Read Ma'anyan WAHYU 17 Bible Online

WAHYU 17 - Ma'anyan bible

WAHYU 17

¹Udiyiru erang kaulun teka pitu malekat sa negei pitu mangkok yiru hawi nunung aku nelang kaeau, “Ma yati, aku sagar nutui ma hanyu kewangun pandayangan hante yiru sagar nahukum, hanyeyiru tumpuk hante yiru sa naampinri hang rite kawan hungei.

²Kawan raja hang dunia idapa anri hanye, nelang kawan sa muneng hang ambau tane haut mahamui daya anggur dapa bela here.”

³Balalu aku nakuasa daya Roh Alatalla, nelang malekat yiru nginsing aku ma padang gurun. Hang yaru aku kadinung erang kaulun wawei maharung hang ambau erang kaukui satua sa warnani mariang maintem-intem, nelang penu nasurat anri kawan ngaran sa ngampahe Alatalla. Satua yiru baulu pitu nelang batanruk sapuluh.

⁴Wawei yiru makai baju warana ungu anri mariang maintem-intem, nelang nahias makai kawan parhiasan teka amas, kawan parmata anri mutiara. Hang tanganni hanye negei isa mangkok amas penu anri kawan hal sa bere nelang murun, hasil teka dapa belani.

⁵Hang raini naan nasurat ngaran sa uweng arati rasia. Ngaran yiru hanyeyiru “Babel Sa Hante, ineh katuluh pandayangan anri ulun duruhaka hang dunia.”

⁶Balalu aku kadinung wawei yiru mahamui daya ira ulun wat Alatalla nelang ira kawan ulun sa nawunu daya gana satia ma Yesus. Tawuk aku kadinung wawei yiru, balalu aku wauh tatuu.

⁷Balalu malekat yiru kaeau ma aku, “Inun sababni hanyu wauh? Itati aku iwara ma hanyu rasia wawei yiru nelang rasia satua sa natungkangni yiru, hanyeyiru satua sa baulu pitu nelang batanruk sapuluh.

⁸Satua yiru dahulu hie suah welum, kude itati puang welum lagi. Hanye puang lawah lagi sagar kaluar teka labak pampatei nelang sagar tulak nuju kabinasaan. Kawan ulun sa welum hang ambau tane, sa ngaranni puang nadaftar hawuang Buku Ulun Welum kalemah dunia huan naulah sagar wauh amun kadinung satua yiru. Daya satua yiru dahulu hie suah welum. Itati hanye puang welum lagi, kude hanye sagar hawi kamulek.

⁹Hawuang hal yiti parlu naan kaharatien anri kapintaren. Pitu ulu yiru hanyeyiru pitu bukit; hanyeyiru kawan bukit unengan wawei yiru maharung. Nelang pada pitu ulu yiru hanyeyiru pitu raja,

¹⁰dime teka here yiru haut lawu, isa pagun marentah nelang sa isa lagi huan hawi.

¹¹Satua sa dahulu hie suah welum, kude itati puang welum lagi, hanyeyiru raja sa kawalu. Raja yiru erang kaulun teka kapitu raja yiru pada, sa itati rahat nuju kabinasaan.

¹²Sapuluh tanruk sa dinungnu yiru hanyeyiru sapuluh raja sa huan marentah. Kude here sagar naami kuasa nampan marentah yalah raja baya anri satua yiru salawah erang jam.

¹³Kasapuluh raja yiru katuluhni naan tujuan sa sameh; here katuluhni nyarah kakuaten anri kakuasaan here ma satua yiru.

¹⁴Here sagar baparang nawan Anak Babiri yiru. Kude Anak Babiri yiru baya anri kawan ulun umba hanye sa satia sa haut naherauni nelang napidini yiru sagar nyantalau kawan raja yiru, daya hanye Tuhan katuluh kawan tuan, nelang Raja katuluh kawan raja.”

¹⁵Malekat yiru kaeau pada, “Ranu sa dinungnu yiru, unengan pandayangan yiru maharung, hanyeyiru kawan bangsa, kawan rakyat, kawan negara anri kawan basa.

¹⁶Sapuluh tanruk sa dinungnu yiru anri satua yiru sagar muar ma pandayangan yiru. Here sagar hanrampas katuluh inun sa naan haratani, nelang nabentur hanye. Here sagar nguta dagingni nelang ngabinasa hanye makai apui.

¹⁷Daya Alatalla haut hanggarak atei here nampan nampalus ransana Alatalla. Alatalla ngulah here mira pakat nampan nyarah kakuasaan here ma satua yiru, nampan situa yiru marentah hampe jari inun sa naeau daya Alatalla.

¹⁸Wawei sa dinungnu yiru hanyeyiru tumpuk hante, sa marentah kawan raja hang ambau tane.”