Read Ma'anyan WAHYU 13 Bible Online

WAHYU 13 - Ma'anyan bible

WAHYU 13

¹Kamulek aku kadinung erang kaukui satua sa hulet teka wuang laut. Satua yiru batanruk sapuluh, kaulu pitu. Hang tiap tanrukni naan isa mahkota, hang tiap uluni naan nasurat isa ngaran pakai ngampahe Alatalla.

²Satua sa dinungku yiru wangunni kala angkudi puai, peeni kala pee wayuang, munyungni kala munyung singa. Balalu naga yiru ngami katingkasenni raerai ma satua yiru, nelang padudusan anri kuasani sa hante.

³Isa teka kapitu ulu satua yiru nadinung yalah tunrung tamam, kude tunrung yiru haut ware. Litar dunia umba satua yiru nelang sangang.

⁴Here nawat naga yiru daya hanye haut ngami kuasaanni ma satua yiru. Nelang here nawat satua yiru pada. Here kaeau, “Puang uweng sa sameh kala satua yiru! Puang uweng sa kaule babur nawan hanye!”

⁵Satua yiru nalewa ngantuh neu kawan kasakahen nelang ngawawarah Alatalla. Hanye iyuh marentah epat pulu rueh wulan lawahni.

⁶Balalu hanye nuku ngawawarah Alatalla, nelang ngaran Alatalla. Kalayiru pada unengan Alatalla muneng, anri katuluh sa muneng hang surga pada nawawarah dayani.

⁷Hanye pada nalewa nawan kawan ulun wat Alatalla nelang nyantalau here. Nelang kuasa, hang ambau katuluh suku, negara, basa nelang bangsa naami ma hanye.

⁸Satua yiru sagar nasambah daya katuluh ulun sa welum hang ambau tane, sapuang ekat kawan ulun sa ngaranni haut nadaftar kapihuan dunia hawuang buku ulun welum wat Anak Babiri sa haut nasamalis.

⁹Daya yiru, amun naun sanggup nyanrengei, ware rengei kabar yiti:

¹⁰“Ulun sa harus najamba, himat sagar najamba. Nelang ulun sa harus nawunu makai pedang, himat sagar nawunu makai pedang, yiru sababni ulun wat Alatalla harus tabah nelang satia.”

¹¹Balalu aku kadinung erang kaukui satua lain sa hulet teka kapit tane. Satua yiru batanruk rueh kala tanruk anak babiri. Lenganni yalah lengan naga.

¹²Hang hadapan satua sa palanungkai yiru hanye makai kuasa sa hante sa iyuhni teka satua yiru pada. Litar dunia nelang katuluh sa muneng hang ambau tane, napaksani nyambah satua sa palanungkai yiru, sa udi tunrungni tamam kude haut ware.

¹³Satua sa karueh yiru ngulah kawan kawauhen sa hante. Hang kadapan katuluh ulun hanye ngulah apui lawu teka langit ma ambau tane.

¹⁴Nelang kawan ulun sa welum hang ambau tane natipuni makai kawan kawauhen sa naulahni hang hadapan satua sa palanungkai yiru. Here katuluh nahuyu ngapinri ampatung satua sa haut tunrung wuah pedang, kude tatap welum.

¹⁵Satua sa karueh yiru nalewa ngami pahewukan ma ampatung yiru, hampe ampatung yiru tau bapaner nelang munu katuluh ulun sa puang hamen nyambah hanye.

¹⁶Katuluh ulun, hante atawa rumis, tatau atawa paua, walah atawa ulun bebas napaksa daya satua yiru nampan narime siri hang tangan kawan here atawa hang rai here.

¹⁷Puang uweng sunah erang kaulun sa tau midi atawa ngari inun heneng, amun hanye puang uweng siri yiru, hanyeyiru ngaran satua yiru raerai, atawa angka sa ngalalea ngaran yiru.

¹⁸Hang yiti parlu, naan kaharatien kapintaren. Ulun sa pintar maharati kaiyuh hanreken arati teka angka satua yiru, daya angka yiru hanyeyiru ngaran erang kaulun murunsia. Angkani hanyeyiru: 666.