Read Ma'anyan WAHYU 2 Bible Online

WAHYU 2 - Ma'anyan bible

WAHYU 2

¹“Ma malekat ungkup hang Epesus, surat kalayiti: Iti lengan pesen teka hanye sa negei kapitu wawahiang hang tangan kawanni nelang takia hang penah kapitu pee palita amas yiru.

²Aku karasa inun sa naulah naun: Naun bagawi bahimat nelang naun tuu sabar. Aku karasa naun puang hirut atei ma kawan ulun sa jahat. Nelang ma kawan ulun sa mangaku dirini rasul padahal hanye puang rasul, haut nauji daya naun nelang naun kasasat himat here ipusu.

³Naun sabar, nelang naun wuah kahanangen gana aku, kude naun puang wawai kaharapen.

⁴Kude naan kabaratanku anri naun, hanyeyiru naun puang lagi sinta aku kala asalni.

⁵Daya yiru, itung leha lawitni naun haut lawu! Ware naun batobat teka kawan dosa naun, nelang tampalus inun sa naulah naun asalni. Jaka puang, maka aku sagar hawi nunung naun palus munat pee palita yiru teka unenganni.

⁶Kude naan hal sa maeh hang naun, hanyeyiru naun muar anri pagawian kawan ulun sa umba hi Nikolaus, sa nakakuarenku pada.

⁷Hie sa tau karengei, ware hanye mantaru inun sa naeau daya roh Alatalla ma kawan ungkup! Ma here sa manang, aku sagar ilewa here nguta wua teka kakau pamelum sa welum hang Kabun Alatalla.”

⁸“Ma malekat ungkup hang Smirna, surat kalayiti: Iti pesen teka hanye sa palanungkai nelang sa pijumpuhan — sa haut matei kude welum kamulek.

⁹Aku karasa kawan kasusahen naun; aku karasa naun paua — kude sabujurni naun tatau! Aku karasa kawan puntaka sa natuju ma naun daya kawan ulun sa mangaku dirini Yahudi, padahal puang; here yiru ulun wat Iblis!

¹⁰Ada takut neu kahanangen sa puang lawah lagi naingkam daya naun. Itung, Iblis sagar namasuk naun meheni ma wuang panjara neu murija naun. Naun sagar ngaret kahanangen sapuluh anrau lawahni. Ware naun satia ma aku hampe matei, aku sagar ngami ma naun pamelum sajati palus kalalawah yalah hadiah kamanangen.

¹¹Hie sa tau karengei, ware hanye mantaru inun sa naeau daya roh Alatalla ma kawan ungkup! Here sa manang, budas puang sagar wuah kahanangen daya pampatei sa karueh.”

¹²“Ma malekat ungkup hang Pergamus, surat kala yiti: Iti pesen teka hanye sa negei padang rueh rare sa kumat.

¹³Aku karasa hang awe naun muneng, hanyeyiru hang unengan padudusan iblis marentah. Naun satia ma aku. Likan tawuk hi Antipas, saksiku sa satia yiru, nawunu hang hadapan naun hang unengan markas Iblis, naun puang ngidim naun parisaya ma aku.

¹⁴Kude biar kalahie, naan papire hal sa puang wuah katujuenku hang naun: Naan meheni teka naun umba inun sa naajar daya Bileam. Hi Bileam ngajar hi Balak kewangun nampan kaiyuh nyanawu ulun Israel ma wuang dosa; anri nuntut here nguta kutaen sa haut nasarah ma barhala nelang idapa ibela.

¹⁵Kalayiru pada naan meheni teka naun sa itegei hang ajaran wat Nikolaus.

¹⁶Daya yiru, ware naun batobat teka kawan dosa naun! Jaka puang, himat puang lawah lagi aku sagar hawi nunung naun palus manyarang kawan ulun yiru makai padang sa naan hang wawaku.

¹⁷Hie sa tau karengei, ware hanye mantaru inun sa naeau daya Roh Alatalla ma kawan ungkup! Here sa manang, sagar aku ilewa nguta manna sa tasadina, nelang ma tiap here aku sagar ngami watu mahilak. Hang watu yiru naan nasurat ngaran sa wau, sa puang uweng ulun lain karasa, ekat ulun sa narimeni.”

¹⁸“Ma malekat ungkup hang Tiatira, surat kalayiti: Iti pesen teka Anak Alatalla, sa mateini ilelap kala apui, anri peeni ngalairi kala tamaga naupuh.

¹⁹Aku karasa katuluh kawan sa naulah naun — aku karasa naun sinta ma sasameh naun, naun satia, naun bagawi nelang naun sanggup wuah kahanangen. Aku karasa itati naun bagawi magin bahimat teka dahulu hie.

²⁰Kude iti kabaratanku anri naun, hanyeyiru naun hirut atei ma hi Izabel, wawei sa mangaku hanye huyuan Alatalla. Haut rama kawan walahku sa natipuni nelang naajarni idapa ibela anri nguta kutaen sa haut nasarah ma barhala.

²¹Aku haut ngami tempu ma hanye nampan batobat teka kawan dosani, kude hanye puang hakun taduh idapa ibela.

²²Itung! Aku sagar nampas hanye hampe mahanang hang paanreanni. Hang yiru hanye baya kawan ulun sa idapa anri hanye sagar wuah kahanangen. Katuluhni yiru sagar natampalusku itati — kasuali amun here taduh nampalus kawan hal sa jahat baya anri hanye.

²³Aku pada sagar munu kawan ulun sa umba hanye nampan katuluh ungkup kataru aku yiti hanye, sa karasa pikiran anri hawuang atei murunsia. Aku sagar iwaleh ma tiap naun kala manyu inun sa naulah naun.

²⁴Kude ma naun sa lainni hang Tiatira sa puang umba ajaran sa jahat yiru nelang puang paajar kawan alimu Iblis. Aku kaeau, aku himat puang sagar nambah ma naun umbean sa magin maweat.

²⁵Kude hampe wayahni aku hawi yati, ware naun tatap makai inun sa haut naan hang naun.

²⁶Here sa manang, nelang hampe pijumpuhanni saratang nampalus inun sa nakabahumenku, ma here aku sagar ngami kuasa sa sameh kala sa natarimeku teka Ambahku. Here sagar narime kuasa teka aku nampan marentah kawan bangsa makai tungkeh jatang nelang ngampi hansur kawan bangsa yiru kala kabali.

²⁸Here sagar narime bintang timur teka aku.

²⁹Hie sa tau karengei ware hanye mantaru inun sa naeau daya roh Alatalla ma kawan ungkup!”