takam harap hanye narime doa takam, amun takam ilaku inun heneng sa nanturungan manyu kabahumenni.

¹⁵Daya takam karasa hanye nyanrengei takam amun takam ilaku ma hanye, balalu takam karasa pada himat hanye ngami ma takam inun sa nalaku takam teka hanye.

¹⁶Amun naun kadinung erang kaulun sameh Kristen ngulah dosa sa puang ngulah sabab ulun yiru kawawaian pamelum sa sajati palus kalalawah, ware naun badoa ma Alatalla; nelang Alatalla sagar ngami pamelum yiru ma hanye. Yiti wuah ma here sa dosani puang ngulah sabab here kawawaian pamelum yiru. Kude naan dosa sa ngulah sabab ulun yiru kawawaian pamelum yiru. Neu hal yiru aku puang kaeau, naun harus badoa ma Alatalla.

¹⁷Katuluh ulahan sa hala hanyeyiru dosa, kude naan dosa sa puang ngulah sabab ulun yiru kawawaian pamelum sa sajati palus kalalawah yiru.

¹⁸Takam karasa, katuluh ulun sa haut jari kawan anak Alatalla, puang saratang ngulah dosa, daya Anak Alatalla nyalindung hanye, daya yiru hi Jahat puang kaiyuh ngulah inun-inun nadap hanye.

¹⁹Takam karasa, takam milik Alatalla, biar katuluh dunia yiti hang kapit kuasa hi Jahat.

²⁰Takam karasa Anak Alatalla haut hawi nelang haut ngami kaharatien ma takam, nampan takam kataru Alatalla sa bujur. Takam welum baya anri Alatalla sa bujur nelang welum baya anri anakni Yesus Kristus. Hanye yiti Alatalla sa bujur, nelang hanye yiti pamelum sa sajati palus kalalawah.

²¹O kawan anakku, sanawit tenga naun teka kawan barhala!