Read Ma'anyan WAHYU 11 Bible Online

WAHYU 11 - Ma'anyan bible

WAHYU 11

¹Udiyiru aku naami erang kawila kayu sa wangunni ane sameh anri tungkeh piayu, balalu aku naparentah, “Tulak lepuh ngayu Lewu Alatalla anri mezbah. Reken pire ramani ulun sa sumbayang hawuangni.

²Kude ada ngayu natat sa hang luar Lewu Alatalla yiru, daya bagian yiru haut nasarah ma kawan ulun sa puang kataru Tuhan. Here sagar narah ngaganyik tumpuk sa barasis yiru epat pulu rueh wulan lawahni.

³Aku sagar ngutus rueh kaulun saksiku sa makai pakaian ulun mahanang atei, nelang here sagar iwara kabar teka Alatalla salawah 1260 anrau.”

⁴Rueh kaulun saksi yiru hanyeyiru rueh kakakau zaitun anri rueh pee palita sa naan hang hadapan Tuhan sa ampun langit anri tane.

⁵Amun ulun mansuba ngulah hal sa puang maeh nadap here, balalu teka wawa here kaluar apui sa ngabinasa kawan musuh here. Anri sara kalayiru, katuluh ulun sa hamen ngahanangen here sagar matei.

⁶Here naan kuasa pakai nutup langit nampan ada uran salawah here iwara Kabar teka Alatalla. Here pada naan kuasa hang ambau katuluh matei ranu, nampan ngubah ranu jari ira. Nelang here pada naan kuasa pakai ngahanangen dunia makai wahai masam gagudan, hentek awe here hamen nampalusni.

⁷Udi here haut nampe kabar yiru, satua sa kaluar teka labak pampatei yiru sagar nawan nelang munu here.

⁸Nelang bangkai here sagar natatai hang lalan rami hang tumpuk hante, hang unengan Tuhan here haut nabalasangar. Ngaran kajawa tumpuk yiru, hanyeyiru Sodom atawa Mesir.

⁹Kawan ulun teka katuluh negara, suku, basa nelang bangsa sagar kadinung bangkai here salawah telu satengah anrau, nelang puang kalewa kawan bangkai yiru napasar.

¹⁰Panduduk dunia yiti sagar arai daya pampatei karueh saksi yiru. Here sagar pesta nelang ipangirim hadiah, daya karueh nabi yiru haut nginsing wahai siksaan ma murunsia katuluh hang ambau tane.

¹¹Udi telu satengah anrau, hewuk pamelum teka Alatalla hawi nelang masuk lagi mawuang karueh nabi yiru. Here balalu ambuan minri, hampe katuluh ulun sa kadinung here uras takut tatuu.

¹²Kamulek karueh nabi yiru karengei naan lengan sa mehet nerau here teka surga, “Hayu ambai ma yati!” Here balalu mambai ma surga, nasalehup rakun nelang nasaksi daya kawan musuh here.

¹³Balalu hang tawuk yiru naan gempa bumi sa tamam. Sapersapuluh tumpuk yiru hansur, nelang pitu ribu kaulun matei daya gempa bumi yiru. Kawan ulun sa lainni balalu takut tatuu, here balalu nawat pihante Alatalla hang surga.

¹⁴Gagudan sa karueh haut taitah. Kude dinung! Gagudan sa katelu puang lawah lagi sagar nyinsiukui.

¹⁵Balalu malekat sa kapitu ngampeau tarompetni, balalu hang surga naan rengei lengan sa tamam tatuu kaeau, “Kakuasaan neu marentah dunia itati naan hang tangan Tuhan takam anri Raja Panyalamat sa najanjini. Hanye sagar marentah palus ma kalalawah!”

¹⁶Balalu karuampulu epat pamimpin sa maharung hang padudusan here hang hadapan Alatalla, ileku palus nyambah Alatalla.

¹⁷Here kaeau, “Tuhan, Alatalla sa kuasani puang uweng tikas, sa naan, nelang sa haut naan! Kami batarima kasih ma hanyu daya hanyu haut makai kuasanu sa hante, nelang haut nuku marentah!

¹⁸Kawan ulun sa puang kataru Tuhan, ngamuk daya haut hampe wayahni hanyu nalui kasangitennu, nelang pada haut hampe wayahni hanyu mangadili kawan ulun matei. Itati wayahni nampan ngami upa ma kawan walahnu, kawan nabi, nelang ma katuluh ulun watnu, hanyeyiru katuluh ulun sa sumbayang ma hanyu, hante atawa rumis. Itati wayahni nampan ngampi hansur kawan ulun sa ngampi hansur dunia!”

¹⁹Lewu Alatalla balalu tauka hang surga, nelang naan dinung pati janji hawuangni. Balalu kelat wawereu nyambar maaru-maati nelang nanyu rarerat nelang ngaligur, nasinrah gempa bumi anri uran es mehet.