Read Ma'anyan WAHYU 16 Bible Online

WAHYU 16 - Ma'anyan bible

WAHYU 16

¹Balalu aku karengei lengan mehet teka wuang Lewu Alatalla kaeau ma kapitu malekat yiru, “Hulu, mawak isi kapitu mangkok kasangiten Alatalla yiru ma ambau tane!”

²Malekat sa palanungkai tulak mawak isi mangkokni ma ambau tane. Balalu timbul kawan sibulut sa tamam nelang mahanang tatuu hang katuluh ulun sa naan siri satua yiru, nelang hang kawan ulun sa nyambah ampatungni.

³Dami malekat sa karueh mawak isi mangkokni ma laut. Balalu ranu laut mariang kala ira ulun matei, nelang kawan makhluk sa welum hawuang laut yiru uras matei.

⁴Udiyiru malekat sa katelu mawak isi mangkokni mawuang hungei anri ma kawan matei ranu, balalu katuluh ranuni jari ira.

⁵Aku karengei malekat sa bakuasa hang ambau ranu kaeau, “Hanyu haut nyanawu hukuman sa adil, u sa Pangabarasis, Alatalla sa naan, nelang sa haut naan!

⁶Here haut nunrak ira ulun wat Alatalla anri ira kawan nabi, itati hanyu nunyu here nguut ira. Samula yiru sa patut wuah here!”

⁷Balalu aku karengei lengan teka mezbah sa kaeau, “Tuhan, Alatalla sa kuasani puang uweng tikas, kawan hukuman sa nasanawunu bujur nelang adil!”

⁸Udiyiru malekat sa kaepat mawak isi mangkokni ma mate anrau, balalu mate anrau na huyu nyanahu murunsia makai laingni sa tamam tatuu.

⁹Murunsia lahu daya tamam laingni, here balalu ngahalaen ngaran Alatalla, sa bakuasa hang ambau kawan gagudan yiru. Kude biar kalayiru, here tatap puang hamen batobat teka kawan dosa here nelang puang hamen nawat pihante mulia Alatalla.

¹⁰Balalu malekat sa kadime mawak isi mangkokni ma padudusan satua yiru. Balalu katuluh karajaan satua yiru maieng maituk, nelang murunsia ngikit lela daya kahanangen.

¹¹Balalu here ngahalaen Alatalla hang surga daya here kahanangen daya kawan sibulut here. Kude here tatap puang batobat teka kawan pagawian here sa jahat.

¹²Udiyiru malekat sa kaenem mawak isi mangkokni ma Hungei Efrat sa laga yiru. Balalu hungei yiru karing hampe kawan raja teka timur tau takia malupui hungei yiru.

¹³Balalu aku kadinung telu roh jahat sa wangunni kala barikatak. Isa isa barikatak yiru kaluar teka wawa naga, teka wawa satua nelang teka wawa nabi palasu.

¹⁴Here yiru kawan roh jahat sa ngulah kawan kawauhen. Katatelu roh yiru tulak nunung kawan raja hang dunia palus ngumpul here nampan babur hang Anrau hante, hanyeyiru Anrau teka Alatalla sa kuasani puang uweng tikas.

¹⁵“Rengei! Aku hawi kala maling! Tuu sanang marauh ulun sa tatap sadia nelang bajaga, nyaga pakaianni, hampe hanye puang takia tabentur nelang amangan hang hadapan ulun rama!”

¹⁶Udiyiru kawan roh yiru ngumpul kawan raja yiru hang unengan sa hang basa Ibrani naantuh Harmagedon.

¹⁷Kamulek malekat sa kapitu mawak isi mangkokni ma awan. Balalu naan rengei lengan mehet teka padudusan hang Lewu Alatalla, sa kaeau, “Haut jumpuh!”

¹⁸Balalu hawi kelat sa wawereu maaru-maati nelang lengan nanyu gagunu nelang laligur, sinrah gempa bumi sa luar biasa tamamni. Puang suah naan gempa bumi kalayiru tamamni kalemah murunsia naulah. Yiti gempa bumi sa pangatamamni.

¹⁹Tumpuk sa hante yiru tapisah jari telu bagian, nelang kawan tumpuk hang katuluh negara hang dunia pada uras lenuh. Balalu Alatalla kaitung neu Babel tumpuk hante yiru. Balalu Alatalla nunyu hanye nguut anggur teka mangkok anggur Alatalla — hanyeyiru anggur panyangitni sa ilelap.

²⁰Katuluh pulau wawai nelang katuluh gunung uras mahinam.

²¹Uran es watu hante, erang kabutup weatni dimempulu kilogram, lawu teka langit meat ulun rama. Balalu here ngahalaen Alatalla daya gagudan uran es sa luar biasa yiru.