Read Ma'anyan 2 YOHANES 1 Bible Online

2 YOHANES 1 - Ma'anyan bible

2 YOHANES 1

¹Ma Ineh sa napidi daya Alatalla, nelang ma kawan anak Ineh. Surat yiti teka aku, pamimpin sa tuu-tuu sinta ma naun. Puang ekat aku raerai, kude katuluh ulun sa kataru Alatalla sa bujur, sinta ma naun pada.

²Daya Alatalla muneng hawuang atei takam, nelang sagar saratang baya takam palus ma kalalawahni.

³Mudahan takam naami berkat, ahi lelo nelang kasanangen daya Alatalla Ambah, nelang Yesus Kristus Anak Ambah yiru. Mudahan katuluh yiru nategei daya takam anri tulus atei nelang anri sinta.

⁴Aku arai tatuu daya karasa naan kawan anak Ineh sa welum ngalut ajaran Alatalla, kala sa haut naparentah Alatalla Ambah ma takam.

⁵Daya yiru, Ineh, aku ilaku tatuu nampan takam ipasinta. Sa nawaraku yiti puang parentah wau; parentah yiti haut naami ma takam kalemah dami takam parisaya.

⁶Sinta baarati welum ngalut kawan parentah Alatalla. Nelang parentah sa haut rengei naun kalemah teka asalni hanyeyiru naun harus welum anri sinta isa pada ma sa lainni.

⁷Rama kawan panipu sa haut bahamuran hang litar dunia. Here hanyeyiru kawan ulun sa puang mangaku Yesus Kristus hawi ma dunia yalah erang kaulun murunsia. Ulun sa kalayiru hanyeyiru panipu, nelang Musuh Kristus.

⁸Daya yiru, jaga ada hampe naun kawawaian inun sa haut nakakali kami ma naun. Ware naun ngakali nampan naun narime upa naun katuluhni teka Alatalla.

⁹Ulun sa puang itegei hang ajaran Kristus, malengkan manyimpang teka inun sa naajar daya Kristus, ulun yiru puang uweng Alatalla. Ulun sa tatap hawuang ajaran Kristus, baarati hanye uweng Alatalla Ambah atawa Anak.

¹⁰Daya yiru, amun naan ulun sa hawi nelang iwara ma naun ajaran sa puang naajar daya Kristus, ada narime ulun yiru hang lewu naun atawa ngami salam ma hanye.

¹¹Daya ulun sa ngami salam ma ulun sa kalayiru umba pada baya ulun yiru hang nampalus ulahan sa jahat.

¹²Wahai tuu sa parlu nawaraku ma naun, kude nanamni labis maeh ada mitah surat. Aku harap kaiyuh nunung palus bapaner anri naun, nampan atei takam tuu-tuu arai.

¹³Kawan anak teka pulaksanai ineh sa wawei sa pada napidi daya Alatalla, ngirim tabe ma hi Ineh.