Read Ma'anyan WAHYU 22 Bible Online

WAHYU 22 - Ma'anyan bible

WAHYU 22

¹Malekat yiru pada nutui ma aku hungei sa ranuni ngami pamelum. Hungei yiru mamilau kala kristal nelang mareh teka padudusan Alatalla anri Anak Babiri yiru,

²hang penah lalan hang tumpuk yiru. hang iring hungei yiru, hang nantuhiani naan kayu kakau pamelum, sa mua dua walas kali erang taun, hanyeyiru hinra erang wulan. Rawenni napakai umak nyamare kawan bangsa.

³Hawuang tumpuk yiru puang uweng sunah isa sa wuah sumpah Alatalla. Padudusan Alatalla anri Anak Babiri yiru sagar naan hawuang tumpuk yiru. Kawan walahni sagar malayanni hanye,

⁴nelang kadinung uruwawani. Ngaranni sagar nasurat hang rai here.

⁵Here puang parlu palita atawa sahaya mate anrau, daya kamalem puang uweng lagi, Tuhan Alatalla raerai sagar ngampi raai here. Balalu here sagar marentah kala raja palus ma kalalawahni.

⁶Balalu malekat yiru kaeau ma aku, “Kawan lengan yiti kapinuuni nelang iyuh naparisaya. Tuhan Alatalla sa ngami rohni ma kawan nabi, haut ngutus malekatni pakai nutui ma kawan walahni inun sa sagar jari.”

⁷“Pantaru hal yiti!” eau Yesus, “Aku sagar hinang hawi. Salamat ulun sa ngalut nuu ma kawan lengan tujum hawuang buku yiti!”

⁸Aku, hi Yohanes haut karengei nelang uras kadinung katuluhni yiti. Udi aku haut nyanrengei nelang ninungni, aku ijuku hang hadapan malekat sa haut nantarang ala katantuluhni yiru ma aku nelang aku hamen nyambah hanye.

⁹Kude hanye kaeau ma aku, “Ada! Ada nyambah aku! Sambah Alatalla! Daya aku pada walah sameh kala hanyu, nelang kala kawan pulaksanainu, kawan nabi anri katuluh ulun sa ngalut nuu ma kawan pesen hang buku yiti!”

¹⁰Balalu hanye kaeau kamulek, “Ada ngidim kawan lengan tujum hawuang buku yiti, daya wayahni haut rite katuluhni yiti sagar jari.

¹¹Ulun sa jahat, elahni hanye magun ngulah jahat; ulun sa bere, elahni hanye magun ngampi bere tengani; ulun sa ngalut kabahumen Alatalla, elahni hanye saratang ngalut kabahumen Alatalla, nelang ulun sa welum hulung ma Alatalla, elahni hanye saratang welum hulung ma Alatalla.”

¹²Yesus kaeau, “Pantaru hal yiti!” “Puang lawah lagi aku sagar hawi nelang nginsing upa pakai iwaleh ma tiap murunsia manyu inun sa haut na ulah dayani.

¹³Aku sa palanungkai nelang sa pangalisan; Aku Tuhan teka Panukuan hampe pijumpuhan.”

¹⁴Salamat ulun sa ngabarasis jubahni hampe barasis, hampe here naan hak nguta wua teka kayu kakau pamelum nelang masuk mawuang tumpuk yiru mitah pintu gerbangni.

¹⁵Kude kawan ulun sa ngulah kawan hal sa bere murun, sa makai kawan alimu gaib, kawan ulun sa nampalus kawan pagawian murun idapa ibela, munu ulun sa nyambah barhala, nelang kawan ulun sa ipusu, hau anri papaneran atawa makai ulah gawi, katuluh ulun yiru unenganni naelah hang luar tumpuk yiru.

¹⁶“Aku, Yesus, haut ngirim malekatku ma naun nampan hanye iwara kawan hal yiti ma kaparluan kawan ungkup. Aku yiti turunan Dawid; aku bintang timur sa maraai yiru.”

¹⁷Roh Alatalla anri pangantin wawei kaeau, “Ma yati!” Tiap ulun sa karengei yiti harus pada kaeau, “Ma yati!” Hie sa malah, ware hanye hawi! Nelang hie sa hamen, ware hanye ngalap ranu sa ngami pamelum yiru sa naami tuu eleh.

¹⁸Ma katuluh ulun sa nyanrengei kawan lengan tujum hang wuang buku yiti, aku, hi Yohanes, ngami paringatan kalayiti: Amun ulun nambah kawan lengan tujum yiti, himat Alatalla sagar nambah hukuman ma ulun yiru makai kawan kahanangen sa nasurat hang buku yiti.

¹⁹Nelang amun ulun nangkurang teka kawan lengan tujum yiti, himat Alatalla sagar nangkurang bagianni sa nasurat hawuang buku yiti-hanyeyiru bagian teka kakau pamelum anri teka tumpuk sa barasis yiru.

²⁰Hanye sa nampe katuluh kabar yiti kaeau, “Kapinuuni, aku sagar hinang hawi!” Amen! Ware hanyu hawi, u Tuhan Yesus!

²¹Mudahan Tuhan Yesus Kristus ngami berkatni ma katuluh ulun wat Alatalla!