Read Ma'anyan WAHYU 1 Bible Online

WAHYU 1 - Ma'anyan bible

WAHYU 1

¹Isi buku yiti neu kawan sa nalalea daya Yesus Kristus neu kawan hal sa sagar kajadian. Alatalla haut iwara hal yiru ma Kristus nampan hanye nantarangni ma kawan walah Alatalla inun kajadian sa harus hinang. Kristus ngirim malekatni nunung hi Yohanes, walahni, neu iwara kawan kajadian yiru ma hanye.

²Hi Yohanes balalu nyarita katuluh inun sa haut dinungni yiru, nelang iti laporanni neu pesen Alatalla sa nasantuhun daya Yesus Kristus itetei kasaksianni sa kalayiti.

³Salamat ulun sa mambasa nelang ulun sa nyanrengei kabar tujum buku yiti nelang ngalut nuu ma kawan sa nasurat hawuangni. Daya puang lawah lagi katantuluhni yiti sagar bakajadian.

⁴Pulaksanai katuluh sa naan hang kapitu ungkup hang daerah Asia! Aku hi Yohanes, harap naun kaiyuh berkat anri ahi lelo teka Alatalla — hanyeyiru hanye sa naan, sa haut naan, nelang sa saratang naan ma kalalawahni — pada teka kapitu roh sa naan hang hadapan padudusan Alatalla,

⁵nelang teka Yesus Kristus saksi sa satia. Hanye sa palanungkai nasamelum kamulek teka pampatei nelang hanye sa bakuasa hang ambau kawan raja hang dunia yiti. Yesus sinta takam, nelang itetei pampateini hanye nyanepah takam teka kawan dosa takam,

⁶nelang nyanyari takam jari bangsa sa hulung kawan imam, sa malayanni Alatalla, Ambahni. Yesus Kristus yiru sa mulia nelang bakuasa palus ma kalalawah. Amen!

⁷Dinung, hanye hawi nasalehup rakun! Katuluh ulun sagar kadinung hanye, tamput pada kawan here sa haut nyuduk hanye. Katuluh bangsa hang ambau tane sagar nangis gana hanye. Hiai, himat tuu! Amen!

⁸“Aku sa palanungkai nelang sa pijumpuhan” eau Tuhan Alatalla, sa naan, sa haut naan nelang sa saratang naan ma kalalawah sa Puang Uweng Tikas Kuasa.

⁹Aku hi Yohanes, pulaksanai naun sa mira usiat anri naun hang wuang kahanangen sa naingkam daya tiap ulun sa umba Kristus. Takam tahan ngaret kahanangen yalah ulun watni. Aku nabuang ma pulau Patmos daya aku iwara pesen teka Alatalla, sa nasantuhun daya Yesus Kristus itetei kasaksianni.

¹⁰Hang Anrau Tuhan, aku nakuasa daya roh Alatalla, balalu aku karengei lengan sa mehet — kala lengan tarompet — pantane hang wading wukuku.

¹¹Lengan yiru kaeau, “Surat kawan inun sa dinungnu, nelang kirim buku yiru ma kapitu ungkup, hanyeyiru: Epesus, Smirna, Pergamus, Tiatira, Sardis, Filadelfia, anri Laodikia.”

¹²Aku ikulik ma wading wuku ninung hie sa mantane aku. Balalu aku kadinung naan pitu pee palita sa naulah teka amas.

¹³Hang penah kawan pee palita yiru minri erang kaulun sa nadinung yalah erang kaulun murunsia. Hanye makai jubah sa ambauni hampe tungka. Hang dadani hanye makai tutup dada sa naulah teka amas.

¹⁴Wuluni mahilak kala wulu babiri, yalah kapas. Mateini ilelap kala apui;

¹⁵peeni ngalairi kala tamaga naupuh. Lenganni kala gutus riam hante.

¹⁶Tangan kawanni negei pitu wawahiang, nelang teka wawani kaluar erang kawila pedang rueh rare sa kumat. Uruwawani nyahaya kala mate anrau penah anrau.

¹⁷Dami aku kadinung hanye, aku tumbang tasaleep hang hadapan hanye kala ulun matei. Kude hanye hanrapak tangan kawanni hang aku balalu kaeau, “Ada takut! Aku sa palanungkai nelang sa pijumpuhan.

¹⁸Aku yiti hanye sa welum! Aku haut matei, kude dinung, aku welum ma kalalawahni. Aku bakuasa hang ambau pampatei nelang hang ambau dunia ulun matei.

¹⁹Daya yiru, surat kawan hal sa nadinungnu, hanyeyiru kawan hal sa naan itati, nelang kawan hal sa sagar kajadian yati.

²⁰Iti rasia teka pitu wawahiang sa dinungnu hang tangan kawanku, anri pitu pee palita amas yiru. Pitu wawahiang yiru hanyeyiru kawan malekat kapitu ungkup, nelang pitu pee palita yiru hanyeyiru kapitu ungkup yiru.”