Read Ma'anyan WAHYU 15 Bible Online

WAHYU 15 - Ma'anyan bible

WAHYU 15

¹Kamulek aku kadinung hang langit naan ala maka wawauh sa luar biasa tamamni. Naan pitu malekat anri pitu gagudan sa pangalisan. Yiti sa pangalisanni Alatalla mawak panyangitni.

²Udiyiru aku kadinung naan isa nadinung kala laut kasa basampur apui. Aku kadinung pada kawan ulun sa haut nyantalau satua anri ampatungni, nelang nyantalau kawan ulun sa ngaranni nasiri makai angka. Kawan ulun sa manang yiru minri hang iring laut kasa yiru nelang negei kasapi sa naami Alatalla ma here.

³Here manyanyi nyanyian Moses, walah Alatalla, anri nyanyian Anak Babiri, sa kalayiti lenganni, “Tuhan, Alatalla sa kuasani puang uweng tikas, tuu leha hante nelang maka wawauh kawan ulahan tangannu! Raja katuluh bangsa, tuu adil nelang bujur kawan tindakannu!

⁴Hie sa puang takut anri hanyu, Tuhan? Hie sa puang hamen iwara pihante mulianu? Ekat hanyu sa barasis. Katuluh bangsa sagar hawi nyambah hanyu daya kawan tindakannu sa adil haut nadinung daya katantuluh ulun.”

⁵Udiyiru aku kadinung Kemah Tuhan hang surga tauka nelang Kemah Tuhan naan hawuangni.

⁶Balalu kapitu malekat anri kapitu gagudan yiru kaluar teka Lewu Alatalla. Pakaian here teka kain lena sa barasis nelang milau-milau. Here makai kalukup dada sa naulah teka amas.

⁷Isa teka kaepat mahluk yiru ngami ma kapitu malekat yiru pitu kawua mangkok amas sa penu anri panyangit Alatalla, — Alatalla sa welum palus ma kalalawahni.

⁸Balalu Lewu Alatalla yiru penu anri atuk teka pihante nelang kuasa Alatalla. Salawah kapitu gagudan sa nainsing daya kapitu malekat yiru huan galis, puang uweng sunah erang kaulun sa iyuh masuk mawuang Lewu Alatalla.