Read Ma'anyan WAHYU 18 Bible Online

WAHYU 18 - Ma'anyan bible

WAHYU 18

¹Udiyiru aku kadinung erang kaulun malekat lain minau teka surga. Hanye naan kuasa sa hante, nelang sahayani ngulah litar dunia maraai.

²Anri lengan mehet hanye kaeau, “Haut tumbai, Babel sa hante haut tumbai! Itati hanye ekat unengan kawan setan anri kawan roh jahat. Hawuangni welum kawan masam wurung sa padi puang iyuh nakuta nelang kakuaren ulun.

³Daya katuluh bangsa haut nguut anggur kabahirien dapa bela. Kawan raja dunia haut idapa ibela anri hanye, nelang kawan padagang hang ambau tane haut tatau daya kabahirien sa puang iyuh tahan.”

⁴Balalu aku karengei naan lengan lain teka surga sa kaeau, “Hayu kaluar, ulun watku! Hayu kaluar teka wuangni! Ada naun ngalut kawan dosani nelang ada umba nanggung hukumanni!

⁵Daya dosani batuyuk-tuyuk hampe langit nelang Alatalla kaitung kawan kajahatenni.

⁶Ulah ma hanye sameh kala isa haut naulahni ma naun; waleh ma hanye kala sa haut naulahni anri naun. Huang mangkokni anri uuten sa karasni rueh kali lipat teka uuten sa nasadiani ma naun.

⁷Ami ma hanye kasusahen anri hanang atei sa sameh wahaini anri pihante nelang egah emung sa haut naamini ma tenga diri ni raerai. Daya hanye saratang kaeau hawuang ateini, ‘Aku yiti ratu sa marentah! Aku puang wawei walu; aku puang sagar kaingkam mahanang atei!’

⁸Daya gana yiru, balalu hanye hang erang anrau sagar wuah silaka — sarit sampar, mahanang atei anri juju-lau. Nelang hanye sagar nasanahu makai apui, daya tuu kuasa Tuhan Alatalla sa mangadili hanyeyiru.”

⁹Kawan raja hang dunia sa umba pagawianni idapa ibela nelang kabahirien wawei yiru sagar nungkau nelang nangis tumpuk yiru amun here kadinung atuk ikangkewul teka apui sa nyanrakit tumpuk yiru.

¹⁰Here sagar minri lawit daya here takut wuah kahanangen here kaeau, “Aduh, bukan main silakani tumpuk sa tawantar yiru — tumpuk Babel sa segah! Hawuang erang jam hukuman ma hanyu haut natampalus!”

¹¹Kawan padagang hang ambau tane pada nangis nelang umba mahanang atei gana wawei yiru, daya puang uweng lagi sunah erang kaulun sa midi kawan barang dagangan here.

¹²Puang uweng lagi sa midi amas, perak, parmata anri mutiara here; kalayiru pada kain lena, kain ungu, sutera, kain mariang maintem-intem; katuluh masam kayu sa mahadin naantilau, kawan barang teka gading anri teka kayu sa rarang, teka tamaga, jatang anri pualam;

¹³upak kayu manis, rarampah, wawangian, mur anri kamanyan; anggur, minyak, tepung, gandum; sapi, babiri, kuda anri kareta, kawan walah, nelang hampe pahewukan murunsia.

¹⁴Kawan padagang kaeau ma wawei yiru, “Katuluh inun sa nakasinniennu neu umak haratanu haut puang uweng lagi, nelang katuluh katatauennu anri pitamamnu haut wawai. Hanyu puang sagar kahaba yiru lagi!”

¹⁵Kawan padagang sa haut tatau daya badagang hang tumpuk yiru sagar minri teka lawit, daya here takut tamput silaka. Here sagar nangis nelang mahanang atei,

¹⁶balalu here kaeau, “Aduh, bukan main silakani tumpuk hante sa tawantar yiru! Lanani hanye makai pakaian lena, kain ungu anri kain mariang maintem-intem; biasani hanye penu anri parhiasan amas, parmata anri mutiara!

¹⁷Kude ekat hang erang jam, hanye haut kawawaian katuluh katatauenni!” Katuluh nakhoda, panumpang, baya ulun kapal, nelang katuluh ulun sa mata pancaharianni hang laut, minri teka lawit.

¹⁸Here ngiak tawuk kadinung atuk ikangkewul teka apui sa nyanrakit tumpuk yiru. Anri lengan mehet here kaeau, “Puang suah uweng tumpuk lain sa sameh kala tumpuk sa hante yiti!”

¹⁹Here balalu muwur habu hang ulu here yalah siri umba mahanang atei, here nungkau nelang igauh anri mehet, “Aduh, bukan main silakani tumpuk sa hante yiti! Katatauenni haut ngulah katuluh ulun sa naan kapal hang laut jari tatau! Kude ekat hang erang jam, hanye haut kawawaian alakatantuluhni!”

²⁰U surga, ware arai mihewu daya kahansuren tumpuk yiru! U ulun wat Alatalla, kawan rasul, anri kawan nabi, ware naun arai mihewu! Daya Alatalla haut nukum hanye neu iwaleh inun sa haut naulahni anri naun!

²¹Udiyiru, erang kaulun malekat sa wigas gansang ngenat erang kabutup watu — sa hanteni hena watu gilingan sa hante — balalu nawut watu yiru mawuang laut nelang kaeau, “Kalayiti sarani tumpuk Babel sa tawantar yiru sagar natawut lalawit hampe puang haba lagi.

²²Lengan papaluan ulun pamalu kasapi, teka kawan panyanyi, ulun pangampeau suling anri ulun panyiwui tarompet, puang sagar uweng lagi rengei hang hanyu. Puang uweng lagi kawan ulun pandai hang yiru, anri kawan lengan watu panggilingan sika puang sagar rengei lagi.

²³Ulun puang lagi sagar kadinung raai palita hawuang hanyu; puang uweng lagi rengei lengan rami raya pangantinan hang yiru. Kawan padagangnu hanyeyiru kawan ulun sa tamam hang ambau tane, nelang makai alimu gaibnu hanyu nipu ngakal katuluh bangsa hang dunia!”

²⁴Babel nahukum daya hawuang tumpuk yiru haut naan haba ira kawan nabi, ira ulun wat Alatalla — nelang ira katuluh ulun sa nawunu hang ambau tane.