Read Ma'anyan WAHYU 19 Bible Online

WAHYU 19 - Ma'anyan bible

WAHYU 19

¹Udiyiru naan rengeiku lengan kala lengan ridu ulun rama teka surga sa nanterau, “Tawat Alatalla! Alatalla takam hanyeyiru Alatalla sa nyalamat; hanye Alatalla sa mulia nelang bakuasa!

²Hukumanni adil nelang pintar maharati! Hanye haut nukum pandayangan sa hante, sa nanrusak dunia makai dapa belani. Alatalla haut nukum pandayangan yiru, daya hanye munu kawan walah Alatalla.”

³Balalu lengan ulun rama yiru nanterau lagi, “Tawat Alatalla! Atuk teka apui sa nyanrakit tumpuk yiru sagar ikangkewul puang taduh haut!”

⁴Balalu karuampulu epat pamimpin anri kaepat mahluk sa naan hang ngawariung padudusan yiru ijuku nyambah Alatalla sa maharung hang ambau padudusan. Here kaeau, “Amen! Tawat Alatalla!”

⁵Balalu naan rengei lengan teka padudusan yiru sa kaeau, “Tawat Alatalla, naun katuluh walah Alatalla, baya katuluh ulun — hante rumis — sa nyambah Alatalla!”

⁶Udiyiru aku naan karengei lengan kala lengan ulun bakumpul rama tatuu; lenganni kala eau galumbang igangulun nelang kala lengan ligur ampeng. Aku karengei here kaeau, “Tawat Alatalla! Daya Tuhan, Alatalla takam sa kuasani puang uweng tikas itati haut marentah!

⁷Hayu takam arai mihewu; hayu takam nawat pihanteni! Daya haut hampe anrau pesta paadu wat sa negei galar Anak Babiri yiru, nelang pangantinni haut tatap sadia ma paaduan.

⁸Pakaian lena mamilau haut naami ma hanye neu napakai.” (Pakaian lena yiru hanyeyiru kawan pagawian maeh sa natampalus daya ulun wat Alatalla.)

⁹Balalu malekat yiru kaeau ma aku, “Surat yiti: ‘Salamat ulun sa naherau hawi ma pesta paadu Anak Babiri yiru.’ ” Kamulek melakat yiru nambah lagi, “Iti kabar maeh teka Alatalla.”

¹⁰Aku ijuku hang hadapan malekat yiru ngunu nyambah hanye, kude hanye kaeau ma aku, “Ada! Ada nyambah aku, sambah Alatalla! Daya aku pada walah sameh kala hanyu, sameh kala katuluh pulaksanainu sa itegei mansing hang kasaksian Yesus!” Daya kasaksian Yesus yiru sa ngami pangarasa kawan ulun sa nujum.

¹¹Kamulek aku kadinung surga nawawanga, balalu naan dinung erang kaukui kude mahilak. Ulun sa nungkangni bangaran sa Satia nelang Kapinuu. Hanye adil hawuang mutus hukuman nelang hang paparangan sa natampalusni.

¹²Mateini yalah lelap apui nelang hang uluni naan makai wahai mahkota. Hang tengani naan nasurat isa ngaran; nelang ekat hanye raerai sa karasa ngaran yiru.

¹³Jubah sa napakaini haut nasulup hawuang ira. Nelang hanye naantuh; “Lengan Alatalla.”

¹⁴Angkatan perang surga naharak hanye nungkang kawan kuda mahilak, nelang makai pakaian lena mahilak barasis.

¹⁵Teka wawani kaluar erang kawila pedang sa kumat nelang makai pedang yiru hanye sagar nyantalau kawan bangsa, nelang hanye sagar marentah here makai tungkeh jatang. Hanye sagar ngameh anggur hawuang pangamehan anggur kasangiten Alatalla Sa Kuasani puang uweng tikas.

¹⁶Hang jubahni anri hang kahapangni nasurat ngaran yiti; “Raja kawan raja nelang Tuhan kawan tuan.”

¹⁷Balalu aku kadinung erang kaulun malekat minri hang ambau mate anrau. Anri lengan mehet hanye nanterau ma katuluh wurung sa samiding hang awan, “Ma yati bakumpul hawi ma pesta hante sa naulah daya Alatalla!

¹⁸Ma yati nguta daging kawan raja, daging kawan pangalima, anri daging kawan pahlawan; ma yati nguta daging kawan panungkang kuda anri daging kawan kudani nelang daging katuluh ulun murunsia, hante, rumis, walah atawa ulun sa bebas!”

¹⁹Kamulek aku kadinung satua yiru, anri kawan raja hang ambau tane baya angkatan perang here, bakumpul nampan babur nawan hanye sa nungkang kude mahilak yiru anri angkatan perangni.

²⁰Balalu satua yiru tajamba baya anri kawan nabi palasu sa haut ngulah kawan kawauhen hang hadapan satua yiru. (Makai kawan kawauhen yiru satua yiru haut nipu kawan ulun sa naan siri satua yiru, nelang kawan ulun sa nyambah ampatung satua yiru.) Balalu satua yiru anri kawan nabi palasu yiru naumpe welum-welum mawuang laut apui sa malelap anri balerang.

²¹Nelang angkatan perang here nawunnu makai pedang sa kaluar teka wawa ulun sa nungkang kuda mahilak yiru. Balalu kawan wurung pada hawi palus nguta daging here sa nawunu yiru.