Read Ma'anyan WAHYU 14 Bible Online

WAHYU 14 - Ma'anyan bible

WAHYU 14

¹Kamulek aku kadinung, lentah Anak Babiri yiru minri hang ambau Bukit Sion. Baya anri hanye naan 144.000 kaulun sa hang rai here maisasaan naan nasurat ngaran here anri ngaran Ambah here.

²Balalu aku karengei naan lengan teka langit gagunu kala lengan gutur riam hante nelang kala lengan ligur nanyu sa mehet. Lengan yiru narengei yalah lengan musik teka kawan pamain kasapi sa rahat ngampeau kasapi here.

³Hang hadapan padudusan anri kaepat mahluk baya kawan pamimpin hang kaliling padudusan yiru, 144.000 kaulun yiru manyanyi isa nyanyian wau. Nyanyian yiru puang tau napaajar daya hie-hie sapuang teka here 144.000 kaulun yiru sa haut nabebas teka dunia.

⁴Here yiru kawan ulun sa tatap bungas kala erang kaulun wawei bujang paruna, daya here puang suah ibaya anri ulun wawei. Here umba Anak Babiri yiru maawe hanye tulak. Teka katuluh ulun murunsia, here yiru ulun sa haut nabebas jari parapah sa palanungkai ma Alatalla nelang ma Anak Babiri.

⁵Here puang suah ipusu; nelang puang uweng sunah butit naan nawada hang here.

⁶Balalu aku kadinung erang kaulun malekat lain samiding ambau hang langit. Malekat yiru nginsing kabar neu Kabar Maeh sa kalalawah nampan natahampe ma murunsia hang ambau tane hanyeyiru ma katuluh bangsa, suku, basa nelang negara.

⁷Malekat yiru kaeau anri lengan mehet, “Hayu ware naun takut ma Alatalla nelang ware naun nawat pihanteni! Daya haut hampe wayahni Alatalla mangadili murunsia. Sambah hanye sa haut ngulah langit anri tane, laut anri katuluh matei ranu!”

⁸Malekat sa karueh ngapung malekat sa palanungkai nelang kaeau, “Haut runtun! Tumpuk Babel sa hante yiru haut runtun! Hanye haut ngampi hamui katuluh bangsa makai anggur-hanyeyiru anggur teka kabahirien dapa bela!”

⁹Erang kaulun malekat sa katelu naharak malekat rueh yiru pada, anri lengan mehet hanye kaeau, “Ulun sa nyambah satua yiru anri ampatungni naan siri satua yiru hang rai atawa hang tanganni,

¹⁰ulun yiru sagar nguut anggur Alatalla, hanyeyiru anggur kasangitenni sa haut nahaluini mawuang unenganni, puang uweng natangkurang sunah hena butit. Katuluh ulun yiru sagar nasiksa hawuang apui nelang balerang hang hadapan kawan melakat sa barasis nelang hang hadapan Anak Babiri yiru.

¹¹Atuk apui sa nyiksa kawan ulun yiru sagar ikangkewul palus ma kalalawahni. Kaanrau kamalem here puang taduh haut tasiksa, hanyeyiru here sa nyambah satua yiru anri ampatungni, katuluh ulun sa naan siri ngaran satua yiru.”

¹²Hawuang hal yiti ulun wat Alatalla sa ngalut nuu ma kawan parentah Alatalla nelang satia ma Yesus, harus sabar.

¹³Aku balalu karengei lengan teka surga sa kaeau, “Surat hal yiti: Nuku itati, salamat kawan ulun sa matei tawuk hanye malayanni Tuhan!” “Bujur!” tuing Roh Alatalla, “Here sagar tarie bagawi maweat, daya hasil palayanan here sagar saratang nyinrah here.”

¹⁴Kamulek aku ninung, balalu kadinung naan rakun mahilak. Hang rakun yiru maharung erang kaulun sa nadinung wangunni yalah murunsia. Hang uluni naan isa mahkota teka amas, hang tanganni naan isa arit kumat.

¹⁵Kamulek erang kaulun malekat sa lain kaluar teka Lewu Alatalla. Anri lengan mehet hanye kaeau ma hanye sa maharung hang rakun yiru, “Surung aritnu yiru palus wasi, daya haut hampe wayahni masi; dunia haut mihak neu nawasi!”

¹⁶Balalu hanye sa maharung hang rakun yiru nyurung arit ma ambau tane, balalu dunia nawasi.

¹⁷Kamulek aku kadinung erang kaulun malekat sa lain lagi kaluar teka Lewu Alatalla hang surga. Hanye pada negei isa arit, kumat.

¹⁸Udiyiru, erang kaulun malekat lain, sa bakuasa hang ambau apui, hawi teka mezbah. Anri lengan mehet hanye kaeau ma malekat sa negei arit kumat yiru, “Surung aritnu yiru tetek kawan wua anggur hang ambau tane, daya kawan wua yiru haut mihak!”

¹⁹Balalu malekat yiru nyurung aritni ma ambau tane palus netek kawan wua anggur teka kakauni, palus nuwe anggur yiru mawuang unengan pangamehan anggur kasangiten Alatalla sa newe hanruap.

²⁰Kawan wua anggur yiru naameh hang luar tumpuk, balalu teka pangamehan anggur yiru mareh ira kala hungei, lawitni mareh hampe telu jatuh kilometer nelang lalemni rueh meter.