Read Ma'anyan WAHYU 21 Bible Online

WAHYU 21 - Ma'anyan bible

WAHYU 21

¹Balalu aku kadinung langit wau anri tane wau. Langit sa palanungkai anri tane sa palanungkai haut wawai, kalayiru pada laut.

²Balalu aku kadinung tumpuk sa barasis yiru, hanyeyiru Yerusalem wau, minau teka surga teka Alatalla. Tumpuk yiru haut natatap kala erang kaulun pangantin wawei napakaian nampan manalu pangantin upu.

³Balalu aku karengei lengan teka padudusan yiru nanterau anri lengan mehet, “Itati unengan Alatalla muneng hanyeyiru baya anri murunsia! Hanye sagar welum baya here, nelang here sagar jari ulun watni. Alatalla raerai sagar naan baya here nelang jari Alatalla here.

⁴Hanye sagar muhut riu matei teka matei here. Pampatei sagar puang uweng lagi; hanang atei, kiak tungkau, atawa kahanangen pada sagar puang uweng lagi. Kawan hal sa dahulu haut wawai.”

⁵Balalu hanye sa maharung hang ambau padudusan yiru kaeau, “Itati aku ngulah ala katantuluhni wau!” Hanye pada kaeau ma aku, “Surat yiti, daya kawan lengan yiti kapinuuni nelang tau naparisaya.”

⁶Balalu hanye kaeau, “Haut luput! Aku sa palanungkai nelang aku sa pangalisan; Aku Tuhan teka panukuan hampe pijumpuhan. Tiap ulun sa malah naamiku tuu eleh nguut teka matei ranu sa ngami pamelum.

⁷Kawan ulun sa manang sagar narime kawan hal yiru teka aku. Aku sagar jari Alatallani, nelang hanye jari anakku.

⁸Kude kawan ulun sa matakut, sulas, ulun duruhaka, pamunu ulun, ulun sa idapa ibela, ulun sa makai kawan alimu gaib, nyambah barhala, katuluh ulun mapusu, sagar naumpe mawuang laut apui nelang balerang sa malelap, hanyeyiru pampatei sa karueh.”

⁹Isa teka kapitu malekat sa haut negei kawan mangkok sa penu anri kawan kapitu kahanangen sa pangalisan yiru hawi nunung aku nelang kaeau, “Ma yati! Aku sagar nutui ma hanyu Pangantin, hanyeyiru matueh wawei Anak Babiri.”

¹⁰Balalu aku nakuasa daya Roh Alatalla, nelang malekat yiru nginsing aku ma punsak gunung sa wawiur ambau. Hanye nutui ma aku Yerusalem, tumpuk sa barasis yiru, tumpuk yiru minau teka surga, teka Alatalla, anri pihante mulia Alatalla.

¹¹Tumpuk yiru minau teka surga, teka Alatalla penu anri pihante mulia Alatalla. Tumpuk yiru ngurumilau kala batu parmata, kala watu baiduri pandan sa jaranih kala kristal.

¹²Pagar tembuk sa ngalilingni ambau nelang hante, anri dua walas pintu gerbang, sa najaga daya dua walas malekat. Hang kawan pintu gerbang yiru naan nasurat kawan ngaran kaduawalas suku bangsa Israel.

¹³Naan telu pintu gerbang sa nadap katuluh unengan; telu hang tiba timur, telu hang tiba barat, telu tiba utara, nelang telu tiba salatan.

¹⁴Pagar tembuk tumpuk yiru naapinri hang ambau dua walas watu panal. Hang tiap watu yiru naan nasurat kawan ngaran teka kaduawalas rasul Anak Babiri yiru.

¹⁵Malekat sa bapaner anri aku yiru naan tungkeh piayu teka amas pakai ngayu tumpuk yiru, kawan pintu gerbangni anri kawan pagar tembukni.

¹⁶Tumpuk yiru wangunni sagi epat — ambauni sameh anri bukani. Balalu malekat yiru ngayu tumpuk yiru makai tungkeh pakai piayuni; katuluh ambau naan 2400 kilometer, buka anri ambauni ma ambau sameh.

¹⁷Tawuk malekat yiru ngukur pagar tembukni, ambau pagar tembuk yiru naan enempulu meter. Ukuran sa napakai daya malekat yiru hanyeyiru ukuran sa napakai daya murunsia.

¹⁸Pagar tembuk tumpuk yiru naulah teka watu baiduri pandan, kude tumpukni naulah teka amas maeh, malindei kala saramin.

¹⁹Kawan watu panal tumpuk yiru nahias makai wahai masam watu parmata. Watu panal sa palanungkai naulah teka watu baiduri pandan, sa karueh teka watu nilam, sa katelu teka watu Yakut, sa kaepat teka watu zamrud,

²⁰sa kadime teka watu baiduri sepah, sa kaenem teka watu delima, sa kapitu teka watu ratna cempaka, sa kawalu teka watu pirus, sa kasuei teka watu topas, sa kasapuluh teka watu krisopras, sa kasawalas teka watu lazuardi, nelang sa kaduawalas teka watu kacubung.

²¹Kadua walas pintu gerbangni naulah teka dua walas mutiara, tiap wawanawangni naulah teka isa mutiara. Lalan hang tumpuk yiru naulah teka amas bulus, malindei kala saramin sa mamilau.

²²Aku puang kadinung Lewu Alatalla hawuang tumpuk yiru, daya Lewu Alatalla hanyeyiru Tuhan raerai, Alatalla sa kuasani puang uweng tikas, anri Anak Babiri yiru.

²³Tumpuk yiru puang parlu naampiraai makai sahaya mate anrau atawa wulan daya pihante mulia Alatalla sa ngampi raai, nelang Anak Babiri hanyeyiru ma palitani.

²⁴Kawan bangsa hang dunia sagar takia hawuang sahayani, nelang kawan raja sika sagar nginsing kawan katatauen here mawuang tumpuk yiru.

²⁵Kawan pintu gerbang tumpuk yiru sagar nawawanga hapus anrau; puang sagar natutup, daya puang uweng kamalem hang yiru.

²⁶Pihante nelang katatauen kawan bangsa sagar nainsing masuk mawuang tumpuk yiru.

²⁷Kude kawan ulun sa haut ngulah kawan hal sa bere murun atawa ipusu nelang nampalus kawan hal sa bere, budas puang sagar masuk mawuang tumpuk yiru. Sa sagar masuk hanyeyiru ekat kawan ulun sa ngaranni nasurat hawuang Buku Ulun Welum, buku wat Anak Babiri yiru.